ਫ਼ਿਰੋਜ਼ਪੁਰ, 27 ਸਤੰਬਰ (ਗੁਰਿੰਦਰ ਸਿੰਘ)-ਦੇਵ ਸਮਾਜ ਕਾਲਜ ਫਾਰ ਵੁਮੈਨ, ਫ਼ਿਰੋਜ਼ਪੁਰ ਵਿਖੇ ਕਾਲਜ ਦੇ ਚੇਅਰਮੈਨ ਨਿਰਮਲ ਸਿੰਘ ਢਿੱਲੋਂ ਦੇ ਆਸ਼ੀਰਵਾਦ, ਚੇਅਰਪਰਸਨ ਡਾ. ਅਗਨੀਜ਼ ਢਿੱਲੋਂ ਦੇ ਮਾਰਗਦਰਸ਼ਨ ਅਤੇ ਕਾਲਜ ਪਿ੍ੰਸੀਪਲ ਡਾ. ਸੰਗੀਤਾ ਦੀ ਦੇਖ ਰੇਖ ਹੇਠ ਪੋਸਟ ਗ੍ਰੈਜੂਏਟ ਰਸਾਇਣ ਵਿਭਾਗ ਵਲੋਂ ਡੀ.ਐਸ.ਟੀ.ਕਿਊਰੀ ਗ੍ਰਾਂਟ ਅਧੀਨ ਯੂ.ਵੀ.-ਵਿਜ਼ ਸਪੈਕਟਰੋਫੋਟੋਮੀਟਰ 'ਤੇ ਹੈਂਡਸ-ਆਨ ਟਰੇਨਿੰਗ ਪ੍ਰੋਗਰਾਮ ਕਰਵਾਇਆ ਗਿਆ | ਇਸ ਟਰੇਨਿੰਗ ਦਾ ਮੁੱਖ ਉਦੇਸ਼ ਗ੍ਰੈਜੂਏਟ ਅਤੇ ਪੋਸਟ ਗ੍ਰੈਜੂਏਟ ਵਿਦਿਆਰਥੀਆਂ ਨੂੰ ਯੂ.ਵੀ.-ਵਿਜ਼ ਸਪੈਕਟਰੋਸਕੋਪੀ ਦੇ ਪ੍ਰਯੋਗਾਤਮਕ ਪਹਿਲੂਆਂ ਨਾਲ ਜਾਣੂ ਕਰਵਾਉਣਾ ਸੀ | ਟਰੇਨਿੰਗ ਦੇ ਮੁੱਖ ਉਦੇਸ਼ ਯੂ.ਵੀ.-ਵਿਜ਼ ਸਪੈਕਟਰੋਸਕੋਪੀ ਦੇ ਸਿਧਾਂਤ ਨੂੰ ਸਮਝਣਾ, ਉਪਕਰਨ ਦੇ ਘਟਕਾਂ ਅਤੇ ਉਨ੍ਹਾਂ ਦੇ ਕਾਰਜਾਂ ਦੀ ਪਛਾਣ ਕਰਨਾ, ਉਪਕਰਨ ਨੂੰ ਸੁਤੰਤਰ ਤੌਰ 'ਤੇ ਚਲਾਉਣਾ, ਨਮੂਨਿਆਂ ਨੂੰ ਸਹੀ ਢੰਗ ਨਾਲ ਤਿਆਰ ਕਰਨਾ ਅਤੇ ਸੰਭਾਲਣਾ, ਬੇਸਲਾਈਨ ਸੁਧਾਰ ਅਤੇ ਕੈਲੀਬ੍ਰੇਸ਼ਨ ਕਰਨਾ, ਸੁਰੱਖਿਆ ਨਿਯਮਾਂ ਅਤੇ ਉੱਤਮ ਪ੍ਰਯੋਗਸ਼ਾਲਾ ਵਿਵਹਾਰ ਦੀ ਪਾਲਣਾ ਕਰਨਾ ਰਿਹਾ | ਵਿਭਾਗ ਮੁਖੀ ਸ਼੍ਰੀਮਤੀ ਨੇਹਾ ਨੇ ਸਰੋਤ ਵਿਅਕਤੀ ਡਾ. ਮਨਕੋਮਲ (ਜੀ.ਐਨ.ਏ. ਯੂਨੀਵਰਸਿਟੀ, ਫਗਵਾੜਾ) ਦਾ ਸਵਾਗਤ ਕੀਤਾ | ਉਨ੍ਹਾਂ ਨੇ ਪਾਵਰਪੌਇੰਟ ਪ੍ਰੈਜ਼ੇਂਟੇਸ਼ਨ ਰਾਹੀਂ ਵਿਸ਼ੇ ਅਨੁਸਾਰ ਜਾਣਕਾਰੀ ਦਿੱਤੀ ਅਤੇ ਉਸ ਤੋਂ ਬਾਅਦ ਵਿਦਿਆਰਥਣਾਂ ਨੂੰ ਪ੍ਰਯੋਗਾਤਮਕ ਟਰੇਨਿੰਗ ਪ੍ਰਦਾਨ ਕੀਤੀ | ਸੈਸ਼ਨ ਵਿਚ ਵਿਦਿਆਰਥਣਾਂ ਨੂੰ ਪ੍ਰਸਾਰਨ, ਉਪਕਰਨ ਦੇ ਘਟਕਾਂ, ਕਾਰਜਪ੍ਰਣਾਲੀ ਅਤੇ ਨਮੂਨਾ ਤਿਆਰੀ ਤਕਨੀਕਾਂ ਬਾਰੇ ਆਦਿ ਹੋਰ ਜਾਣਕਾਰੀ ਦਿੱਤੀ ਗਈ | ਭਾਗੀਦਾਰਾਂ ਨੇ ਬੀਅਰ-ਲੈਂਬਰਟ ਨਿਯਮ ਦੁਆਰਾ ਸੰਘਣਤਾ ਨਿਰਧਾਰਨ ਵਰਗੇ ਅਸਲੀ ਐਪਲੀਕੇਸ਼ਨਾਂ ਦੀ ਗਹਿਰਾਈ ਨਾਲ ਸਮਝ ਪ੍ਰਾਪਤ ਕੀਤੀ | ਅੰਤ ਵਿਚ ਪਿ੍ੰਸੀਪਲ ਡਾ. ਸੰਗੀਤਾ ਨੇ ਪ੍ਰੋਗਰਾਮ ਦੇ ਸਫਲ ਆਯੋਜਨ ਲਈ ਵਿਭਾਗ ਦੇ ਮੁਖੀ ਮੈਡਮ ਨੇਹਾ ਅਤੇ ਡਾ. ਹਰਲੀਨ ਕੌਰ ਅਸਿਸਟੈਂਟ ਪ੍ਰੋਫੈਸਰ ਅਤੇ ਵਿਭਾਗੀ ਅਧਿਆਪਕਾਂ ਨੂੰ ਵਧਾਈ ਦਿੱਤੀ |