ਮਾਹਿਲਪੁਰ, 11 ਮਈ (ਰਜਿੰਦਰ ਸਿੰਘ)-ਬੀਤੀ ਦੇਰ ਰਾਤ ਮਾਹਿਲਪੁਰ ਵਿਖੇ ਫਗਵਾੜਾ ਰੋਡ 'ਤੇ ਇਕ ਮੋਟਰਸਾਈਕਲ 'ਤੇ ਸਵਾਰ ਪਿਉ-ਪੁੱਤ ਸੜਕ 'ਤੇ ਡਿੱਗੀਆਂ ਤਾਰਾ ਦੀ ਲਪੇਟ 'ਚ ਆਉਣ ਨਾਲ ਪਿਤਾ ਦੀ ਮੌਤ ਹੋ ਗਈ ਜਦ ਕਿ ਪੁੱਤਰ ਜ਼ਖ਼ਮੀ ਹੋ ਗਿਆ | ਜਾਣਕਾਰੀ ਅਨੁਸਾਰ ਪਿੰਡ ਨੰਗਲ ਖਿਡਾਰੀਆਂ ਦੇ ਵਾਸੀ ਪਵਨ ਕੁਮਾਰ ਉਰਫ਼ ਮੋਹਿਤ ਨੇ ਦੱਸਿਆ ਕਿ ਉਹ ਤੇ ਉਸ ਪਿਤਾ ਗੁਰਮੀਤ ਚੰਦ ਮਾਹਿਲਪੁਰ ਵਿਖੇ ਸੈਲੂਨ ਦੀ ਦੁਕਾਨ ਕਰਦੇ ਹਨ ਤੇ ਬੀਤੀ ਰਾਤ ਕਰੀਬ 11 ਵਜੇ ਦੇ ਕਰੀਬ ਉਹ ਆਪਣੇ ਮੋਟਰ ਸਾਈਕਲ ਪੀ. ਬੀ. 07.ਬੀ.ਜ਼ੈਡ. 6297 'ਤੇ ਆਪਣੇ ਪਿੰਡ ਨੂੰ ਵਾਪਸ ਜਾ ਰਹੇ ਸਨ | ਉਸ ਨੇ ਦੱਸਿਆ ਕਿ ਉਹ ਅਜੇ ਥੋੜੀ ਹੀ ਦੂਰ ਗਏ ਸਨ ਉਨ੍ਹਾਂ ਦਾ ਮੋਟਰਸਾਈਕਲ ਅਚਾਨਕ ਸੜਕ 'ਤੇ ਡਿੱਗੀਆਂ ਤਾਰਾਂ ਦੀ ਲਪੇਟ 'ਚ ਆ ਗਿਆ ਤੇ ਉਹ ਸੜਕ 'ਤੇ ਡਿਗ ਪਏ ਤੇ ਜ਼ਖ਼ਮੀ ਹੋ ਗਏ | ਉਸ ਨੇ ਉਨ੍ਹਾਂ ਨੂੰ ਸਿਵਲ ਹਸਪਤਾਲ ਮਾਹਿਲਪੁਰ ਵਿਖੇ ਲਿਆਂਦਾ ਜਿਥੇ ਉਸ ਦੇ ਪਿਤਾ ਗੁਰਮੀਤ ਚੰਦ ਦੀ ਹਾਲਤ ਜ਼ਿਆਦਾ ਗੰਭੀਰ ਹੋਣ ਕਰਕੇ ਡਾਕਟਰਾਂ ਨੇ ਸਿਵਲ ਹਸਪਤਾਲ ਹੁਸ਼ਿਆਰਪੁਰ ਵਿਖੇ ਰੈਫ਼ਰ ਕਰ ਦਿੱਤਾ ਉਸ ਦੇ ਪਿਤਾ ਦੀ ਰਸਤੇ 'ਚ ਮੌਤ ਹੋ ਗਈ | ਤਾਰਾਂ ਸੰਬੰਧੀ ਰਵਿੰਦਰ ਸਿੰਘ ਐਸ. ਡੀ. ਓ. ਮਾਹਿਲਪੁਰ ਦੱਸਿਆ ਕਿ ਤਾਰਾਂ ਬਿਜਲੀ ਦੀਆਂ ਨਹੀਂ ਸਨ | ਥਾਣਾ ਮੁਖੀ ਰਮਨਦੀਪ ਕੌਰ ਨੇ ਦੱਸਿਆ ਕਿ ਇਹ ਤਾਰਾਂ ਉਥੇ ਦੇ ਦੁਕਾਨਦਾਰਾਂ ਦੇ ਜਰਨੇਟਰ ਤੇ ਹੋਰ ਕੇਬਲ ਦੀਆਂ ਸਨ | ਉਨ੍ਹਾਂ ਦੱਸਿਆ ਕਿ ਉਹ ਇਸ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ |
