ਦੱਖਣੀ ਯਮਨ ’ਚ ਹੂਤੀ ਬਾਗੀਆਂ ਵਲੋਂ ਸਰਕਾਰੀ ਫੌਜੀ ਕੈਂਪ ’ਤੇ ਹਮਲਾ-53 ਹਲਾਕ

ਕਾਹਿਰਾ, 19 ਅਕਤੂਬਰ (ਏਜੰਸੀ)-ਸ਼ਬਵਾ ਸੂਬੇ ਦੇ ਅਧਿਕਾਰੀਆਂ ਨੇ ਸੋਮਵਾਰ ਨੂੰ ਦੱਸਿਆ ਕਿ ਈਰਾਨ-ਸਮਰਥਿਤ ਹੂਤੀ ਬਾਗੀਆਂ ਨੇ ਦੱਖਣੀ ਯਮਨ ’ਚ ਸਰਕਾਰੀ ਫੌਜਾਂ ਦੇ ਇਕ ਫੌਜੀ ਕੈਂਪ ’ਤੇ ਹਮਲਾ ਕੀਤਾ, ਜਿਸ ਵਿਚ ਘੱਟੋ-ਘੱਟ 53 ਸੈਨਿਕ ਮਾਰੇ ਗਏ। ਹਾਲ ਹੀ ’ਚ ਵਧੀ ਲੜਾਈ ਦੌਰਾਨ ਇਹ ਸਭ ਤੋਂ ਘਾਤਕ ਹਮਲਿਆਂ ਵਿੱਚੋਂ ਇਕ ਹੈ। ਸ਼ਬਵਾ ਸੂਬਾਈ ਸਰਕਾਰ ਨੇ ਦੱਸਿਆ ਕਿ ਬਾਗੀਆਂ ਨੇ ਦੱਖਣੀ ਸੂਬੇ ਸ਼ਬਵਾ ’ਚ ਸਥਿਤ ‘ਅਲ-ਆਲਮ’ ਫੌਜੀ ਕੈਂਪ ’ਤੇ ਤਿੰਨ ਬੈਲਿਸਟਿਕ ਮਿਜ਼ਾਈਲਾਂ ਦਾਗੀਆਂ। ਇਸ ਹਮਲੇ ’ਚ 200 ਨਵੇਂ ਭਰਤੀ ਹੋਏ ਸੈਨਿਕ ਜ਼ਖਮੀ ਵੀ ਹੋਏ ਹਨ। ਈਰਾਨ-ਸਮਰਥਿਤ ਬਾਗੀਆਂ ਨੇ ਸ਼ਬਵਾ ’ਚ ਇਸ ਫੌਜੀ ਕੈਂਪ ਨੂੰ ਨਿਸ਼ਾਨਾ ਬਣਾਉਣ ਦੀ ਗੱਲ ਸਵੀਕਾਰ ਕੀਤੀ ਹੈ।