ਮੁੱਲਾਂਪੁਰ ਦਾਖਾ, 29 ਜੂਨ (ਨਿਰਮਲ ਸਿੰਘ ਧਾਲੀਵਾਲ)- ਆਮ ਆਦਮੀ ਪਾਰਟੀ ਵਲੋਂ ਆਪਣੇ ਚੋਣ ਵਾਅਦੇ ਵਿਚ ਪੰਜਾਬ ਅੰਦਰ ਘਰੇਲੂ, ਖੇਤੀ, ਉਦਯੋਗਿਕ ਸੈਕਟਰ ਨੂੰ ਨਿਰਵਿਘਨ ਬਿਜਲੀ ਦਾ ਵਾਅਦਾ ਕੀਤਾ ਗਿਆ, ਪ੍ਰੰਤੂ ਸਰਕਾਰ ਬਣਨ ’ਤੇ ‘ਆਪ’ ਦਾ ਮੁੱਖ ਮੰਤਰੀ ਭਗਵੰਤ ਮਾਨ ਚੋਣ ਵਾਅਦਾ ਭੁੱਲ ਗਿਆ, ਖ਼ਪਤਕਾਰਾਂ ਨੂੰ ਬਿਜਲੀ ਕੱਟਾਂ ’ਤੇ ਭਾਰੀ ਮੁਸ਼ਕਿਲ ’ਚ ਕੱਢਣ ਦੀ ਥਾਂ ਮੁੱਖ ਮੰਤਰੀ ਦੀ ਚੁੱਪ ਉਚਿੱਤ ਨਹੀਂ। ਇਹ ਪ੍ਰਗਟਾਵਾ ਪੰਜਾਬ ਕਾਂਗਰਸ ਦੇ ਜਨਰਲ ਸਕੱਤਰ (ਇੰਚਾਰਜ) ਕੈਪਟਨ ਸੰਦੀਪ ਸੰਧੂ ਵਲੋਂ ਹਰ ਖੇਤਰ ’ਚ ਬਿਜਲੀ ਦੀ ਵੱਡੀ ਮੁਸ਼ਕਿਲ ’ਤੇ ਕੀਤਾ। ਕੈਪਟਨ ਸੰਦੀਪ ਸੰਧੂ ਨੇ ਕਿਹਾ ਕਿ ਕਹਿਰ ਦੀ ਗਰਮੀ ਝੋਨੇ ਦੀ ਬਿਜਾਈ ਵਾਲੇ ਦਿਨਾਂ ’ਚ ਬਿਜਲੀ ਖ਼ਪਤਕਾਰ ਨੂੰ ਜਦ ਪੂਰੀ ਬਿਜਲੀ ਮਿਲਦੀ ਹੀ ਨਹੀਂ ਤਾਂ ਫਿਰ 600 ਯੂਨਿਟ ਮੁਆਫ਼ ਦਾ ਕੀ ਅਰਥ ਰਹਿ ਗਿਆ। ਕੈਪਟਨ ਸੰਧੂ ਕਿਹਾ ਕਿ ਪੰਜਾਬ ਸਰਕਾਰ ਦੇ ਪੀ.ਐੱਸ.ਪੀ ਸੀ ਐੱਲ ਵਿਭਾਗ ਵਲੋਂ ਆਪਣੇ ਖ਼ਪਤਕਾਰਾ ਨੂੰ ਬਿਜਲੀ ਨਾ ਬਰਾਬਰ ਹੈ, ਜੋ ਆ ਰਹੀ ਉਹ ਵੀ ਨਿੱਜੀ ਥਰਮਲ ਪਲਾਂਟਾ ਰਾਹੀ ਹੈ। ਕੈਪਟਨ ਸੰਦੀਪ ਸੰਧੂ ਕਿਹਾ ਕਿ ਪ੍ਰਭਾਵਿਤ ਹੋ ਰਿਹਾ ਬਿਜਲੀ ਖ਼ਪਤਕਾਰ ਬਿਜਲੀ ਕੱਟਾਂ ਨੂੰ ਲੈ ਕੇ ਸਰਕਾਰ ਪ੍ਰਤੀ ਪੂਰੀ ਤਰ੍ਹਾਂ ਖਫਾ ਹੈ। ਉਨ੍ਹਾਂ ਕਿਹਾ ਕਿ ਵਧ ਰਹੀ ਮਹਿੰਗਾਈ ਦੇ ਦਿਨਾਂ ’ਚ ਖੇਤੀ ਸੈਕਟਰ ਦੇ ਨਾਲ ਘਰੇਲੂ ਖਪਤਕਾਰਾ ਨੂੰ ਮਹਿੰਗਾ ਭਾਅ ਡੀਜ਼ਲ ਫੂਕਣਾ ਪੈ ਰਿਹਾ।
