ਫ਼ਤਿਹਾਬਾਦ, 5 ਸਤੰਬਰ (ਹਰਬੰਸ ਸਿੰਘ ਮੰਡੇਰ)- ਭਾਰੀ ਬਾਰਸ਼ ਅਤੇ ਘੱਗਰ ਨਦੀ ਦੇ ਵਧਦੇ ਪਾਣੀ ਦੇ ਪੱਧਰ ਦੇ ਮੱਦੇਨਜ਼ਰ ਪ੍ਰਸ਼ਾਸਨ ਪੂਰੀ ਤਰ੍ਹਾਂ ਚੌਕਸ ਹੈ | ਪੇਂਡੂ ਖੇਤਰਾਂ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਲਈ ਰੰਗੋਈ ਅਤੇ ਘੱਗਰ ਨਦੀਆਂ 'ਤੇ ਬਣੇ ਰਿੰਗ ਡੈਮਾਂ ਨੂੰ ਮਜ਼ਬੂਤ ਕਰਨ ਦਾ ਕੰਮ ਤੇਜ਼ ਰਫ਼ਤਾਰ ਨਾਲ ਚੱਲ ਰਿਹਾ ਹੈ | ਜਾਖਲ, ਕਾਸਮਪੁਰ, ਤਲਵਾੜਾ, ਕੁਦਨੀ, ਸਾਧਨਵਾਸ, ਚੂਹੜਪੁਰ, ਮਿਓਾਦ ਖ਼ੁਰਦ, ਦੀਵਾਨਾ, ਸ਼ਕਰਪੁਰਾ, ਰੱਤਾਥੇਹ, ਕਰੰੜੀ, ਪੁਰਨਮਾਜਰਾ, ਧਾਰਸੂਲ, ਹਿੰਮਤਪੁਰਾ ਆਦਿ ਕਈ ਪਿੰਡਾਂ 'ਚ ਰਿੰਗ ਬੰਨ੍ਹ ਨੂੰ ਪੱਕਾ ਕਰਨ ਵੱਡੀ ਗਿਣਤੀ 'ਚ ਮਗਨਰੇਗਾ ਮਜ਼ਦੂਰ ਦਿਨ-ਰਾਤ ਮਿਹਨਤ ਕਰ ਰਹੇ ਹਨ | ਐਸ.ਡੀ.ਐਮ. ਆਕਾਸ਼ ਸ਼ਰਮਾ ਨੇ ਉਕਤ ਪਿੰਡਾਂ 'ਚ ਸਥਿਤੀ ਦਾ ਜਾਇਜ਼ਾ ਲੈਂਦਿਆਂ ਦੱਸਿਆ ਕਿ ਪ੍ਰਸ਼ਾਸਨ ਪੂਰੀ ਤਰ੍ਹਾਂ ਚੌਕਸ ਹੈ ਤੇ ਕੋਈ ਵੀ ਸਮੱਸਿਆ ਪੈਦਾ ਨਹੀਂ ਹੋਣ ਦਿੱਤੀ ਜਾਵੇਗੀ | ਉਨ੍ਹਾਂ ਅਧਿਕਾਰੀਆਂ ਨੂੰ ਹਦਾਇਤ ਕੀਤੀ ਕਿ ਜਿੱਥੇ ਪਾਣੀ ਦਾ ਦਬਾਅ ਵੱਧ ਹੈ ਉੱਥੇ ਵਾਧੂ ਕਰਮਚਾਰੀ ਤਾਇਨਾਤ ਕੀਤੇ ਜਾਣ | ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਅਫ਼ਵਾਹਾਂ ਵੱਲ ਧਿਆਨ ਨਾ ਦੇਣ ਤੇ ਕੁਦਰਤੀ ਆਫ਼ਤ ਦਾ ਡਟ ਕੇ ਸਾਹਮਣਾ ਕਰਨ | ਐਸ.ਡੀ.ਐਮ ਨੇ ਕਿਹਾ ਕਿ ਲੋਕਾਂ ਨੂੰ ਘੱਗਰ ਨਦੀ ਤੇ ਹੋਰ ਸੰਵੇਦਨਸ਼ੀਲ ਥਾਵਾਂ 'ਤੇ ਨਹੀਂ ਜਾਣਾ ਚਾਹੀਦਾ | ਉਨ੍ਹਾਂ ਕਿਹਾ ਕਿ ਪਿੰਡ ਵਾਸੀਆਂ ਦੇ ਸਹਿਯੋਗ ਤੇ ਪ੍ਰਸ਼ਾਸਨ ਦੀ ਚੌਕਸੀ ਨਾਲ ਸਥਿਤੀ 'ਤੇ ਪੂਰਾ ਕੰਟਰੋਲ ਰੱਖਿਆ ਗਿਆ ਹੈ | ਜੇਕਰ ਕਿਤੇ ਵੀ ਕੋਈ ਸਮੱਸਿਆ ਆਉਂਦੀ ਹੈ ਤਾਂ ਤੁਰੰਤ ਉਪਾਅ ਕੀਤੇ ਜਾਣਗੇ | ਇਸ ਮੌਕੇ ਜ਼ਿਲ੍ਹਾ ਪ੍ਰੀਸ਼ਦ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਸੁਰੇਸ਼ ਕੁਮਾਰ, ਏ.ਬੀ.ਪੀ.ਓ. ਸੰਦੀਪ ਜਾਂਗੜਾ ਅਤੇ ਅਰੁਣ ਆਦਿ ਹਾਜ਼ਰ ਸਨ |
