ਨਸ਼ਾ ਤਸਕਰ ਦੇ ਢਾਹੇ ਛੱਪਰ, ਨਗਰ ਪੰਚਾਇਤ ਦੇ ਛੱਪੜ 'ਤੇ ਕੀਤਾ ਸੀ ਨਾਜਾਇਜ਼ ਕਬਜ਼ਾ

ਅ

ਅਜੀਤ ਡੈਸਕ 01-11-2025

ਭੀਖੀ, 31 ਅਕਤੂਬਰ (ਬਲਕਾਰ ਸਿੰਘ ਸਹੋਤਾ)- ਪ੍ਰਸ਼ਾਸਨ ਵਲੋਂ ਯੁੱਧ ਨਸ਼ਿਆਂ ਵਿਰੁੱਧ ਮੁਹਿੰਮ ਤਹਿਤ ਸਥਾਨਕ ਗੁਰਦੁਆਰਾ ਸਾਹਿਬ ਰੋਡ 'ਤੇ ਨਗਰ ਪੰਚਾਇਤ ਦੀ ਮਾਲਕੀ ਵਾਲੇ ਪੰਡਿਤਾਂ ਵਾਲੇ ਛੱਪੜ ਦੀ ਜ਼ਮੀਨ 'ਤੇ ਇਕ ਨਸ਼ਾ ਤਸਕਰ 'ਤੇ ਕਾਰਵਾਈ ਕਰਦੇ ਹੋਏ ਐਸ. ਡੀ. ਐਮ. ਮਾਨਸਾ ਕਾਲਾ ਰਾਮ ਕਾਂਸਲ ਦੀ ਅਗਵਾਈ ਵਿਚ ਪੁਲਿਸ ਪ੍ਰਸ਼ਾਸਨ ਦੇ ਸਹਿਯੋਗ ਨਾਲ ਕੀਤੇ ਨਾਜਾਇਜ਼ ਕਬਜ਼ੇ ਨੂੰ ਹਟਾਇਆ ਗਿਆ | ਕਾਬਲੇ ਜਿਕਰ ਰਹੇ ਕਿ ਪ੍ਰਸ਼ਾਸਨ ਵਲੋਂ ਉਸ ਦਾ ਮਕਾਨ ਢਾਹੁਣ ਦੀ ਜਗ੍ਹਾ ਸਿਰਫ਼ ਉਸਾਰੇ ਛੱਪਰਾਂ ਨੂੰ ਢਾਹ ਕੇ ਹੀ ਬੁੱਤਾ ਸਾਰ ਦਿੱਤਾ ਗਿਆ ਜਦੋਂ ਪੱਕਾ ਮਕਾਨ ਖੜ੍ਹਾ ਰਹਿਣ ਦਿੱਤਾ ਗਿਆ | 66 ਕਨਾਲ ਰਕਬੇ ਵਾਲੇ ਇਸ ਛੱਪੜ ਦੀ ਜ਼ਮੀਨ 'ਤੇ ਜਿੱਥੇ ਵੱਖ-ਵੱਖ ਧਾਰਮਿਕ ਸੰਸਥਾਵਾਂ ਵਲੋਂ ਨਾਜਾਇਜ਼ ਕਬਜ਼ੇ ਕੀਤੇ ਹੋਏ ਹਨ ਉੱਥੇ ਨਸ਼ਾ ਤਸਕਰੀ ਦੇ ਕੰਮ ਵਿਚ ਲੱਗੇ ਇਕ ਵਿਸ਼ੇਸ਼ ਬਰਾਦਰੀ ਦੇ ਕੁਝ ਵਿਅਕਤੀਆਂ ਵਲੋਂ ਵੀ ਨਾਜਾਇਜ਼ ਕਬਜ਼ੇ ਕੀਤੇ ਹੋਏ ਹਨ | ਹੈਰਾਨੀ ਦੀ ਗੱਲ ਇਹ ਵੀ ਹੈ ਕਿ ਛੱਪੜ ਦੀ ਜ਼ਮੀਨ 'ਤੇ ਉਸਾਰੇ ਨਾਜਾਇਜ਼ ਘਰਾਂ ਵਿਚ ਕਈ ਜਗ੍ਹਾ 'ਤੇ ਵਾਟਰ ਸਪਲਾਈ ਅਤੇ ਸੀਵਰੇਜ ਦੀਆਂ ਪਾਈਪ ਲਾਈਨਾਂ ਦੇ ਨਾਲ-ਨਾਲ ਬਿਜਲੀ ਦੇ ਕੁਨੈਕਸ਼ਨ ਵੀ ਦਿੱਤੇ ਹੋਏ ਹਨ, ਉਸ ਵੇਲੇੇ ਪ੍ਰਸ਼ਾਸਨ ਕੁੰਭਕਰਨੀ ਨੀਂਦ ਸੁੱਤਾ ਰਿਹਾ | ਅੱਜ ਕੀਤੀ ਕਾਰਵਾਈ ਸਮੇਂ ਐਸ. ਡੀ. ਐਮ. ਨੇ ਦੱਸਿਆ ਕਿ ਨਗਰ ਪੰਚਾਇਤ ਭੀਖੀ ਵਲੋਂ ਸ਼ਿਕਾਇਤ ਪ੍ਰਾਪਤ ਹੋਈ ਸੀ, ਜਿਸ ਤਹਿਤ ਇਹ ਕਾਰਵਾਈ ਕੀਤੀ ਗਈ | ਉਨ੍ਹਾਂ ਦੱਸਿਆ ਕਿ ਨਾਜਾਇਜ਼ ਕਬਜ਼ਾਧਾਰੀ ਪਰਮਜੀਤ ਸਿੰਘ ਪੰਮੀ ਨੇ ਨਗਰ ਪੰਚਾਇਤ ਦੀ 9 ਵਿਸਵੇ ਜਗ੍ਹਾ 'ਤੇ ਕਬਜ਼ਾ ਕੀਤਾ ਹੋਇਆ ਹੈ ਅਤੇ ਉਸ'ਤੇ ਐਨ.ਡੀ.ਪੀ.ਐਸ. 8 ਤੋਂ ਇਲਾਵਾ 2 ਵਪਾਰਕ ਮਾਮਲੇ ਵੀ ਦਰਜ ਹਨ, ਜਿਸ 'ਤੇ ਕਾਰਵਾਈ ਕਰਦਿਆਂ ਅੱਜ ਉਸ ਕੋਲੋਂ ਨਗਰ ਪੰਚਾਇਤ ਦੀ ਜ਼ਮੀਨ ਕਬਜ਼ਾ ਮੁਕਤ ਕਰਵਾਈ ਗਈ ਹੈ | ਉੱਧਰ ਐਸ.ਪੀ. ਮਨਮੋਹਨ ਸਿੰਘ ਔਲਖ ਨੇ ਕਿਹਾ ਕਿ ਨਸ਼ੇ ਦੇ ਕਾਰੋਬਾਰ 'ਚ ਲਿਪਤ ਕਿਸੇ ਵੀ ਅਨਸਰ ਨੂੰ ਬਖ਼ਸ਼ਿਆ ਨਹੀਂ ਜਾਵੇਗਾ | ਇਸ ਮੌਕੇ ਡਿਊਟੀ ਮੈਜਿਸਟ੍ਰੇਟ ਨਾਇਬ ਤਹਿਸੀਲਦਾਰ ਸੁਖਮਨਿੰਦਰ ਸਿੰਘ, ਡੀ.ਐਸ.ਪੀ ਪਿ੍ਤਪਾਲ ਸਿੰਘ, ਥਾਣਾ ਮੁਖੀ ਭੀਖੀ ਸੁਖਜੀਤ ਸਿੰਘ, ਕਾਰਜ ਸਾਧਕ ਅਫ਼ਸਰ ਕੁਲਦੀਪ ਸਿੰਘ ਧਾਲੀਵਾਲ ਆਦਿ ਹਾਜ਼ਰ ਸਨ |
ਨਗਰ ਪੰਚਾਇਤ ਪ੍ਰਧਾਨ ਅਤੇ ਕੌਂਸਲਰ ਰਹੇ ਨਦਾਰਦ
ਪੁਲਿਸ ਅਤੇ ਸਿਵਲ ਪ੍ਰਸ਼ਾਸਨ ਵਲੋਂ ਕੀਤੀ ਕਾਰਵਾਈ ਵਿਚ ਭਾਵੇਂ ਐਸ. ਡੀ. ਐਮ. ਸਮੇਤ ਕਈ ਸੀਨੀਅਰ ਅਧਿਕਾਰੀ ਮੌਜੂਦ ਸਨ ਪ੍ਰੰਤੂ ਨਗਰ ਪੰਚਾਇਤ ਲਈ ਨਾਗਰਿਕਾਂ ਵਲੋਂ ਚੁਣੇ ਲੋਕ ਨੁਮਾਇੰਦੇ (ਕੌਂਸਲਰ) ਵਿਚੋਂ ਪ੍ਰਧਾਨ ਸਮੇਤ ਕੌਂਸਲਰ ਨਦਾਰਦ ਰਹੇ ਜਦੋਂ ਕਿ ਛੱਪੜ ਦੀ ਜ਼ਮੀਨ 'ਤੋਂ ਕਬਜ਼ਾ ਹਟਾਉਣ ਦੀ ਕਾਰਵਾਈ ਕਿਤੇ ਨਾ ਕਿਤੇ ਨਗਰ ਹਿੱਤ ਹੈ, ਵੀ ਚਰਚਾ ਦਾ ਵਿਸ਼ਾ ਰਹੀ | ਦੱਸਣਯੋਗ ਹੈ ਕਿ ਜਦੋਂ ਤੋਂ ਨਗਰ ਪੰਚਾਇਤ ਹੋਂਦ ਵਿਚ ਆਈ ਹੈ ਉਦੋਂ ਤੋਂ ਨਗਰ ਦੇ ਗੈਰ ਮੁਮਕਿਨ ਅਤੇ ਲਾਲ ਡੋਰੇ ਅਧੀਨ ਆਉਂਦੇ ਛੱਪੜਾਂ 'ਤੇ ਥੋਕ ਵਿਚ ਕਬਜ਼ੇ ਹੋਏ ਹਨ, ਜਿਨ੍ਹਾਂ ਵਿਚ ਨਿਰੰਤਰਤਾ ਹਾਲੇ ਵੀ ਜਾਰੀ ਹੈ | ਜਾਗਰੂਕ ਸ਼ਹਿਰੀਆਂ ਦਾ ਕਹਿਣਾ ਹੈ ਕਿ ਇਹ ਨਗਰ ਦੀ ਬਦਕਿਸਮਤੀ ਹੈ ਕਿ ਕੁਝ ਲੋਕਾਂ ਨੇ ਸਿਆਸੀ ਸ਼ਹਿ 'ਤੇ ਵੱਖ ਵੱਖ ਛੱਪੜਾਂ ਦੀਆਂ ਜ਼ਮੀਨਾਂ 'ਤੇ ਨਾਜਾਇਜ਼ ਕਬਜ਼ੇ ਕੀਤੇ ਹੋਏ ਹਨ ਅਤੇ ਹੁਣ ਯੁੱਧ ਨਸ਼ਿਆਂ ਵਿਰੁੱਧ ਮੁਹਿੰਮ ਤਹਿਤ ਜੇਕਰ ਪੁਲਿਸ ਅਤੇ ਪ੍ਰਸ਼ਾਸਨ ਵਿਭਾਗ ਕਾਰਵਾਈ ਕਰਕੇ ਨਾਜਾਇਜ਼ ਕਬਜ਼ੇ ਹਟਾਉਂਦਾ ਹੈ ਤਾਂ ਨਗਰ ਪੰਚਾਇਤ ਦਾ ਨੈਤਿਕ ਫ਼ਰਜ਼ ਹੈ ਕਿ ਉਹ ਤੁਰੰਤ ਇਸ ਜ਼ਮੀਨ ਨੂੰ ਆਪਣੇ ਕਬਜ਼ੇ ਵਿਚ ਲਵੇ |

ਨਸ਼ਾ ਤਸਕਰ ਦੇ ਢਾਹੇ ਛੱਪਰ, ਨਗਰ ਪੰਚਾਇਤ ਦੇ ਛੱਪੜ 'ਤੇ ਕੀਤਾ ਸੀ ਨਾਜਾਇਜ਼ ਕਬਜ਼ਾ

ਸੰਬੰਧਿਤ ਖ਼ਬਰਾਂ