ਮੁੱਲਾਂਪੁਰ-ਦਾਖਾ, 3 ਜਨਵਰੀ (ਨਿਰਮਲ ਸਿੰਘ ਧਾਲੀਵਾਲ)-ਭਾਜਪਾ ਦੀ ਕੇਂਦਰ ਸਰਕਾਰ ਮਗਨਰੇਗਾ ਯੋਜਨਾ ਨਾਲ ਛੇੜ-ਛਾੜ ਕਰਕੇ ਗਰੀਬ ਪਰਿਵਾਰ ਖਾਸਕਰ ਪਛੜੀਆਂ ਸ਼੍ਰੇਣੀਆਂ ਨੂੰ ਉਨ੍ਹਾਂ ਦੇ ਅਧਿਕਾਰ ਤੋ ਵਾਂਝਾ ਕਰ ਰਹੀ ਹੈ, ਇਹ ਪ੍ਰਗਟਾਵਾ ਐੱਸ.ਸੀ-ਬੀ.ਸੀ ਭਲਾਈ ਮੰਚ ਪਮਾਲ ਦੀ ਹੋਈ ਮੀਟਿੰਗ 'ਚ ਰਿਟਾ: ਜ਼ਿਲ੍ਹਾ ਲੋਕ ਸੰਪਰਕ ਅਫ਼ਸਰ ਜਤਿੰਦਰ ਸਿੰਘ ਪਮਾਲ ਵਲੋਂ ਕੀਤਾ | ਪਮਾਲ ਨੇ ਕਿਹਾ ਕਿ ਕੇਂਦਰ ਸਰਕਾਰ ਦਾ ਮੁੱਢ ਤੋਂ ਰਵੱਈਆ ਘੱਟ ਗਿਣਤੀਆਂ ਨੂੰ ਕਮਜ਼ੋਰ ਕਰਨ ਵਾਲਾ ਰਿਹਾ | ਉਨ੍ਹਾਂ ਦੱਸਿਆ ਕਿ 3 ਖੇਤੀ ਕਾਨੂੰਨਾਂ ਵਾਲੀ ਕਿਸਾਨ-ਮਜ਼ਦੂਰ ਵਲੋਂ ਲੜੀ ਗਈ ਜੰਗ ਵਾਲੀਆ ਖ਼ਬਰਾਂ ਦੀ ਅਜੇ ਸਿਹਾਈ ਨਹੀਂ ਸੁੱਕੀ, ਜਦ ਨੂੰ ਕੇਂਦਰ ਸਰਕਾਰ ਨੇ ਮਗਨਰੇਗਾ ਤੋੜਨ ਦਾ ਫ਼ੈਸਲਾ ਕਰ ਲਿਆ | ਪਮਾਲ ਨੇ ਦੱਸਿਆ ਕਿ ਭਾਰਤ ਰੁਜ਼ਗਾਰ ਐਂਡ ਆਜੀਵਿਕਾ ਮਿਸ਼ਨ ਗ੍ਰਾਮੀਣ (ਵੀ.ਬੀ.ਜੀ ਰਾਮ ਜੀ) ਪਾਸ ਕਰਕੇ ਕੇਂਦਰ ਨੇ ਆਪਣਾ ਬੋਝ ਘਟਾਉਂਦਿਆਂ ਰਾਜ ਸਰਕਾਰਾਂ ਨੂੰ 60:40 ਵਿਚ ਸ਼ਾਮਿਲ ਕਰ ਲਿਆ | ਉਨ੍ਹਾਂ ਦੱਸਿਆ ਕਿ ਗਰੀਬ ਪਰਿਵਾਰਾਂ ਦੇ ਮਜ਼ਦੂਰਾਂ ਲਈ ਨੁਕਸਾਨ ਦੇਹ (ਵੀ.ਬੀ.ਜੀ ਰਾਮ ਜੀ) ਸਕੀਮ ਦਾ ਤਿੱਖਾ ਵਿਰੋਧ ਹੋਵੇਗਾ | ਜਤਿੰਦਰ ਸਿੰਘ ਪਮਾਲ ਨੇ ਕਿਸਾਨਾਂ ਨੂੰ ਵੀ ਅਪੀਲ ਕੀਤੀ ਕਿ 3 ਕਾਲੇ ਖੇਤੀ ਕਾਨੂੰਨਾਂ ਵਾਲੀ ਜੰਗ ਕਿਸਾਨ-ਖੇਤ ਮਜ਼ਦੂਰਾਂ ਇਕੱਠਿਆਂ ਲੜੀ, ਹੁਣ ਮਗਨਰੇਗਾ ਮਜ਼ਦੂਰਾਂ ਦੇ ਹੱਕ ਬਹਾਲ ਲਈ ਸ਼ੁਰੂ ਜੰਗ ਵਿਚ ਕਿਸਾਨਾਂ ਨੂੰ ਮਜ਼ਦੂਰਾਂ ਨਾਲ ਖੜ੍ਹਨਾ ਚਾਹੀਦਾ | ਪਮਾਲ 'ਚ ਮੀਟਿੰਗ ਸਮੇਂ ਦਰਸ਼ਨ ਸਿੰਘ, ਮੋਹਣ ਸਿੰਘ, ਹਰਦੇਵ ਸਿੰਘ, ਬਾਬਾ ਬਿੱਕਰ ਸਿੰਘ, ਪਿਆਰਾ ਸਿੰਘ, ਹਰਜਿੰਦਰ ਸਿੰਘ, ਚਰਨ ਸਿੰਘ, ਬਲਦੇਵ ਸਿੰਘ, ਤੇਗ ਸਿੰਘ, ਤਰਸੇਮ ਸਿੰਘ, ਹਰਜਿੰਦਰ ਸਿੰਘ, ਬਲਵੰਤ ਸਿੰਘ, ਸੁਖਪਾਲ ਸਿੰਘ, ਰਾਮ ਸਿੰਘ ਸਮੇਤ ਹਰ ਵਰਗ ਦੇ ਲੋਕਾਂ ਵਲੋਂ ਕੇਂਦਰ ਦੀ ਨਵੀ ਯੋਜਨਾਂ ਦਾ ਵਿਰੋਧ ਕੀਤਾ |
