ਜਾਡਲਾ, 30 ਮਈ (ਹਰਕੰਵਲ ਸਿੰਘ ਕੌਲਗੜ੍ਹ)-ਕਣਕ ਦੀ ਵਾਢੀ ਤੋਂ ਬਾਅਦ ਨਾੜ ਨੂੰ ਅੱਗ ਲਾਉਣ ਦਾ ਸਿਲਸਿਲਾ ਰੁਕਣ ਦਾ ਨਾਂਅ ਨਹੀਂ ਲੈ ਰਿਹਾ | ਇਸ ਨਾਲ ਨਾ ਸਿਰਫ਼ ਵਾਤਾਵਰਨ ਪ੍ਰਦੂਸ਼ਿਤ ਹੋ ਰਿਹਾ ਹੈ, ਸਗੋਂ ਕਿਸਾਨਾਂ ਦਾ ਆਰਥਿਕ ਨੁਕਸਾਨ ਵੀ ਹੋ ਰਿਹਾ ਹੈ | ਆਸ-ਪਾਸ ਦੇ ਖੇਤਰਾਂ ਵਿਚ ਜਾ ਕੇ ਦੇਖਿਆ ਗਿਆ ਕਿ ਕੁੱਝ ਥਾਵਾਂ 'ਤੇ ਆਪ-ਮੁਹਾਰੇ ਗਰਮੀ ਕਾਰਨ ਲੱਗੀ ਅੱਗ ਨੇ ਵੀ ਤਬਾਹੀ ਮਚਾਈ ਹੈ, ਪਰ ਜ਼ਿਆਦਾਤਰ ਨੁਕਸਾਨ ਕਿਸਾਨਾਂ ਵਲੋਂ ਨਾੜ ਨੂੰ ਲਾਈ ਜਾਣ ਵਾਲੀ ਅੱਗ ਨਾਲ ਹੋ ਰਿਹਾ ਹੈ | ਇਕ ਕਿਸਾਨ ਦੇ ਖੇਤ ਵਿਚ ਜਿਥੇ ਪਾਪੂਲਰ ਦੇ ਬੂਟੇ ਲੱਗੇ ਹੋਏ ਸਨ ਤੇ ਨਾਲ ਕਮਾਦ ਬੀਜੀ ਹੋਈ ਸੀ, ਉੱਥੇ ਨਾੜ ਦੀ ਅੱਗ ਫੈਲਣ ਕਾਰਨ ਵੱਡਾ ਨੁਕਸਾਨ ਹੋਇਆ | ਪਾਪੂਲਰ ਦੇ ਸੈਂਕੜਿਆਂ ਦੀ ਗਿਣਤੀ ਵਿਚ ਕੀਮਤੀ ਦਰਖ਼ਤ ਸੜ ਕੇ ਸੁਆਹ ਹੋ ਗਏ | ਅੱਗ ਇੰਨੀ ਭਿਆਨਕ ਸੀ ਕਿ ਪਾਪੂਲਰ ਦੇ ਨਾਲ ਬੀਜੀ ਹੋਈ ਕਮਾਦ ਦੀ ਫਸਲ ਵੀ ਪੂਰੀ ਤਰ੍ਹਾਂ ਸੜ ਗਈ ਤੇ ਉਸ ਦਾ ਨਾਮੋ-ਨਿਸ਼ਾਨ ਤੱਕ ਨਹੀਂ ਰਿਹਾ | ਜਿਥੋਂ ਤੱਕ ਪਾਪੂਲਰ ਦੀ ਗੱਲ ਹੈ ਕਿਸਾਨ ਦਾ ਲੱਖਾਂ ਰੁਪਏ ਦਾ ਨੁਕਸਾਨ ਹੋ ਗਿਆ ਹੈ | ਪਾਪੂਲਰ ਦੇ ਦਰੱਖ਼ਤ 4-5 ਸਾਲਾਂ ਵਿਚ ਤਿਆਰ ਹੁੰਦੇ ਹਨ ਤੇ ਕਮਾਦ ਵੀ ਸਾਲ ਭਰ ਦੀ ਫ਼ਸਲ ਹੈ | ਇਕ ਪਲ ਦੀ ਲਾਪ੍ਰਵਾਹੀ ਨੇ ਸਾਲਾਂ ਦੀ ਮਿਹਨਤ 'ਤੇ ਪਾਣੀ ਫੇਰ ਦਿੱਤਾ | ਮਾਹਿਰਾਂ ਨੇ ਅਪੀਲ ਕੀਤੀ ਹੈ ਕਿ ਕਿਸਾਨ ਨਾੜ ਪ੍ਰਬੰਧਨ ਲਈ ਆਧੁਨਿਕ ਤਕਨੀਕ ਵਾਲੀਆਂ ਮਸ਼ੀਨਾਂ ਦੀ ਵਰਤੋਂ ਕਰਨ |
