ਕਾਠਗੜ੍ਹ, 12 ਅਪ੍ਰੈਲ (ਹਰਸਿਮਰਨ ਜੋਤ ਸਿੰਘ ਕਲੇਰ)-ਰੋਪੜ ਬਲਾਚੌਰ ਨੈਸ਼ਨਲ ਹਾਈਵੇ 'ਤੇ ਸਥਿਤ ਸੁੱਧਾਮਾਜਰਾ ਬੱਸ ਅੱਡੇ ਤੋਂ ਜੋ ਸੰਪਰਕ ਸੜਕ ਮਾਣੇਵਾਲ ਤੇ ਹੋਰ ਬੇਟ ਦੇ ਪਿੰਡਾਂ ਨੂੰ ਨੈਸ਼ਨਲ ਹਾਈਵੇ ਰੋਡ ਨਾਲ ਜੋੜਦੀ ਹੈ, ਉਹ ਸੜਕ ਥਾਂ-ਥਾਂ ਤੋਂ ਬੁਰੀ ਤਰ੍ਹਾਂ ਨਾਲ ਟੁੱਟ ਚੁੱਕੀ ਹੈ, ਜਿਸ 'ਤੇ ਚਾਰ ਪਹੀਆ ਜਾਂ ਵੱਡੇ ਵਾਹਨਾਂ ਦਾ ਚੱਲਣਾ ਤਾਂ ਬਹੁਤ ਦੂਰ ਦੀ ਗੱਲ, ਪਰ ਇੱਥੋਂ ਦੋ ਪਹੀਆਂ ਵਾਹਨਾਂ ਸਮੇਤ ਪੈਦਲ ਚੱਲਣਾ ਵੀ ਖ਼ਤਰੇ ਤੋਂ ਖ਼ਾਲੀ ਨਹੀਂ ਹੈ | ਇਸ ਸੜਕ 'ਤੇ ਰੋਜ਼ਾਨਾ ਚੱਲਣ ਵਾਲੇ ਲੋਕ ਕਈ ਕਈ ਵਾਰ ਸੱਟਾਂ ਲਗਵਾ ਕੇ ਹਸਪਤਾਲ ਵਿੱਚ ਦਾਖਲ ਹੋ ਚੁੱਕੇ ਹਨ | ਮਾਣੇਵਾਲ ਦੇ ਸਰਪੰਚ ਬਰਜਿੰਦਰ ਸਿੰਘ ਰਾਏ ਨੇ ਦੱਸਿਆ ਕਿ ਅਸੀਂ ਸੜਕ ਬਣਵਾਉਣ ਲਈ ਕਈ ਵਾਰ ਸਰਕਾਰੇ-ਦਰਬਾਰੇ ਅਪੀਲ ਕਰ ਚੁੱਕੇ ਹਾਂ, ਪਰ ਪ੍ਰਸ਼ਾਸਨ ਵਲੋਂ ਭਰੋਸਾ ਦੇਣ ਦੇ ਬਾਵਜੂਦ ਵੀ ਅਜੇ ਤੱਕ ਵੀ ਕਿਸੇ ਨੇ ਇਸ ਸੜਕ ਨੂੰ ਠੀਕ ਕਰਨ ਦਾ ਉਪਰਾਲਾ ਨਹੀਂ ਕੀਤਾ, ਜਦੋਂ ਪੱਤਰਕਾਰ ਨੇ ਆਪ ਜਾ ਕੇ ਸੜਕ ਦਾ ਹਾਲ ਦੇਖਿਆ ਤਾਂ ਇਕ ਨੌਜਵਾਨ ਅਪਾਹਜ ਜੋ ਵੀਲ੍ਹਚੇਅਰ ਨਾਲ ਸੁੱਧਾਮਾਜਰੇ ਵੱਲ ਜਾ ਰਿਹਾ ਸੀ, ਸੜਕ ਖ਼ਰਾਬ ਹੋਣ ਕਰਕੇ ਬੜੀ ਮੁਸ਼ਕਿਲ ਨਾਲ ਉਸ ਨੂੰ ਧੱਕ ਕੇ ਅੱਗੇ ਲਿਜਾ ਰਿਹਾ ਸੀ | ਇਸ ਸੜਕ 'ਤੇ ਰਾਤ ਨੂੰ ਤਾਂ ਕੀ ਦਿਨ ਵੇਲੇ ਚੱਲਣਾ ਵੀ ਖ਼ਤਰੇ ਤੋਂ ਖ਼ਾਲੀ ਨਹੀਂ | ਬੇਟ ਖੇਤਰ ਦੀਆਂ ਸਮੂਹ ਗ੍ਰਾਮ ਪੰਚਾਇਤਾਂ ਨੇ ਪੰਜਾਬ ਸਰਕਾਰ ਨੂੰ ਜ਼ੋਰਦਾਰ ਸ਼ਬਦਾਂ ਵਿੱਚ ਅਪੀਲ ਕੀਤੀ ਹੈ, ਕਿ ਇਸ ਟੁੱਟੀ ਹੋਈ ਸੜਕ ਨੂੰ ਬਣਾ ਕੇ ਇਸ ਮੁਸ਼ਕਿਲ ਨੂੰ ਹੱਲ ਕੀਤਾ ਜਾਵੇ |
