ਹੰਡਿਆਇਆ, 3 ਸਤੰਬਰ (ਗੁਰਜੀਤ ਸਿੰਘ ਖੁੱਡੀ)-ਪਿਛਲੇ ਕਈ ਦਿਨਾਂ ਤੋਂ ਪੈ ਰਹੀ ਭਾਰੀ ਬਰਸਾਤ ਕਾਰਨ ਹੰਡਿਆਇਆ ਸੇਵਾ ਕੇਂਦਰ ਦੀ ਬਿਲਡਿੰਗ ਵਿਚ ਪਾਣੀ ਚੋਣ ਕਰ ਕੇ ਬਿਜਲੀ ਉਪਕਰਨਾਂ ਵਿਚ ਕਰੰਟ ਆਉਣ ਲੱਗ ਪਿਆ | ਇਸ ਸਬੰਧੀ ਸੇਵਾ ਕੇਂਦਰ ਹੰਡਿਆਇਆ ਦੇ ਮੁਲਾਜ਼ਮ ਟੇਕਕਿੰਦਰ ਸਿੰਘ, ਕਰਨ ਸਿੰਗਲਾ, ਗਗਨਦੀਪ ਕੌਰ, ਸਿਮਰਨਜੀਤ ਕੌਰ ਅਤੇ ਸਕਿਉਰਿਟੀ ਗਾਰਡ ਨਿਰਮਲ ਸਿੰਘ ਨੇ ਦੱਸਿਆ ਕਿ ਅੱਜ ਸਵੇਰੇ ਕੇਂਦਰ ਖੋਲ੍ਹ ਕੇ ਕੰਪਿਊਟਰ ਚਲਾਉਣ ਲੱਗੇ ਤਾਂ ਉਸ ਵਿਚੋਂ ਕਰੰਟ ਆਉਣ ਲੱਗਾ | ਉਨ੍ਹਾਂ ਕਿਹਾ ਕਿ ਸਾਰਿਆਂ ਪੱਖਿਆਂ ਅਤੇ ਲਾਈਟਾਂ ਦੀਆਂ ਕਨਸੀਲਡਾਂ ਵਿਚੋਂ ਪਾਣੀ ਚੋ ਰਿਹਾ ਸੀ | ਜਿਸ ਕਾਰਨ ਸਾਰੇ ਕੰਪਿਊਟਰਾਂ ਨੂੰ ਪਾਣੀ ਤੋਂ ਬਚਾਉਣ ਲਈ ਢਕਿਆ ਗਿਆ ਹੈ | ਜਦੋਂ ਇਸ ਸਬੰਧੀ ਸੇਵਾ ਕੇਂਦਰ ਦੇ ਇੰਚਾਰਜ ਮਨਜੀਤ ਸ਼ਰਮਾ ਨਾਲ ਗੱਲਬਾਤ ਕੀਤੀ ਤਾਂ ਉਨ੍ਹਾਂ ਦੱਸਿਆ ਕਿ ਬਿਜਲੀ ਮੁਲਾਜ਼ਮ ਭੇਜ ਕੇ ਚੈੱਕ ਕਰਵਾਇਆ ਗਿਆ ਅਤੇ ਕੰਮ ਚਾਲੂ ਕਰਵਾ ਦਿੱਤਾ |
