ਅਣ-ਅਧਿਕਾਰਿਤ ਉਸਾਰੀ ਨੂੰ ਲੈ ਕੇ ਮੁੱਲਾਂਪੁਰ-ਦਾਖਾ ਕੌਂਸਲ ਅਧਿਕਾਰੀਆਂ ਨੇ ਮਕਾਨ ਦਾ ਕੁਝ ਹਿੱਸਾ ਤੋੜਿਆ

ਅ

ਅਜੀਤ ਡੈਸਕ 04-02-2026

ਮੁੱਲਾਂਪੁਰ-ਦਾਖਾ, 3 ਫਰਵਰੀ (ਨਿਰਮਲ ਸਿੰਘ ਧਾਲੀਵਾਲ)-ਨਗਰ ਕੌਂਸਲ ਮੁੱਲਾਂਪੁਰ-ਦਾਖਾ ਵਾਰਡ ਨੰਬਰ 09 ਪੁਰਾਣੀ ਮੰਡੀ ਅੰਦਰ ਪੁਰਾਣਾ ਮਕਾਨ ਦੇ ਪੁਸ਼ਤੈਨੀ ਮਾਲਕ ਸੁਭਾਸ਼ ਵਲੋਂ ਸੰਨ 1971 ਦੀ ਜੰਗ ਵੇਲੇ ਨਿਰਮਾਣ ਹੇਠ ਲਿਆਂਦੇ ਮਕਾਨ ਦਾ ਕੁਝ ਹਿੱਸਾ ਅੱਜ ਲੁਧਿਆਣਾ ਡਿਪਟੀ ਕਮਿਸ਼ਨਰ ਦੇ ਹੁਕਮਾਂ ਨਾਲ ਨਗਰ ਕੌਂਸਲ ਦੇ ਅਮਲੇ-ਫੈਲੇ ਵਲੋਂ ਪੁਲਿਸ ਬਲ ਦੀ ਸਹਾਇਤਾ ਨਾਲ ਤੋੜਿਆ ਗਿਆ | ਕਾਫੀ ਅਰਸਾ ਪਹਿਲਾਂ ਅਕਾਲ ਚਲਾਣਾ ਕਰ ਗਏ ਸੁਭਾਸ਼ ਦੀ ਵਿਧਵਾ ਸ਼ਾਰਦਾ ਵਲੋਂ ਮਕਾਨ ਤੋੜਨ ਆਏ ਆਲ੍ਹਾ ਅਫ਼ਸਰਾਂ ਸਾਹਮਣੇ ਹੱਥ ਜੋੜੇ ਕਿ ਮੇਰੇ ਪਤੀ ਨੇ ਇਹ ਮਕਾਨ 50-52 ਵਰ੍ਹੇ ਪਹਿਲਾਂ ਉਸਾਰਿਆ ਸੀ, ਉਸ ਵਕਤ ਨਾ ਤਾਂ ਨਕਸ਼ਾ ਪਾਸ ਹੁੰਦਾ ਸੀ, ਨਾ ਹੀ ਨਗਰ ਪੰਚਾਇਤ! ਇਹ ਵੀ ਦੱਸਿਆ ਕਿ ਮਕਾਨ ਪੁਰਾਣਾ ਹੋਣ ਕਰਕੇ ਸਾਡੇ ਵਲੋਂ ਮਕਾਨ ਦੀ ਮੁਰੰਮਤ ਜ਼ਰੂਰ ਕਰਵਾਈ ਗਈ | ਬੀਬੀ ਸ਼ਾਰਦਾ ਦੇ ਗੁਆਂਢੀ ਅਤੇ ਆਪ ਪਾਰਟੀ ਦੇ ਪ੍ਰਮੁੱਖ ਆਗੂ ਵਲੋਂ ਇਕੋ ਮਕਾਨ 'ਤੇ ਚੱਲਦਾ ਪੀਲਾ ਪੰਜਾ ਰੁਕਵਾਉਣ ਦੀ ਕੋਸ਼ਿਸ਼ ਸਮੇਂ ਪੁਲਿਸ ਦੇ ਐੱਸ.ਪੀ (ਡੀ) ਰਾਜਨ ਸ਼ਰਮਾ ਅਤੇ ਕਾਰਜ ਸਾਧਕ ਅਫ਼ਸਰ ਨੂੰ ਪੁੱਛਿਆ ਕਿ 25 ਹਜ਼ਾਰ ਦੀ ਅਬਾਦੀ ਵਾਲੇ ਅੱਧੇ ਸ਼ਹਿਰ 'ਚ ਨਾਜਾਇਜ਼ ਉਸਾਰੀ ਵੇਖਣ ਨੂੰ ਮਿਲਦੀ ਹੈ, ਫਿਰ ਇਸ ਇਕੋ ਮਕਾਨ ਦੀ ਚੋਣ ਕਿਉਂ! ਜੇ.ਸੀ.ਬੀ ਨਾਲ ਮਕਾਨ ਦਾ ਕੁਝ ਹਿੱਸਾ ਤੋੜੇ ਜਾਣ ਸਮੇਂ ਬੀਬੀ ਸ਼ਾਰਦਾ ਨਾਲ ਉਸ ਦੇ 2 ਸਪੁੱਤਰ, ਨੂੰ ਹਾਂ ਅਤੇ ਪੋਤਰੇ-ਪੋਤਰੀਆਂ ਇਸ ਮਕਾਨ ਵਿਚ ਰਹਿੰਦੇ ਹਨ, ਜਦ ਕਿ ਇਸ ਪਰਿਵਾਰ ਸਵ: ਸੁਭਾਸ਼ ਦਾ ਇਕ ਲੜਕਾ ਨਸ਼ੇੜੀ ਬਿਰਤੀ ਦਾ ਹੋਣ ਕਰਕੇ ਅਕਸਰ ਘਰੋਂ ਬਾਹਰ ਹੀ ਰਹਿੰਦਾ ਹੈ | ਮੌਕੇ 'ਤੇ ਪ੍ਰਤੱਖ ਦਰਸ਼ੀਆਂ ਵਿਚਕਾਰ ਇਹ ਵੀ ਚਰਚਾ ਛਿੜੀ ਕਿ ਇਸ ਪਰਿਵਾਰ ਦਾ ਇਕ ਲੜਕਾ ਨਸ਼ਾ ਤਸਕਰੀ ਨਾਲ ਜੁੜਿਆ ਹੋਣ ਕਰਕੇ ਪੁਲਿਸ ਅਦਾਲਤੀ ਹੁਕਮਾਂ ਨਾਲ ਯੁੱਧ ਨਸ਼ਿਆਂ ਵਿਰੁੱਧ ਮੁਹਿੰਮ ਨੂੰ ਅਸਰਦਾਰ ਬਣਾਉਣ ਲਈ ਇਹ ਮਕਾਨ ਢਾਹੁਣ ਪਹੁੰਚੀ, ਪਰ ਮੌਕੇ 'ਤੇ ਹਾਜ਼ਰ ਐੱਸ.ਪੀ.ਡੀ ਨੇ ਸਪੱਸ਼ਟ ਕੀਤਾ ਕਿ ਅਜਿਹਾ ਕੁਝ ਨਹੀਂ, ਇਸ ਪਰਿਵਾਰ ਦੇ ਰਾਹੁਲ ਵਿਰੁੱਧ ਮਾਡਲ ਥਾਣਾ ਦਾਖਾ 'ਚ ਐੱਨ.ਡੀ.ਪੀ.ਐੱਸ ਐਕਟ ਦੇ ਕਈ ਮੁਕੱਦਮੇ ਦਰਜ ਹਨ, ਪਰ ਅੱਜ ਦੀ ਕਾਰਵਾਈ ਨਸ਼ਾ ਤਸਕਰੀ ਨਾਲ ਨਹੀਂ ਜੁੜੀ | ਦਾਖਾ ਪੁਲਿਸ ਸਬ ਡਵੀਜ਼ਨ ਦੇ ਡੀ.ਐੱਸ.ਪੀ ਵਰਿੰਦਰ ਸਿੰਘ ਖੋਸਾ ਨੇ ਏਨਾ ਹੀ ਕਿਹਾ ਕਿ ਲਾਅ ਐਂਡ ਅਰਡਰ ਦੀ ਸਥਿਤੀ ਦੇ ਮੱਦੇਨਜ਼ਰ ਪੁਲਿਸ ਤਾਂ ਕੇਵਲ ਨਗਰ ਕੌਂਸਲ ਦੁਆਰਾ ਕਾਰਵਾਈ ਸਮੇਂ ਕਿਸੇ ਅਣ-ਸੁਖਾਵੀਂ ਘਟਨਾ ਨੂੰ ਰੋਕਣ ਲਈ ਕੌਂਸਲ ਦੇ ਸਰਕਾਰੀ ਮੁਲਾਜ਼ਮਾਂ ਦੀ ਸੁਰੱਖਿਆ ਲਈ ਆਈ ਹੈ | ਮਕਾਨ ਤੋੜਨ ਦੀ ਕਾਰਵਾਈ ਲਈ ਡਿਪਟੀ ਕਮਿਸ਼ਨਰ ਦੇ ਆਦੇਸ਼ ਲੈ ਕੇ ਪਹੁੰਚੇ ਕਾਰਜ ਸਾਧਕ ਅਫ਼ਸਰ ਹੈਪੀ ਕੁਮਾਰ ਨੇ ਦੱਸਿਆ ਕਿ ਮਕਾਨ ਦੀ ਨਾਜਾਇਜ਼ ਉਸਾਰੀ ਬਾਰੇ ਕਾਫ਼ੀ ਅਰਸਾ ਪਹਿਲਾਂ ਨਗਰ ਕੌਂਸਲ ਵਲੋਂ ਨੋਟਿਸ ਕੱਢਿਆ ਗਿਆ ਸੀ, ਕੋਈ ਜਵਾਬ ਨਾ ਮਿਲਣ 'ਤੇ ਪੂਰੀ ਪ੍ਰਸ਼ਾਸਕੀ ਪ੍ਰਕਿਰਿਆ ਬਾਅਦ ਉੱਚ ਅਧਿਕਾਰੀਆਂ ਦੇ ਆਦੇਸ਼ਾਂ ਨਾਲ ਅੱਜ ਦੀ ਕਾਰਵਾਈ ਹੋਈ | ਮਕਾਨ ਢਾਹੁਣ ਨੂੰ ਲੈ ਕੇ ਪੂਰੀ ਪ੍ਰਕਿਰਿਆ ਸਮੇਂ ਤਾਇਨਾਤ ਪੁਲਿਸ ਦੀ ਅਗਵਾਈ ਦਾਖਾ ਐੱਸ.ਐੱਚ.ਓ ਹਮਰਾਜ ਸਿੰਘ ਕਰ ਰਹੇ ਸਨ | ਅਦਾਲਤੀ ਹੁਕਮਾਂ ਦੀ ਪੂਰਤੀ ਲਈ ਨਾਇਬ ਤਹਿਸੀਦਾਰ ਕਰਮਜੀਤ ਸਿੰਘ ਵੀ ਮੌਜੂਦ ਰਹੇ |
ਬੀਬੀ ਸ਼ਾਰਦਾ ਤੇ ਪਰਿਵਾਰ ਵਲੋਂ ਧੱਕੇਸ਼ਾਹੀ ਦਾ ਦੋਸ਼-
ਨਗਰ ਕੌਂਸਲ ਅਧਿਕਾਰੀਆਂ ਵਲੋਂ ਮਕਾਨ ਤੋੜਨ ਸਮੇਂ ਬੀਬੀ ਸ਼ਾਰਦਾ ਤੇ ਪਰਿਵਾਰ ਵਲੋਂ ਕੌਂਸਲ ਅਧਿਕਾਰੀਆਂ 'ਤੇ ਧੱਕੇਸ਼ਾਹੀ ਦਾ ਦੋਸ਼ ਲਗਾਉਂਦਿਆਂ ਕਿਹਾ ਕਿ ਪੁਲਿਸ ਦੇ ਵੱਡੇ ਲਾਮ ਲਸ਼ਕਰ ਨਾਲ ਸਾਡੇ ਪਰਿਵਾਰ ਨੂੰ ਬਦਨਾਮ ਕਰਨ ਲਈ ਕੌਂਸਲ ਵਲੋਂ ਗਿਣੀ ਮਿਥੀ ਸਾਜਿਸ਼ ਤਹਿਤ ਕਾਰਵਾਈ ਹੋਈ, ਜਦ ਕਿ ਸਾਨੂੰ ਪਹਿਲਾਂ ਕੋਈ ਹਦਾਇਤ ਜਾਰੀ ਨਹੀਂ ਹੋਈ | ਬੀਬੀ ਸ਼ਾਰਦਾ ਨੇ ਕਿਹਾ ਕਿ ਦੇਸ਼ ਦੇ ਬਟਵਾਰੇ ਤੋਂ ਬਾਅਦ ਪਰਿਵਾਰ ਇਥੇ ਰਹਿ ਰਿਹਾ, ਪਰਿਵਾਰ ਦਾ ਇਕ ਬੱਚਾ ਮਾੜੀ ਸੰਗਤ ਵਿਚ ਚਲਾ ਗਿਆ ਤਾਂ ਸਜ਼ਾ ਪੂਰੇ ਪਰਿਵਾਰ ਨੂੰ ਨਾ ਦਿੱਤੀ ਜਾਵੇ | ਉਨ੍ਹਾਂ ਕੌਂਸਲ ਅਧਿਕਾਰੀਆਂ ਦੁਆਰਾ ਕਾਰਵਾਈ ਦੀ ਨਿੰਦਾ ਕੀਤੀ |

ਅਣ-ਅਧਿਕਾਰਿਤ ਉਸਾਰੀ ਨੂੰ ਲੈ ਕੇ ਮੁੱਲਾਂਪੁਰ-ਦਾਖਾ ਕੌਂਸਲ ਅਧਿਕਾਰੀਆਂ ਨੇ ਮਕਾਨ ਦਾ ਕੁਝ ਹਿੱਸਾ ਤੋੜਿਆ

ਸੰਬੰਧਿਤ ਖ਼ਬਰਾਂ