ਸੈਕਰਾਮੈਂਟੋ, 2 ਨਵੰਬਰ (ਹੁਸਨ ਲੜੋਆ ਬੰਗਾ)-ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਰੱਖਿਆ ਵਿਭਾਗ ਨੂੰ ਆਦੇਸ਼ ਦਿੱਤਾ ਹੈ ਕਿ ਉਹ ਨਾਈਜੀਰੀਆ ਵਿਰੁੱਧ ਸੰਭਾਵੀ ਫ਼ੌਜੀ ਕਾਰਵਾਈ ਲਈ ਤਿਆਰ ਰਹੇ ਕਿਉਂਕਿ ਨਾਈਜੀਰੀਆ 'ਚ ਈਸਾਈਆਂ ਵਿਰੁੱਧ ਹਿੰਸਾ ਖ਼ਤਮ ਨਹੀਂ ਹੋ ਰਹੀ | ਨਾਈਜੀਰੀਆ ਟਰੰਪ ਦੇ ਇਨ੍ਹਾਂ ਦੋਸ਼ਾਂ ਨੂੰ ਵਾਰ-ਵਾਰ ਰੱਦ ਕਰ ਚੁੱਕਾ ਹੈ | ਸੋਸ਼ਲ ਮੀਡੀਆ ਪੋਸਟ 'ਚ ਟਰੰਪ ਨੇ ਕਿਹਾ ਹੈ 'ਨਾਈਜੀਰੀਆ 'ਚ ਈਸਾਈਆਂ ਦਾ 'ਸਮੂਹਿਕ ਕਤਲੇਆਮ' ਹੋ ਰਿਹਾ ਹੈ, ਅਮਰੀਕਾ ਫ਼ੌਰੀ ਤੌਰ 'ਤੇ ਨਾਈਜੀਰੀਆ ਨੂੰ ਹਰ ਤਰਾਂ ਦੀ ਸਹਾਇਤਾ ਬੰਦ ਕਰ ਦੇਵੇਗਾ | ਟਰੰਪ ਨੇ ਕਿਹਾ ਕਿ ਨਾਈਜੀਰੀਆ ਸਰਕਾਰ ਈਸਾਈਆਂ ਵਿਰੁੱਧ ਹਿੰਸਾ ਰੋਕਣ ਲਈ ਤੇਜ਼ੀ ਨਾਲ ਕਾਰਵਾਈ ਕਰੇ | ਟਰੰਪ ਨੇ ਆਪਣੇ ਲੰਬੇ ਸੰਦੇਸ਼ 'ਚ ਕਿਹਾ ਹੈ ਕਿ ਭਿਆਨਕ ਜ਼ੁਲਮ ਕਰਨ ਵਾਲੇ ਇਸਲਾਮਿਕ ਅੱਤਵਾਦੀਆਂ ਦਾ ਮੁਕੰਮਲ ਸਫ਼ਾਇਆ ਹੀ ਮਸਲੇ ਦਾ ਹੱਲ ਹੈ | ਇਸ ਦੇ ਜਵਾਬ 'ਚ ਰੱਖਿਆ ਮੰਤਰੀ ਪੇਟ ਹੇਗਸੇਠ ਨੇ ਸੋਸ਼ਲ ਮੀਡੀਆ ਉੱਪਰ ਟਰੰਪ ਦੇ ਬਿਆਨ ਦੇ ਸਕਰੀਨ ਸ਼ਾਟ ਸਮੇਤ ਕਿਹਾ ਹੈ 'ਹਾਂ ਸਰ ਨਾਈਜੀਰੀਆ ਜਾਂ ਹੋਰ ਕਿਤੇ ਵੀ ਨਿਰਦੋਸ਼ ਈਸਾਈਆਂ ਦੇ ਕਤਲ ਹਰ ਹਾਲਤ 'ਚ ਫ਼ੌਰੀ ਬੰਦ ਹੋਣੇ ਚਾਹੀਦੇ ਹਨ | ਰੱਖਿਆ ਵਿਭਾਗ ਕਾਰਵਾਈ ਦੀ ਤਿਆਰੀ ਕਰ ਰਿਹਾ ਹੈ | ਨਾਈਜੀਰੀਆ ਸਰਕਾਰ ਈਸਾਈਆਂ ਦੀ ਰੱਖਿਆ ਕਰੇ ਜਾਂ ਫਿਰ ਅਸੀਂ ਇਸਲਾਮਿਕ ਅੱਤਵਾਦੀਆਂ ਦਾ ਸਫ਼ਾਇਆ ਕਰ ਦੇਵਾਂਗੇ ਜੋ ਅਤਿਆਚਾਰ ਕਰ ਰਹੇ ਹਨ |
