ਗੁਰਾਇਆ, 4 ਸਤੰਬਰ (ਬਲਵਿੰਦਰ ਸਿੰਘ)-ਇੱਥੇ ਦੀ ਮਹੰਤ ਸ਼ਿਵਾਨੀ ਦੀ ਕੁਦਰਤੀ ਮੌਤ ਹੋਣ ਦੀ ਖ਼ਬਰ ਮਿਲੀ ਸੀ ਪਰ ਦੇਰ ਸ਼ਾਮ ਇਸ ਮਾਮਲੇ ਨੂੰ ਕਥਿਤ ਕਤਲ ਦਾ ਮਾਮਲਾ ਦੱਸੇ ਜਾਣ ਨਾਲ ਚਰਚਾ ਬਣ ਗਈ | ਅੰਤਿਮ ਰਸਮਾਂ ਕਰਨ ਲਈ ਤਿਆਰੀਆਂ ਕੀਤੀਆਂ ਜਾ ਰਹੀਆ ਸਨ ਕਿ ਇਹ ਚਰਚਾ ਬਣ ਗਈ ਕਿ ਮਹੰਤ ਸ਼ਿਵਾਨੀ ਦਾ ਕਤਲ ਕੀਤਾ ਗਿਆ ਹੈ | ਉਸ ਦੇ ਗੱਲ 'ਤੇ ਰੱਸੀ ਦੇ ਨਿਸ਼ਾਨ ਦੇਖ ਕੇ ਪੁਲਿਸ ਵੀ ਹਰਕਤ ਵਿਚ ਆ ਗਈ | ਮਹੰਤ ਸ਼ਿਵਾਨੀ ਦੇ ਪੁਰਾਣੇ ਡਰਾਈਵਰ ਨੇ ਦਾਅਵਾ ਕੀਤਾ ਹੈ ਕਿ ਮਹੰਤ ਸ਼ਿਵਾਨੀ ਦੀ ਮੌਤ ਕੁਦਰਤੀ ਨਹੀਂ, ਸਗੋਂ ਗਲਾ ਘੁੱਟ ਕੇ ਕੀਤੀ ਗਈ ਹੈ | ਇਸ ਸਬੰਧੀ ਵਾਇਰਲ ਆਡੀਓ ਅਨੁਸਾਰ, ਮਿ੍ਤਕਾ ਦੇ ਗਲੇ 'ਤੇ ਗਹਿਰੇ ਜ਼ਖ਼ਮ ਦੇ ਨਿਸ਼ਾਨ ਸਨ ਅਤੇ ਦੋਸ਼ ਲਗਾਇਆ ਗਿਆ ਹੈ ਕਿ ਉਨ੍ਹਾਂ ਦਾ ਕਤਲ ਕੀਤਾ ਗਿਆ | ਪੁਲਿਸ ਨੇ ਹਰਕਤ ਵਿਚ ਆ ਕੇ ਲਾਸ਼ ਨੂੰ ਕਬਜ਼ੇ ਵਿਚ ਲੈ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ | ਮਿ੍ਤਕਾ ਦਾ ਭਰਾ, ਜੋ ਜੰਮੂ 'ਚ ਰਹਿੰਦਾ ਹੈ, ਵੀ ਮੌਕੇ 'ਤੇ ਪਹੁੰਚਿਆ | ਉਸ ਨੇ ਕਿਹਾ ਕਿ ਉਸ ਨੰੂ ਸਵੇਰੇ ਮੌਤ ਦੀ ਖ਼ਬਰ ਮਿਲੀ ਅਤੇ ਉਹ ਤੁਰੰਤ ਇੱਥੇ ਪੁੱਜਾ ਹੈ ਉਸ ਨੇ ਕਿਹਾ ਕਿ ਰਾਤ ਦੇਰ ਤੱਕ ਸ਼ਿਵਾਨੀ ਮਹੰਤ ਦੀ ਗੱਲਬਾਤ ਹੁੰਦੀ ਰਹੀ ਅਤੇ ਸਭ ਕੁੱਝ ਠੀਕ ਸੀ, ਪਰ ਸਵੇਰੇ ਮੌਤ ਦੀ ਖ਼ਬਰ ਮਿਲੀ ਹੈ | ਐੱਸ.ਐੱਚ.ਓ. ਸਿਕੰਦਰ ਸਿੰਘ ਵਿਰਕ ਦਾ ਕਹਿਣਾ ਹੈ ਕਿ ਪੁਲਿਸ ਜਾਂਚ ਕਰ ਰਹੀ ਹੈ | ਜੋ ਵੀ ਦੋਸ਼ੀ ਹੋਵੇਗਾ ਬਖ਼ਸ਼ਿਆ ਨਹੀਂ ਜਾਵੇਗਾ |
