ਗੜ੍ਹਸ਼ੰਕਰ, 26 ਅਪ੍ਰੈਲ (ਧਾਲੀਵਾਲ)-ਗੜ੍ਹਸ਼ੰਕਰ ਸ਼ਹਿਰ ਵਿਚ ਸੀਵਰੇਜ ਦੀਆਂ ਪਾਈਪਾਂ ਪਾਉਣ ਦਾ ਚੱਲ ਰਿਹਾ ਕਾਰਜ ਕਦੋਂ ਮੁਕੰਮਲ ਹੋਵੇਗਾ ਤਾਂ ਇਸ ਨਾਲ ਸ਼ਹਿਰ ਵਾਸੀਆਂ ਨੂੰ ਕਿੰਨੀ ਕੁ ਸਹੂਲਤ ਮਿਲੇਗੀ, ਇਹ ਤਾਂ ਭਵਿੱਖ ਵਿਚ ਹੀ ਸਪਸ਼ਟ ਹੋ ਸਕੇਗਾ | ਪਰ ਫ਼ਿਲਹਾਲ ਸੀਵਰੇਜ ਪਾਉਣ ਲਈ ਸ਼ਹਿਰ ਦੀਆਂ ਧੜਾ-ਧੜ ਪੁੱਟੀਆਂ ਜਾ ਰਹੀਆਂ ਸੜਕਾਂ ਤੋਂ ਉੱਡ ਰਹੀ ਧੂੜ ਨੇ ਦੁਕਾਨਦਾਰਾਂ ਅਤੇ ਰਾਹਗੀਰਾਂ ਦੇ ਨੱਕ ਵਿਚ ਦਮ ਕੀਤਾ ਹੋਇਆ ਹੈ | ਪਿਛਲੇ ਕੁੱਝ ਦਿਨਾਂ ਤੋਂ ਸ਼ਹਿਰ ਦੇ ਨੰਗਲ ਚੌਂਕ 'ਚ ਸੀਵਰੇਜ ਪਾਈਪਾਂ ਪਾਉਣ ਲਈ ਪੁੱਟੀ ਹੋਈ ਸੜਕ ਤੋਂ ਉੱਡ ਰਹੀ ਧੂੜ ਨੇ ਆਸ-ਪਾਸ ਦੇ ਦੁਕਾਨਦਾਰਾਂ ਦੇ ਮੰਦੇ ਹਾਲ ਕੀਤੇ ਹੋਏ ਹਨ | ਅੱਤ ਦੀ ਗਰਮੀ ਦੌਰਾਨ ਚੌਂਕ ਵਿਚੋਂ ਉੱਡ ਰਹੀ ਧੂੜ ਲਗਾਤਾਰ ਦੁਕਾਨਾਂ ਨੂੰ ਪ੍ਰਭਾਵਿਤ ਕਰ ਰਹੀ ਹੈ | ਰਾਹਗੀਰਾਂ ਦਾ ਵੀ ਉੱਡ ਰਹੀ ਧੂੜ ਵਿਚੋਂ ਲੰਘਣਾ ਮੁਹਾਲ ਹੋਇਆ ਪਿਆ ਹੈ | ਧੂੜ ਤੋਂ ਬਚਣ ਲਈ ਦੁਕਾਨਦਾਰਾਂ ਵਲੋਂ ਚੌਂਕ ਵਿਚ ਪਾਣੀ ਦਾ ਛਿੜਕਾਅ ਕਰਕੇ ਧੂੜ 'ਤੇ ਕਾਬੂ ਪਾਉਣ ਦਾ ਕੀਤਾ ਜਾ ਰਿਹਾ ਯਤਨ ਵੀ ਕੁੱਝ ਸਮੇਂ ਤੋਂ ਬਾਅਦ ਬੇਅਸਰ ਜਾਪ ਰਿਹਾ ਹੈ | ਇੱਥੇ ਦੁਪਹਿਰ ਸਮੇਂ ਹਾਲਾਤ ਬਦ ਤੋਂ ਬਦਤਰ ਹੋਏ ਵੇਖਣ ਨੂੰ ਮਿਲਦੇ ਹਨ | ਪ੍ਰਸ਼ਾਸਨ ਇਸ ਮਾਮਲੇ 'ਚ ਕੁੱਝ ਵੀ ਕਰਨ ਤੋਂ ਨਾਕਾਮ ਜਾਪ ਰਿਹਾ ਹੈ | ਦੁਕਾਨਦਾਰਾਂ ਦੀ ਮੰਗ ਹੈ ਕਿ ਚੌਂਕ ਵਿਚ ਪਈ ਮਿੱਟੀ ਨੂੰ ਤੁਰੰਤ ਹਟਾਇਆ ਜਾਵੇਗਾ ਤੇ ਕੰਮ ਮੁਕੰਮਲ ਹੋਣ ਤੱਕ ਸਮੇਂ ਸਮੇਂ 'ਤੇ ਪਾਣੀ ਦਾ ਛਿੜਕਾਅ ਕੀਤਾ ਜਾਵੇ |
