ਲਾਹੌਰ, 2 ਸਤੰਬਰ (ਪੀ.ਟੀ.ਆਈ.)-ਪਾਕਿਸਤਾਨ ਦੇ ਸੀਮਤ ਓਵਰਾਂ ਦੇ ਮੱਧਕ੍ਰਮ ਦੇ ਬੱਲੇਬਾਜ਼ ਆਸਿਫ਼ ਅਲੀ ਨੇ ਅੰਤਰਰਾਸ਼ਟਰੀ ਕ੍ਰਿਕਟ ਤੋਂ ਸੰਨਿਆਸ ਲੈਣ ਦਾ ਐਲਾਨ ਕੀਤਾ | ਫੈਸਲਾਬਾਦ ਦੇ 33 ਸਾਲਾ ਖਿਡਾਰੀ ਨੇ 2021 ਤੇ 2022 'ਚ ਟੀ-20 ਅੰਤਰਰਾਸ਼ਟਰੀ ਵਿਸ਼ਵ ਕੱਪ ਤੇ 2019 'ਚ ਇੰਗਲੈਂਡ 'ਚ ਹੋਏ ਪੁਰਸ਼ ਇਕ ਰੋਜ਼ਾ ਵਿਸ਼ਵ ਕੱਪ 'ਚ ਵੀ ਆਪਣੇ ਦੇਸ਼ ਦੀ ਨੁਮਾਇੰਦਗੀ ਕੀਤੀ | ਉਸਨੇ ਪਾਕਿਸਤਾਨ ਦੀ ਜਰਸੀ ਪਹਿਨਣ ਨੂੰ ਆਪਣੇ ਪੇਸ਼ੇਵਰ ਕਰੀਅਰ ਦਾ ਸਭ ਤੋਂ ਮਾਣਮੱਤਾ ਅਧਿਆਇ ਦੱਸਿਆ | ਹਾਲਾਂਕਿ, ਆਸਿਫ਼ ਨੇ ਕਿਹਾ ਕਿ ਉਹ ਦੁਨੀਆ ਭਰ 'ਚ ਘਰੇਲੂ ਤੇ ਫਰੈਂਚਾਇਜ਼ੀ ਲੀਗ ਕ੍ਰਿਕਟ ਖੇਡਣਾ ਜਾਰੀ ਰੱਖੇਗਾ | ਸੱਜੇ ਹੱਥ ਦੇ ਬੱਲੇਬਾਜ਼ ਨੇ ਪਾਕਿਸਤਾਨ ਲਈ 21 ਇਕ ਰੋਜ਼ਾ ਤੇ 58 ਟੀ-20 ਮੈਚ ਖੇਡੇ ਹਨ, ਜਿਸ 'ਚ ਤਿੰਨ ਅਰਧ-ਸੈਂਕੜਿਆਂ ਦੀ ਮਦਦ ਨਾਲ 959 ਦੌੜਾਂ ਬਣਾਈਆਂ ਹਨ |
