ਬਿਜਲੀ ਮੁਲਾਜ਼ਮਾਂ ਦੀ ਹੜਤਾਲ ਕਾਰਨ ਕਿਸਾਨ ਦੀਆਂ ਮੁਸ਼ਕਿਲਾਂ ਵਧੀਆਂ
ਅਜੀਤ ਡੈਸਕ
27-07-2026
ਪਾਇਲ, 26 ਜੁਲਾਈ (ਨਿਜ਼ਾਮਪੁਰ,ਰਜਿੰਦਰ ਸਿੰਘ)-ਬਿਜਲੀ ਨਿਗਮ ਦੇ ਮੁਲਾਜ਼ਮਾਂ ਵੱਲੋ ਆਪਣੀ ਜਾਇਜ਼ ਮੰਗਾਂ ਲਈ ਪਿਛਲੇ ਕਈ ਦਿਨ ਤੋਂ ਸੰਘਰਸ਼ ਕੀਤਾ ਜਾ ਰਿਹਾ ਹੈ ਜਿਸ ਨਾਲ ਕਿਸਾਨਾਂ ਦੀਆਂ ਮੁਸ਼ਕਲਾਂ ਵੱਧ ਗਈਆਂ ਹਨ। ਜਦੋਂ ਕਿਸੇ ਫੀਡਰ ਵਿਚ ਨੁਕਸ ਪੈ ਜਾਂਦਾ ਹੈ ਤਾਂ ਝੋਨੇ ਦਾ ਸੀਜ਼ਨ ਹੋਣ ਕਰਕੇ ਕਿਸਾਨਾਂ ਬਹੁਤ ਬਿਪਤਾ ਵਿਚ ਫਸ ਜਾਂਦੇ ਹਨ। ਉਹ ਆਪਣੀ ਫ਼ਰਿਆਦ ਲੈ ਕੇ ਗਰਿੱਡ ਅਤੇ ਸਬਡਵੀਜ਼ਨ ਦਫ਼ਤਰ ਜਾਂਦੇ ਹਨ ਤਾਂ ਉਨ੍ਹਾਂ ਦੀਆਂ ਆਸਾਂ ਨੂੰ ਕੋਈ ਬੂਰ ਨਹੀਂ ਪੈਂਦਾ। ਅਜਿਹੀ ਹੀ ਮਿਸਾਲ ਸਬ ਡਵੀਜ਼ਨ ਧਮੋਟ ਤੋਂ ਚੱਲਦੇ ਨਿਜ਼ਾਮਪੁਰ ਫੀਡਰ ਵਿਚ ਨੁਕਸ ਪੈਣ ਕਰਕੇ ਮਿਲੀ। ਜਦੋਂ ਨਿਜ਼ਾਮਪੁਰ ਫੀਡਰ ਵਿਚ ਨੁਕਸ ਪੈ ਜਾਣ ਕਰਕੇ ਕਿਸਾਨ ਗਰਿੱਡ ਵਿਚ ਪਹੁੰਚੇ ਤਾਂ ਹੜਤਾਲ ਕੀਤੀ ਜਾਣ ਕਰਕੇ ਕੋਈ ਕਰਮਚਾਰੀ ਨਾ ਮਿਲਿਆ। ਜਿਸ ਕਰਕੇ ਕਿਸਾਨ ਨਿਰਾਸ਼ ਹੋ ਕੇ ਵਾਪਸ ਘਰਾਂ ਨੂੰ ਪਰਤ ਆਏ। ਇਸ ਸੰਬੰਧੀ ਜਦੋਂ ਐਸ. ਡੀ. ਓ ਧਮੋਟ ਪਰਮਜੀਤ ਸਿੰਘ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਦੀ ਡਿਊਟੀ ਖੰਨਾ ਨੇੜੇ ਭੜੀ ਗਰਿੱਡ ’ਤੇ ਲੱਗੀ ਹੋਈ ਹੈ ਇਸ ਕਰਕੇ ਉਹ ਕੁੱਝ ਵੀ ਕਹਿਣ ਅਤੇ ਕਰਨ ਤੋਂ ਅਸਮਰਥ ਹਨ।ਕਿਸਾਨਾਂ ਦਾ ਕਹਿਣਾ ਹੈ ਕਿ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਨੂੰ ਕਿਸਾਨਾਂ ਦੀਆਂ ਮੁਸ਼ਕਲਾਂ ਨੂੰ ਵੇਖਦੇ ਹੋਏ ਬਿਜਲੀ ਮੁਲਾਜ਼ਮਾਂ ਦੀਆਂ ਮੰਗਾਂ ਵੱਲ ਧਿਆਨ ਦੇਣਾ ਚਾਹੀਦਾ ਹੈ ।
