ਮੱਖੂ, 6 ਸਤੰਬਰ (ਕੁਲਵਿੰਦਰ ਸਿੰਘ ਸੰਧੂ)- ਬਲਾਕ ਮੱਖੂ ਦੇ ਪਿੰਡ ਵੱਟੂ ਭੱਟੀ ਦੇ ਵਾਸੀ ਦਰਬਾਰਾ ਸਿੰਘ ਮੱਲ੍ਹੀ ਸਪੁੱਤਰ ਗੁਰਚਰਨ ਸਿੰਘ ਮੱਲ੍ਹੀ ਜਿਸ ਦੀ ਜ਼ਮੀਨ ਪਿੰਡ ਦੀਨੇ ਕੇ ਦੇ ਰਕਬੇ 'ਚ ਪੈਂਦੀ ਸੀ ਜਿਸ ਨੂੰ ਸਤਲੁਜ ਬਿਆਸ ਦਰਿਆਵਾਂ ਸੰਗਮ ਵਿਚ ਆਏ ਹੜ੍ਹਾਂ ਨੇ ਉਜਾੜ ਕੇ ਰੱਖ ਦਿੱਤਾ | ਇਸ ਕਿਸਾਨ ਦਾ ਮਕਾਨ, ਪਸ਼ੂਆਂ ਦਾ ਸ਼ੈੱਡ, ਫਾਰਮ 60 ਟਰੈਕਟਰ ਟਰਾਲੀ ਤੇ ਖੇਤੀ ਸੰਦ ਸਾਰੇ ਦਰਿਆ ਦੀ ਭੇਟ ਚੜ੍ਹ ਗਏ | ਦਰਬਾਰਾ ਸਿੰਘ ਨੇ ਦੱਸਿਆ ਕਿ ਮੇਰੇ ਵਲੋਂ ਆਪਣੀ ਜ਼ਮੀਨ ਵਿਚ ਪਾਇਆ ਮਕਾਨ ਸਭ ਤੋਂ ਉੱਚੀ ਜਗ੍ਹਾ 'ਤੇ ਸੀ | ਅਚਾਨਕ ਪਾਣੀ ਆਉਣ ਨਾਲ ਮੈਂ ਆਪਣੇ ਪਸ਼ੂ ਤਾਂ ਬਾਹਰ ਕੱਢ ਲਏ ਪਰ ਟਰੈਕਟਰ ਟਰਾਲੀ, ਰੇੜ੍ਹੇ ਅਤੇ ਹੋਰ ਸਾਰੇ ਖੇਤੀ ਦੇ ਸੰਦ ਦਰਿਆ ਵਿਚ ਰੁੜ੍ਹ ਗਏ | ਉਨ੍ਹਾਂ ਕਿਹਾ ਕਿ ਅੱਜ ਮੈਂ ਆਪਣੀ ਸਾਰੀ ਦਾਸਤਾਨ ਕਾਂਗਰਸ ਕਮੇਟੀ ਦੇ ਸੂਬਾ ਪ੍ਰਧਾਨ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਨੂੰ ਦੱਸੀ ਤਾਂ ਉਨ੍ਹਾਂ ਕਿਹਾ ਕਿ ਟਰੈਕਟਰ ਤੈਨੂੰ ਅਸੀਂ ਲੈ ਕੇ ਦੇਵਾਂਗੇ | ਕਿਸਾਨ ਦਰਬਾਰਾ ਸਿੰਘ ਨੇ ਦੱਸਿਆ ਕਿ ਉਸ ਦਾ 16 ਕਿੱਲੇ ਝੋਨਾ ਤੇ ਪੰਜਾਂ ਕਿੱਲਿਆਂ ਦਾ ਪਸ਼ੂਆਂ ਦਾ ਪਾਇਆ ਆਚਾਰ ਵੀ ਬਰਬਾਦ ਹੋ ਗਿਆ | ਕਿਸਾਨਾਂ ਵਲੋਂ ਪ੍ਰਸ਼ਾਸਨ ਨੂੰ ਮਦਦ ਦੀ ਅਪੀਲ ਕੀਤੀ ਗਈ |