ਬਾਲਿਆਂਵਾਲੀ, 25 ਸਤੰਬਰ (ਕੁਲਦੀਪ ਮਤਵਾਲਾ)-ਸਰਕਾਰੀ ਪ੍ਰਾਇਮਰੀ ਸਕੂਲ ਹਰਕਿਸ਼ਨਪੁਰਾ ਵਿਖੇ ਸੈਂਟਰ ਪੱਧਰੀ ਖੇਡਾਂ ਕਰਵਾਈਆਂ ਗਈਆਂ ਜਿਸ 'ਚ ਸੈਂਟਰ ਦੇ ਸਾਰੇ ਸਕੂਲਾਂ ਦੇ ਬੱਚਿਆਂ ਨੇ ਵੱਧ ਚੜ੍ਹ ਕੇ ਹਿੱਸਾ ਲਿਆ | ਫਸਵੇਂ ਮੁਕਾਬਲਿਆਂ 'ਚ ਸਰਕਾਰੀ ਪ੍ਰਾਇਮਰੀ ਸਕੂਲ ਹਰਕਿਸ਼ਨਪੁਰਾ ਦੇ ਵਿਦਿਆਰਥੀ ਨੇ ਹਰ ਸਾਲ ਵਾਂਗ ਐਂਤਕੀ ਵੀ ਖੇਡਾਂ 'ਚ ਵੱਡੀਆਂ ਮੱਲਾਂ ਮਾਰੀਆਂ | ਸਕੂਲ ਮੁਖੀ ਸ਼ੈਂਬਰ ਸਿੰਘ ਮਾਨ ਨੇ ਦੱਸਿਆ ਕਿ ਬੱਚਿਆਂ ਨੇ ਯੋਗਾ ਅਤੇ ਜਿਮਨਾਸਸਿਟਕ ਵਰਗੀਆਂ ਸਖ਼ਤ ਖੇਡਾਂ 'ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ ਗੋਲਡ ਮੈਡਲ ਪ੍ਰਾਪਤ ਕੀਤਾ, ਕਰਾਟੇ, 100 ਮੀ, 200 ਮੀ, 600 ਰੇਸਾਂ 'ਚ ਗੋਲਡ ਮੈਡਲ ਪ੍ਰਾਪਤ ਕੀਤਾ, ਰਿਲੇਅ ਰੇਸ 'ਚ ਕੁੜੀਆਂ ਨੇ ਪਹਿਲੀ ਪੁਜੀਸ਼ਨ ਨਾਲ ਗੋਲਡ ਮੈਡਲ ਜਿੱਤਿਆ, ਮੁੰਡੇ ਨੇ ਰਿਲੇਅ ਰੇਸ 'ਚ ਸਿਲਵਰ ਮੈਡਲ ਜਿੱਤਿਆ ਅਤੇ ਬੱਚਿਆਂ ਨੇ ਗੋਲਾ ਸੁੱਟਣ 'ਚ ਦੂਜਾ ਸਥਾਨ ਤੇ ਰਿਧਮਿਕ ਯੋਗਾ 'ਚ ਪਹਿਲੀ ਪੁਜੀਸ਼ਨ ਹਾਸਲ ਕਰਕੇ ਗੋਲਡ ਮੈਡਲ ਜਿੱਤਿਆ | ਮੁੱਖ ਅਧਿਆਪਕ ਨੇ ਦੱਸਿਆ ਕਿ ਖੇਡਾਂ ਲਈ ਕਰਾਟੇ ਕੋਚ ਵਰਖਾ ਰਾਣੀ ਅਤੇ ਜਿਮਾਨਸਿਟਕ ਕੋਚ ਪਿ੍ੰਸ ਸਿੰਘ ਮੁਹੱਈਆ ਕਰਵਾਏ ਸਨ, ਜਿਨ੍ਹਾਂ ਨੇ ਬੱਚਿਆਂ ਨੂੰ ਦੋ ਮਹੀਨਿਆਂ ਤੋਂ ਕੋਚਿੰਗ ਦਿੱਤੀ ਜਦਕਿ ਪਿੰਡ ਦੀਆਂ ਦੋ ਹੋਣਹਾਰ ਕੁੜੀਆਂ ਰੀਤਾ ਭੱਟੀ ਅਤੇ ਕੁਲਦੀਪ ਕੌਰ ਨੇ ਵੀ ਕਈ ਮਹੀਨਿਆਂ ਤੋਂ ਖੇਡਾਂ ਦੀ ਤਿਆਰੀ ਲਈ ਮੁਫ਼ਤ ਸੇਵਾ ਕੀਤੀ | ਬੱਚਿਆਂ ਦੀ ਹੌਂਸਲਾ ਅਫ਼ਜ਼ਾਈ ਲਈ ਸਕੂਲ ਦੇ ਮੁੱਖ ਅਧਿਆਪਕ ਸੈਂਬਰ ਸਿੰਘ ਮਾਨ ਨੇ ਆਪਣੇ ਵਲੋਂ 11000 ਰੁਪਏ ਟੂਰਨਾਮੈਂਟ ਲਈ ਦਾਨ ਵਜੋਂ ਦਿੱਤੇ | ਦੱਸਣਾ ਬਣਦਾ ਹੈ ਕਿ 700 ਲੋਕਾਂ ਦੀ ਆਬਾਦੀ ਵਾਲੇ ਛੋਟੇ ਜਿਹੇ ਪਿੰਡ ਦੇ ਸਕੂਲ 'ਚ 39 ਬੱਚੇ ਪੜ੍ਹਦੇ ਹਨ ਪ੍ਰੰਤੂ ਇਸ ਸਕੂਲ ਦੇ ਬੱਚਿਆਂ ਨੇ ਸੈਂਟਰ ਦੇ ਸਾਰੇ ਸਕੂਲਾਂ 'ਚੋਂ ਸੱਭ ਤੋਂ ਵੱਧ ਗੋਲਡ ਮੈਡਲ ਤੇ ਸਿਲਵਰ ਮੈਡਲ ਜਿੱਤ ਕੇ ਅੱਵਲ ਨੰਬਰ ਟਰਾਫ਼ੀ 'ਤੇ ਕਬਜ਼ਾ ਕੀਤਾ ਹੈ ਜਦਕਿ ਬੈਸਟ ਐਥਲੀਟ ਵੀ ਇਸੇ ਸਕੂਲ ਦੇ ਬੱਚੇ ਰਹੇ ਹਨ | ਪਿੰਡ ਵਾਸੀਆਂ ਨੇ ਵੀ ਸਕੂਲ ਸਟਾਫ਼ ਨੂੰ ਵਧਾਈ ਦਿੱਤੀ |
