ਲਾਲ ਕਿਲ੍ਹਾ ਧਮਾਕਾ ਅਲ-ਕਾਇਦਾ ਵਲੋਂ ਕੀਤਾ ਗਿਆ ਸੀ-ਸੰਯੁਕਤ ਰਾਸ਼ਟਰ ਰਿਪੋਰਟ

ਸੰਯੁਕਤ ਰਾਸ਼ਟਰ, 13 ਅਗਸਤ (ਪੀ.ਟੀ.ਆਈ)-ਸੰਯੁਕਤ ਰਾਸ਼ਟਰ ਸੁਰੱਖਿਆ ਪ੍ਰੀਸ਼ਦ ਦੀ ਅੱਤਵਾਦ ਵਿਰੋਧੀ ਪਾਬੰਦੀਆਂ ਦੀ ਨਿਗਰਾਨੀ ਕਰਨ ਵਾਲੀ ਸੰਸਥਾ ਦੀ ਇੱਕ ਨਵੀਂ ਰਿਪੋਰਟ ਦੇ ਅਨੁਸਾਰ ਪਿਛਲੇ ਸਾਲ ਨਵੰਬਰ ਵਿਚ ਨਵੀਂ ਦਿੱਲੀ ’ਚ ਲਾਲ ਕਿਲ੍ਹੇ ਨੇੜੇ ਅੱਤਵਾਦੀ ਹਮਲਾ ਭਾਰਤੀ ਉਪ-ਮਹਾਂਦੀਪ ਵਿਚ ਅਲ-ਕਾਇਦਾ (ਅਲ-ਕਾਇਦਾ ਇਨ ਦਿ ਇੰਡੀਅਨ ਸਬਕੌਂਟੀਨੈਂਟ, ਏ.ਕਿਊ.ਆਈ.ਐਸ) ਵਲੋਂ ਕੀਤਾ ਗਿਆ ਸੀ। ਇਹ ਖੁਲਾਸਾ ਇਸ ਘਾਤਕ ਹਮਲੇ ਲਈ ਅਲ-ਕਾਇਦਾ ਦੀ ਸ਼ਾਖਾ ਨੂੰ ਸਪਸ਼ਟ ਅੰਤਰਰਾਸ਼ਟਰੀ ਜ਼ਿੰਮੇਵਾਰੀ ਪ੍ਰਦਾਨ ਕਰਦਾ ਹੈ ਅਤੇ ਖੇਤਰ ਵਿਚ ਵਧੇਰੇ ਵਿਕੇਂਦਰੀਕ੍ਰਿਤ ਅੱਤਵਾਦੀ ਢਾਂਚੇ ਦੇ ਉਭਾਰ ਨੂੰ ਰੇਖਾਂਕਿਤ ਕਰਦਾ ਹੈ। ਆਈ.ਐਸ.ਆਈ.ਐਲ. (ਡਾਇਸ਼), ਅਲ-ਕਾਇਦਾ ਅਤੇ ਸੰਬੰਧਿਤ ਵਿਅਕਤੀਆਂ ਅਤੇ ਸੰਸਥਾਵਾਂ ਬਾਰੇ ਯੂ.ਐਨ.ਐਸ.ਸੀ. ’ਚ ਪੇਸ਼ ਕੀਤੀ ਗਈ ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਏ.ਕਿਊ.ਆਈ.ਐਸ ਇੱਕ ਖੇਤਰੀ ਅੱਤਵਾਦੀ ਸੰਗਠਨ ਬਣ ਗਿਆ ਹੈ। ਜਿਸ ਨੇ ਵਿੱਤੀ ਅਤੇ ਲੌਜਿਸਟਿਕ ਨੈੱਟਵਰਕ ਸਥਾਪਿਤ ਕੀਤੇ ਹਨ ਅਤੇ ਵੱਡੇ ਸਮੂਹਾਂ ਦੀ ਬਜਾਏ ਛੋਟੇ ਅਤੇ ਵਿਕੇਂਦਰੀਕ੍ਰਿਤ ਸਮੂਹਾਂ ਦੇ ਰੂਪ ’ਚ ਕੰਮ ਕਰ ਰਿਹਾ ਹੈ। ਨਵੰਬਰ 2025 ਵਿਚ ਲਾਲ ਕਿਲ੍ਹੇ ਨੇੜੇ ਹੋਏ ਇਸ ਧਮਾਕੇ ਵਿਚ ਘੱਟੋ-ਘੱਟ 15 ਲੋਕ ਮਾਰੇ ਗਏ ਸਨ ਅਤੇ ਇੱਕ ਦਰਜਨ ਤੋਂ ਵੱਧ ਜ਼ਖ਼ਮੀ ਹੋ ਗਏ ਸਨ।