ਸੰਘੋਲ/ਖਮਾਣੋਂ, 3 ਫਰਵਰੀ (ਪਰਮਵੀਰ ਸਿੰਘ/ਮਨਮੋਹਣ ਸਿੰਘ ਕਲੇਰ)-ਨਕਦੀ ਅਤੇ ਮੋਬਾਈਲ ਫ਼ੋਨ ਖੋਹ ਮਾਮਲੇ 'ਚ ਥਾਣਾ ਖੇੜੀ ਨੌਧ ਸਿੰਘ ਪੁਲਿਸ ਨੇ 3 ਨੌਜਵਾਨਾਂ ਨੂੰ ਕਾਬੂ ਕਰਨ ਦਾ ਦਾਅਵਾ ਕੀਤਾ ਹੈ | ਮਾਮਲੇ ਬਾਰੇ ਜਾਣਕਾਰੀ ਸਾਂਝੀ ਕਰਦਿਆਂ ਉਪ ਪੁਲਿਸ ਕਪਤਾਨ ਖਮਾਣੋਂ ਗੁਰਮੀਤ ਸਿੰਘ ਨੇ ਦੱਸਿਆ ਕਿ ਜਗਦੇਵ ਸਿੰਘ ਪੁੱਤਰ ਜਗੀਰ ਸਿੰਘ ਵਾਸੀ ਪਿੰਡ ਕੋਟਲਾ ਅਜਮੇਰ ਥਾਣਾ ਖੇੜੀ ਨੌਧ ਸਿੰਘ ਵਲੋਂ ਪੁਲਿਸ ਨੂੰ ਇਤਲਾਹ ਦਿੱਤੀ ਗਈ ਸੀ ਕਿ ਅਣਪਛਾਤੇ ਆਲਟੋ ਕਾਰ ਸਵਾਰ ਵਿਅਕਤੀ ਉਸ ਕੋਲੋਂ ਹਥਿਆਰ ਵਿਖਾ ਕੇ 850 ਰੁਪਏ ਨਗਦੀ ਅਤੇ ਮੋਬਾਈਲ ਫ਼ੋਨ ਖੋਹ ਕੇ ਲੈ ਗਏ ਹਨ | ਅਧਿਕਾਰੀ ਨੇ ਦੱਸਿਆ ਕਿ ਮਾਮਲੇ 'ਚ ਪੁਲਿਸ ਨੇ ਪਰਚਾ ਦਰਜ ਕਰ ਕੇ ਮੁੱਖ ਥਾਣਾ ਅਫ਼ਸਰ ਮੇਜਰ ਸਿੰਘ ਦੀ ਅਗਵਾਈ ਹੇਠ ਪੜਤਾਲ ਉਪਰੰਤ ਵਰਿੰਦਰਜੀਤ ਸਿੰਘ ਉਰਫ਼ ਕੋਬਰਾ ਵਾਸੀ ਕੋਟਲਾ ਬਡਲਾ, ਗੁਰਪ੍ਰੀਤ ਸਿੰਘ ਉਰਫ਼ ਗੋਗਾ ਵਾਸੀ ਪਿੰਡ ਭੜੀ ਅਤੇ ਬਲਜੋਤ ਸਿੰਘ ਉਰਫ਼ ਜੋਤ ਵਾਸੀ ਪਿੰਡ ਕੋਟਲਾ ਬਡਲਾ ਨੂੰ ਨਾਮਜ਼ਦ ਕਰ ਕੇ ਗਿ੍ਫ਼ਤਾਰ ਕਰ ਲਿਆ ਹੈ | ਕਾਬੂ ਕੀਤੇ ਨੌਜਵਾਨਾਂ ਕੋਲੋਂ ਪੁਲਿਸ ਨੇ 850 ਰੁਪਏ, ਮੋਬਾਈਲ ਵੀਵੋ, ਆਈਟੈਲ ਕੰਪਨੀ ਦਾ ਮੋਬਾਈਲ, ਹਥਿਆਰ ਦਾਤ ਅਤੇ ਕਿ੍ਪਾਨ ਤੋਂ ਇਲਾਵਾ ਵਾਰਦਾਤ ਮੌਕੇ ਵਰਤੀ ਗਈ ਆਲਟੋ ਕਾਰ ਬਰਾਮਦ ਕਰ ਲਈ ਹੈ |
