ਅੰਮਿ੍ਤਸਰ, 3 ਸਤੰਬਰ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਦੇ ਸੂਬਾ ਬਲੋਚਿਸਤਾਨ ਦੀ ਰਾਜਧਾਨੀ ਕੋਇਟਾ 'ਚ ਸਰਯਾਬ ਰੋਡ 'ਤੇ ਬੀਤੀ ਰਾਤ ਬਲੋਚ ਨੈਸ਼ਨਲ ਪਾਰਟੀ ਦੀ ਰੈਲੀ ਦੇ ਖ਼ਤਮ ਹੋਣ ਤੋਂ ਤੁਰੰਤ ਬਾਅਦ ਹੋਏ ਬੰਬ ਧਮਾਕੇ ਵਿਚ 15 ਲੋਕ ਮਾਰੇ ਗਏ ਤੇ 38 ਹੋਰ ਜ਼ਖ਼ਮੀ ਹੋ ਗਏ | ਸਾਬਕਾ ਸੰਸਦ ਮੈਂਬਰ ਅਹਿਮਦ ਨਵਾਜ਼ ਤੇ ਪਾਰਟੀ ਨੇਤਾ ਮੂਸਾ ਬਲੋਚ ਵੀ ਜ਼ਖ਼ਮੀਆਂ 'ਚ ਸ਼ਾਮਿਲ ਹਨ | ਪ੍ਰਾਪਤ ਜਾਣਕਾਰੀ ਅਨੁਸਾਰ ਬਲੋਚਿਸਤਾਨ ਦੇ ਸਾਬਕਾ ਮੁੱਖ ਮੰਤਰੀ ਸਰਦਾਰ ਅਤਾਉੱਲਾ ਮੈਂਗਲ ਦੀ ਚੌਥੀ ਬਰਸੀ 'ਤੇ ਕੋਇਟਾ ਦੇ ਸ਼ਾਹਵਾਨੀ ਸਟੇਡੀਅਮ 'ਚ ਇਕ ਰੈਲੀ ਕੱਢੀ ਗਈ ਸੀ | ਇਸ ਤੋਂ ਬਾਅਦ ਪਾਰਕਿੰਗ 'ਚ ਉਕਤ ਆਤਮਘਾਤੀ ਹਮਲਾ ਹੋਇਆ | ਅਧਿਕਾਰੀਆਂ ਨੇ ਪੁਸ਼ਟੀ ਕੀਤੀ ਕਿ ਹਮਲਾਵਰ 30 ਸਾਲ ਤੋਂ ਘੱਟ ਉਮਰ ਦਾ ਸੀ ਤੇ ਰਾਜਨੀਤਕ ਇਕੱਠ ਖ਼ਤਮ ਹੋਣ ਤੋਂ ਬਾਅਦ ਉਸ ਨੇ ਲਗਭਗ 8 ਕਿੱਲੋ ਵਿਸਫੋਟਕ ਨਾਲ ਧਮਾਕਾ ਕੀਤਾ | ਇਕੱਠ ਦੇ ਸਮੇਂ ਸੁਰੱਖਿਆ ਲਈ ਲਗਭਗ 120 ਪੁਲਿਸ ਕਰਮਚਾਰੀ ਤਾਇਨਾਤ ਕੀਤੇ ਗਏ ਸਨ | ਅੱਜ ਇਕ ਪ੍ਰੈੱਸ ਕਾਨਫ਼ਰੰਸ ਦੌਰਾਨ ਬਲੋਚਿਸਤਾਨ ਦੇ ਵਧੀਕ ਮੁੱਖ ਸਕੱਤਰ (ਗ੍ਰਹਿ), ਡੀ. ਆਈ. ਜੀ. ਅਪਰਾਧ ਤੇ ਐੱਸ. ਐੱਸ. ਪੀ. (ਓਪਰੇਸ਼ਨ) ਨੇ ਘਟਨਾ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਧਮਾਕਾ ਰਾਤ 9 ਵਜੇ ਦੇ ਕਰੀਬ ਹੋਇਆ | ਅੱਤਵਾਦ ਵਿਰੋਧੀ ਵਿਭਾਗ (ਸੀ. ਟੀ. ਡੀ.) ਨੇ ਅੱਗੇ ਕਿਹਾ ਕਿ ਆਤਮਘਾਤੀ ਹਮਲਾਵਰ ਦੀ ਲਾਸ਼ ਬਰਾਮਦ ਕਰ ਲਈ ਗਈ ਹੈ |
