ਮੁੱਲਾਂਪੁਰ-ਦਾਖਾ, 3 ਜਨਵਰੀ (ਨਿਰਮਲ ਸਿੰਘ ਧਾਲੀਵਾਲ)-ਕੜਾਕੇ ਦੀ ਠੰਡ ਅਤੇ ਧੁੰਦ ਕਾਰਨ ਜਨ ਜੀਵਨ ਪ੍ਰਭਾਵਿਤ ਹੋਇਆ ਪਿਆ, ਠੰਡ ਕਰਕੇ ਅੱਜ ਪੂਰਾ ਦਿਨ ਸੂਰਜ ਨਹੀਂ ਚਮਕਿਆ, ਚਮਕਦਾ ਵੀ ਕਿਵੇਂ ਤਾਪਮਾਨ ਘੱਟੋ-ਘੱਟ 7.8 ਡਿਗਰੀ ਸੈਲਸੀਅਸ ਤੱਕ ਚਲਾ ਗਿਆ | ਠੰਡ ਨਾਲ ਜਨ ਜੀਵਨ ਪ੍ਰਭਾਵਿਤ ਹੋਣ ਕਰਕੇ ਨਿੱਤ ਦੇ ਕੰਮ ਰੁਕ ਗਏ | ਅਜਿਹੇ ਮੌਸਮ 'ਚ ਸਭ ਨਾਲੋਂ ਵੱਧ ਕਿਰਤੀ ਵਰਗ ਮਜ਼ਦੂਰਾਂ ਨੂੰ ਮੁਸ਼ਕਿਲਾ ਦਾ ਸਾਹਮਣਾ ਕਰਨਾ ਪੈ ਰਿਹਾ | ਠੰਡ ਅਤੇ ਧੁੰਦ ਕਰਕੇ ਸੜਕੀ ਆਵਾਜਾਈ ਕਾਫੀ ਘਟੀ ਕਿਉਂਕਿ ਬੱਦਲਵਾਈ ਨਾਲ ਬਿਜੀਵਿਲਟੀ ਕਾਫੀ ਘੱਟ ਸੀ | ਠੰਡ ਕਰਕੇ ਵਧੀ ਕੋਰੇ ਦੀ ਤੀਬਰਤਾ ਨਾਲ ਹਰਾ ਚਾਰਾ, ਸਬਜ਼ੀਆਂ ਦਬ ਕੇ ਰਹਿ ਗਈਆ | ਮੌਸਮ ਵਿਭਾਗ ਵਲੋਂ ਪਹਿਲਾਂ ਹੀ ਯੈਲੋ ਅਲਰਟ ਹੋਣ ਕਰਕੇ ਰਾਜ ਭਰ 'ਚ ਸਕੂਲ ਭਾਵੇਂ ਬੰਦ ਹਨ, ਪਰ ਆਮ ਲੋਕਾਂ ਦਾ ਠੰਡੀਆਂ ਹਵਾਵਾਂ ਸੀਨਾ ਚੀਰ ਰਹੀਆਂ ਹਨ | ਡੇਅਰੀ ਕਾਰੋਬਾਰੀਆਂ ਲਈ ਦੂਹਰੀ ਮਾਰ ਹੈ | ਕੜਾਕੇ ਦੀ ਠੰਡ 'ਚ ਪਸ਼ੂ ਪਾਲਕਾਂ ਲਈ ਜਿੱਥੇ ਪਸ਼ੂਆਂ ਦੀ ਸੰਭਾਲ ਜੀ-ਜੰਜਾਲ ਬਣੀ ਪਈ ਹੈ, ਉੱਥੇ ਭਾਰੀ ਠੰਡ 'ਚ ਸਵੇਰ-ਸ਼ਾਮ ਬਿਜਲੀ ਕੱਟ ਸਭ ਨਾਲੋਂ ਵੱਧ ਪਸ਼ੂ ਪਾਲਕਾਂ ਲਈ ਸਿਰਦਰਦੀ ਬਣ ਗਏ | ਦੁੱਧ ਚੁਆਈ ਦੇ ਸਮੇਂ ਬੱਤੀ ਗੁੱਲ ਹੋਣ ਕਰਕੇ ਪਸ਼ੂ ਪਾਲਕਾਂ ਨੂੰ ਮਹਿੰਗਾ ਭਾਅ ਜਰਨੇਟਰਾਂ 'ਤੇ ਡੀਜ਼ਲ ਫੂਕਣਾ ਪੈ ਰਿਹਾ |
