ਮੈਲਬੌਰਨ, 21 ਨਵੰਬਰ (ਪਰਮਵੀਰ ਸਿੰਘ ਆਹਲੂਵਾਲੀਆ)-ਬੀਤੇ ਸਾਲ ਤਸਮਾਨੀਆ ਦੀ ਡੇਰਵੈਂਟ ਨਦੀ ਵਿਚ ਵਾਪਰੀ ਦੁੱਖਦਾਈ ਘਟਨਾ ਵਿਚ ਪੰਜਾਬੀ ਨੌਜਵਾਨ ਦੀਪਿੰਦਰਜੀਤ ਸਿੰਘ ਦੀ ਡੁੱਬਣ ਨਾਲ ਮੌਤ ਹੋ ਗਈ ਸੀ | ਦੀਪਿੰਦਰਜੀਤ ਨੂੰ ਤੈਰਾਕੀ ਨਹੀਂ ਆਉਂਦੀ ਸੀ ਜਦੋਂ ਕਿ ਇਕ 19 ਸਾਲਾ ਨੌਜਵਾਨ ਨੇ ਲੁੱਟ ਦੀ ਨੀਅਤ ਨਾਲ ਉਸਨੂੰ ਨਦੀ ਵਿਚ ਧੱਕਾ ਦੇ ਦਿੱਤਾ ਸੀ | ਅਦਾਲਤ ਵਿਚ ਚਲੇ ਮੁਕੱਦਮੇ ਦੌਰਾਨ ਇਹ ਸਪਸ਼ਟ ਹੋ ਗਿਆ ਕਿ ਦੋਸ਼ੀ ਵੱਲੋਂ ਦਿੱਤਾ ਧੱਕਾ ਹੀ ਮੌਤ ਦਾ ਕਾਰਨ ਸੀ | ਪਾਣੀ ਵਿਚ ਡਿੱਗਣ ਤੋਂ ਬਾਅਦ ਦੀਪਿੰਦਰਜੀਤ ਤੇਜ਼ ਧਾਰਾ ਨਾਲ ਸੰਘਰਸ਼ ਕਰਦਾ ਰਹਿਆ ਪਰ ਤੈਰਾਕੀ ਨਾ ਜਾਣਨ ਕਰਕੇ ਬਾਹਰ ਨਾ ਨਿਕਲ ਸਕਿਆ ਤੇ ਉਸ ਦੀ ਮੌਤ ਹੋ ਗਈ | ਅਦਾਲਤ ਵੱਲੋਂ ਦੋਸ਼ੀ ਨੌਜਵਾਨ ਨੂੰ 4 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ | ਜਿਕਰਯੋਗ ਹੈ ਕਿ ਮਿ੍ਤਕ ਦੀਪਿੰਦਰਜੀਤ ਸਿੰਘ ਦਾ ਸੰਬੰਧ ਪੰਜਾਬ ਦੇ ਜ਼ਿਲ੍ਹਾ ਲੁਧਿਆਣਾ ਨਾਲ ਸੀ | ਘਟਨਾ ਦੇ ਸਮੇਂ ਉਸਦੀ ਇਕ ਦੋਸਤ ਵੀ ਉਸਦੇ ਨਾਲ ਮੌਜੂਦ ਸੀ, ਜੋ ਖ਼ਤਰਨਾਕ ਹਾਲਾਤਾਂ 'ਚ ਬੜੀ ਮੁਸ਼ਕਲ ਨਾਲ ਨਦੀ ਤੋਂ ਬਾਹਰ ਨਿਕਲ ਕੇ ਆਪਣੀ ਜਾਨ ਬਚਾਉਣ 'ਚ ਕਾਮਯਾਬ ਰਹੀ |
