ਬਿ੍ਸਬੇਨ, 2 ਸਤੰਬਰ (ਏਜੰਸੀ)-ਆਸਟ੍ਰੇਲੀਆ ਦੇ ਤਜਰਬੇਕਾਰ ਤੇਜ਼ ਗੇਂਦਬਾਜ਼ ਮਿਸ਼ੇਲ ਸਟਾਰਕ ਨੇ ਟੈਸਟ ਤੇ ਵਨਡੇ ਫਾਰਮੈਟਾਂ 'ਚ ਆਪਣੇ ਕਰੀਅਰ ਨੂੰ ਅੱਗੇ ਵਧਾਉਣ ਲਈ ਟੀ-20 ਅੰਤਰਰਾਸ਼ਟਰੀ ਕ੍ਰਿਕਟ ਨੂੰ ਅਲਵਿਦਾ ਕਹਿ ਦਿੱਤਾ ਹੈ | ਆਸਟ੍ਰੇਲੀਆ ਦੇ ਮੁੱਖ ਤੇਜ਼ ਗੇਂਦਬਾਜ਼ ਤਿੱਕੜੀ (ਪੈਟ ਕਮਿੰਸ ਤੇ ਜੋਸ਼ ਹੇਜ਼ਲਵੁੱਡ ਦੇ ਨਾਲ) ਦੇ ਇਕ ਮਹੱਤਵਪੂਰਨ ਮੈਂਬਰ ਸਟਾਰਕ ਨੇ ਆਉਣ ਵਾਲੀਆਂ ਐਸ਼ੇਜ਼, ਭਾਰਤ 'ਚ ਟੈਸਟ ਸੀਰੀਜ਼ ਤੇ 2027 'ਚ ਵਨਡੇ ਵਿਸ਼ਵ ਕੱਪ ਤੇ ਆਈ.ਪੀ.ਐਲ. ਵਰਗੇ ਵੱਡੇ ਸਮਾਗਮਾਂ ਦੀ ਤਿਆਰੀ ਨੂੰ ਧਿਆਨ 'ਚ ਰੱਖਦੇ ਹੋਏ, ਖੇਡ ਦੇ ਸਭ ਤੋਂ ਛੋਟੇ ਅੰਤਰਰਾਸ਼ਟਰੀ ਫਾਰਮੈਟ ਤੋਂ ਆਪਣੀ ਸੰਨਿਆਸ ਦਾ ਐਲਾਨ ਕੀਤਾ | ਆਪਣੀ ਤੇਜ਼ ਰਫ਼ਤਾਰ ਸਵਿੰਗ, ਘਾਤਕ ਯਾਰਕਰ ਤੇ ਖਤਰਨਾਕ ਬਾਊਾਸਰਾਂ ਲਈ ਮਸ਼ਹੂਰ, ਸਟਾਰਕ ਨੇ 65 ਟੀ-20 ਅੰਤਰਰਾਸ਼ਟਰੀ ਮੈਚਾਂ 'ਚ 79 ਵਿਕਟਾਂ ਲਈਆਂ ਹਨ | ਉਹ ਐਡਮ ਜ਼ਾਂਪਾ (103 ਮੈਚਾਂ 'ਚ 130 ਵਿਕਟਾਂ) ਤੋਂ ਬਾਅਦ ਇਸ ਫਾਰਮੈਟ 'ਚ ਆਸਟ੍ਰੇਲੀਆ ਦਾ ਦੂਜਾ ਸਭ ਤੋਂ ਸਫਲ ਗੇਂਦਬਾਜ਼ ਹੈ | ਪੈਂਤੀ ਸਾਲਾ ਸਟਾਰਕ ਨੇ 65 ਟੀ-20 ਮੈਚਾਂ 'ਚ 79 ਵਿਕਟਾਂ ਲਈਆਂ ਹਨ | ਉਸਨੇ ਕਿਹਾ ਕਿ ਟੈਸਟ ਕ੍ਰਿਕਟ ਉਸਦੀ ਤਰਜੀਹ ਹੈ ਤੇ ਉਸਨੂੰ ਅਗਲੇ 2 ਸਾਲਾਂ ਦੇ ਵਿਅਸਤ ਅੰਤਰਰਾਸ਼ਟਰੀ ਸ਼ਡਿਊਲ ਲਈ ਤਿਆਰ ਰਹਿਣਾ ਪਵੇਗਾ |
