ਮਮਦੋਟ, 22 ਦਸੰਬਰ (ਰਾਜਿੰਦਰ ਸਿੰਘ ਹਾਂਡਾ)-ਕਸਬਾ ਮਮਦੋਟ ਵਿਚ ਨਵਾਂ ਪਾਇਆ ਗਿਆ ਸੀਵਰੇਜ ਹਰ ਰੋਜ਼ ਸੁਰਖ਼ੀਆਂ ਵਿਚ ਰਹਿੰਦਾ ਹੈ | ਜਿੱਥੇ ਸੀਵਰੇਜ ਵਿਚ ਗੰਦੇ ਪਾਣੀ ਦਾ ਸਹੀ ਤਰ੍ਹਾਂ ਨਿਕਾਸ ਨਾ ਹੋਣ ਕਾਰਨ ਲੋਕ ਮੁਸ਼ਕਲਾਂ ਦਾ ਸਾਹਮਣਾ ਕਰ ਰਹੇ ਹਨ ਉੱਥੇ ਸੁਰਜੀਤ ਕਾਲੋਨੀ ਦੇ ਸਾਹਮਣੇ ਮਮਦੋਟ ਫ਼ਿਰੋਜ਼ਪੁਰ ਮੁੱਖ ਸੜਕ ਦੇ ਕਿਨਾਰੇ 'ਤੇ ਬਣੀ ਸੀਵਰੇਜ ਦੀ ਡਿੱਗੀ 'ਤੇ ਢੱਕਣ ਨਾ ਹੋਣ ਕਾਰਨ ਸਾਹਮਣੇ ਤਾੋ ਆ ਰਹੇ ਕਿਸੇ ਭਾਰੀ ਵਾਹਨ ਕਾਰਨ ਕਿਨਾਰੇ ਗਈ ਕਾਰ ਦਾ ਇਕ ਪਹੀਆ ਸੀਵਰੇਜ ਵਾਲੇ ਹੋਲ਼ ਵਿਚ ਡਿਗ ਗਿਆ | ਜਿਸ ਕਾਰਨ ਕਾਰ ਬੁਰੀ ਤਰ੍ਹਾਂ ਫਸ ਗਈ ਅਤੇ ਉਸ ਦੀ ਬਾਡੀ ਨੂੰ ਨੁਕਸਾਨ ਵੀ ਪਹੁੰਚਿਆਂ ਹੈ, ਕਾਰ ਚਾਲਕ ਨੇ ਬੜੀ ਮੁਸ਼ਕਿਲ ਨਾਲ ਗਲੀ ਮੁਹੱਲੇ ਦੇ ਲੋਕਾਂ ਦੀ ਮਦਦ ਨਾਲ ਕਾਰ ਦੇ ਪਹੀਏ ਨੂੰ ਡਿਗ ਵਿਚ ਬਾਹਰ ਕੱਢਿਆ | ਉੱਧਰ ਮੁਹੱਲਾ ਨਿਵਾਸੀਆਂ ਦਾ ਕਹਿਣਾ ਹੈ ਕਿ ਖੁੱਲੇ੍ਹ ਢੱਕਣ ਵਾਲੀ ਡਿੱਗੀ ਗਲੀ ਦੇ ਬਿਲਕੁਲ ਸਾਹਮਣੇ ਹੈ, ਜਿੱਥੋਂ ਅਕਸਰ ਬੱਚੇ ਆਉਂਦੇ ਜਾਂਦੇ ਹਨ, ਜੇਕਰ ਗ਼ਲਤੀ ਨਾਲ ਕੋਈ ਛੋਟਾ ਬੱਚਾ ਖੁੱਲੇ੍ਹ ਢੱਕਣ ਵਾਲੀ ਡਿੱਗੀ ਵਿਚ ਡਿਗ ਪਿਆ ਤਾਂ ਇਕ ਵੱਡਾ ਹਾਦਸਾ ਵਾਪਰ ਸਕਦਾ ਹੈ | ਮੁਹੱਲਾ ਨਿਵਾਸੀਆਂ ਨੇ ਇਸ ਖੁੱਲ੍ਹੀ ਡਿੱਗੀ ਤੇ ਤੁਰੰਤ ਢੱਕਣ ਲਗਾਉਣ ਦੀ ਮੰਗ ਕੀਤੀ ਹੈ |
