ਬੰਗਾ, 1 ਫਰਵਰੀ (ਸੁਰਿੰਦਰ ਸਿੰਘ ਕਰਮ ਲਧਾਣਾ)-ਸ਼ਹੀਦ ਭਗਤ ਸਿੰਘ ਸਿੱਖਿਆ ਸੇਵਾ ਸੁਸਾਇਟੀ ਬੰਗਾ ਵੱਲੋਂ ਕਿੱਕ ਬਾਕਸਿੰਗ ਦੀ ਖਿਡਾਰਨ ਕੁਮਾਰੀ ਮੁਸਕਾਨ ਨੂੰ ਦਸ ਹਜ਼ਾਰ ਰੁਪਏ ਦੀ ਰਾਸ਼ੀ ਅਤੇ ਸਨਮਾਨ ਚਿੰਨ੍ਹ ਨਾਲ ਸਨਮਾਨਿਤ ਕੀਤਾ ਗਿਆ | ਕੁਮਾਰੀ ਮੁਸਕਾਨ ਬੰਗਾ ਨੇੜਲੇ ਪਿੰਡ ਸੱਲ੍ਹ ਕਲਾਂ ਦੀ ਵਸਨੀਕ ਹੈ ਅਤੇ ਪਿਤਾ ਚਰਨਜੀਤ ਸਿੰਘ ਅਤੇ ਕੁਲਵਿੰਦਰ ਕੌਰ ਦੀ ਹੋਣਹਾਰ ਬੇਟੀ ਹੈ | ਐਮ.ਪੀ.ਈ.ਐਸ ਦੀ ਡਿਗਰੀ ਕਰਨ ਉਪਰੰਤ ਇਸ ਸਮੇਂ ਉਹ ਬੀ.ਪੀ.ਈ.ਐੱਡ ਦੀ ਟਰੇਨਿੰਗ ਲੈ ਰਹੀ ਹੈ | ਇਸ ਦੇ ਨਾਲ ਹੀ ਖੇਡਾਂ ਵਿੱਚ ਮੱਲਾਂ ਮਾਰ ਰਹੀ ਹੈ | ਹੁਣ ਤੱਕ ਉਹ ਕਈ ਨੈਸ਼ਨਲ ਅਤੇ ਇੰਟਰਨੈਸ਼ਨਲ ਮੁਕਾਬਲਿਆਂ ਵਿੱਚ ਭਾਗ ਲੈ ਚੁੱਕੀ ਹੈ ਤੇ ਇਨਾਮ ਪ੍ਰਾਪਤ ਕਰ ਚੁੱਕੀ ਹੈ | ਸੁਸਾਇਟੀ ਦੀ ਪ੍ਰਧਾਨ ਮਨਜੀਤ ਕੌਰ ਬੋਲਾ ਨੇ ਆਖਿਆ ਕਿ ਮੁਸਕਾਨ ਸਾਡੇ ਇਲਾਕੇ ਦਾ ਮਾਣ ਹੈ | ਉਹ ਪੜ੍ਹਾਈ ਦੇ ਨਾਲ-ਨਾਲ ਕਿੱਕ ਬਾਕਸਿੰਗ ਵਿੱਚ ਨਾਮਣਾ ਖੱਟ ਰਹੀ ਹੈ | ਜਿਸ ਨਾਲ ਆਪਣਾ, ਆਪਣੇ ਮਾਂ ਬਾਪ, ਆਪਣੇ ਪਿੰਡ, ਜ਼ਿਲ੍ਹੇ ਅਤੇ ਪੂਰੇ ਪੰਜਾਬ ਦਾ ਨਾਮ ਰੌਸ਼ਨ ਕਰ ਰਹੀ ਹੈ | ਉਸ ਨੂੰ ਸਨਮਾਨਿਤ ਕਰਕੇ ਸੁਸਾਇਟੀ ਮਾਣ ਮਹਿਸੂਸ ਕਰ ਰਹੀ ਹੈ | ਰਿਟਾਇਰਡ ਪਿ੍ੰਸੀਪਲ ਸ਼੍ਰੀਮਤੀ ਹਰਪ੍ਰੀਤ ਅਰੋੜਾ ਨੇ ਵਿਚਾਰ ਪ੍ਰਗਟ ਕਰਦੇ ਹੋਏ ਕਿਹਾ ਕਿ ਸਿਰਫ ਪੁੱਤਰ ਹੀ ਮਾਂ ਬਾਪ ਦਾ ਨਾਮ ਰੌਸ਼ਨ ਨਹੀਂ ਕਰਦੇ ਮੁਸਕਾਨ ਵਰਗੀਆਂ ਧੀਆਂ ਵੀ ਮਾਂ ਬਾਪ ਦਾ ਨਾਮ ਰੌਸ਼ਨ ਕਰਦੀਆਂ ਹਨ | ਤਿੰਨ ਅਤੇ ਚਾਰ ਫਰਵਰੀ ਨੂੰ ਦਿੱਲੀ ਵਿਖੇ ਹੋਣ ਵਾਲੇ ਕਿੱਕ ਬਾਕਸਿੰਗ ਦੇ ਇੰਟਰਨੈਸ਼ਨਲ ਮੁਕਾਬਲੇ ਵਿੱਚ ਵੀ ਕੁਮਾਰੀ ਮੁਸਕਾਨ ਭਾਗ ਲਵੇਗੀ | ਡਾ. ਹਰੀ ਕਿ੍ਸ਼ਨ, ਗਾਇਕ ਤੇ ਗੀਤਕਾਰ ਅਮਰਦੀਪ ਬੰਗਾ, ਸੁਰਿੰਦਰ ਪਾਲ ਸਿੰਘ, ਕੋਚ ਸਰਬਜੀਤ ਸਿੰਘ ਮੰਗੂਵਾਲ, ਸ਼੍ਰੀਮਤੀ ਸੁਨੀਤਾ ਸ਼ਰਮਾ, ਹਰਪ੍ਰੀਤ ਅਰੋੜਾ, ਰੀਚਾ ਰਾਣੀ ਅਤੇ ਮਨਜੀਤ ਕੌਰ ਬੋਲਾ ਨੇ ਕੁਮਾਰੀ ਮੁਸਕਾਨ ਨੂੰ ਜਿੱਤ ਪ੍ਰਾਪਤ ਕਰਨ ਲਈ ਸ਼ੁੱਭ ਇੱਛਾਵਾਂ ਭੇਟ ਕੀਤੀਆਂ |
