ਪੁਲਿਸ ਮੁਲਾਜ਼ਮਾਂ ਦੀ ਹੱਤਿਆ ਵਾਲੇ ਦਿਨ ਟੈਕਸੀ ਚਾਲਕ ਕੋਲੋਂ ਟੈਕਸੀ ਖੋਹਣ ਵਾਲੇ ਸ਼ੱਕੀਆਂ ਬਾਰੇ ਭੇਦ ਬਰਕਰਾਰ <br/>

ਦੀਨਾਨਗਰ ਬੱਸ ਸਟੈਂਡ ਅੰਦਰ ਲੱਗੇ ਇਕ ਸੀ.ਸੀ.ਟੀ.ਵੀ. ਕੈਮਰੇ 'ਚ ਕੈਦ ਕਾਰ ਖੋਹਣ ਵਾਲੇ ਸ਼ੱਕੀਆਂ ਦੀ ਤਸਵੀਰ | <br/> 25-02-2026

ਦੀਨਾਨਗਰ, 24 ਫਰਵਰੀ (ਸ਼ਾਮ ਸਿੰਘ ਘੁੰਮਣ)-ਲੰਘੀ 21 ਫਰਵਰੀ ਨੂੰ ਦੀਨਾਨਗਰ ਸਬ ਡਵੀਜ਼ਨ ਦੇ ਦੋਰਾਂਗਲਾ ਪੁਲਿਸ ਸਟੇਸ਼ਨ ਅਧੀਨ ਪੈਂਦੇ ਆਦੀਆਂ ਨਾਕੇ 'ਤੇ ਤਾਇਨਾਤ ਦੋ ਪੁਲਿਸ ਮੁਲਾਜ਼ਮਾਂ ਦੀ ਹੱਤਿਆ ਕੀਤੇ ਜਾਣ ਵਾਲੇ ਦਿਨ ਦੀਨਾਨਗਰ ਬੱਸ ਸਟੈਂਡ ਤੋਂ ਇਕ ਟੈਕਸੀ ਕਾਰ ਕਿਰਾਏ 'ਤੇ ਜੰਮੂ ਕਸ਼ਮੀਰ ਅੰਦਰ ਲਿਜਾ ਕੇ ਟੈਕਸੀ ਚਾਲਕ ਨਾਲ ਕੁੱਟਮਾਰ ਕਰਕੇ ਟੈਕਸੀ ਖੋਹਣ ਵਾਲੇ ਚਾਰ ਸ਼ੱਕੀ ਵਿਅਕਤੀ ਕੌਣ ਸਨ, ਇਸ ਦੇ ਬਾਰੇ ਭੇਦ ਅਜੇ ਵੀ ਬਰਕਰਾਰ ਹੈ | ਇਸ ਘਟਨਾ ਦਾ ਖ਼ੁਲਾਸਾ ਕੱਲ੍ਹ ਦੇਰ ਸ਼ਾਮ ਹੋਣ ਮਗਰੋਂ ਖੇਤਰ ਅੰਦਰ ਚਰਚਾਵਾਂ ਦਾ ਬਾਜ਼ਾਰ ਗਰਮ ਹੈ | ਇੱਕੋ ਦਿਨ ਵਾਪਰੀਆਂ ਦੋ ਘਟਨਾਵਾਂ ਨੂੰ ਲੋਕ ਇਕ ਦੂਜੇ ਨਾਲ ਜੋੜ ਕੇ ਦੇਖ ਰਹੇ ਹਨ | ਦੱਸਣਯੋਗ ਹੈ ਕਿ ਲੰਘੀ 21 ਫਰਵਰੀ ਨੂੰ ਭਾਰਤ ਪਾਕਿ ਸਰਹੱਦ ਨੇੜੇ ਦੋਰਾਂਗਲਾ ਪੁਲਿਸ ਸਟੇਸ਼ਨ ਅਧੀਨ ਪੈਂਦੇ ਆਦੀਆਂ ਪੁਲਿਸ ਨਾਕੇ 'ਤੇ ਤਾਇਨਾਤ ਦੋ ਪੁਲਿਸ ਮੁਲਾਜ਼ਮਾਂ ਏ.ਐਸ.ਆਈ ਗੁਰਨਾਮ ਸਿੰਘ ਤੇ ਹੋਮਗਾਰਡ ਜਵਾਨ ਅਸ਼ੋਕ ਕੁਮਾਰ ਦੀਆਂ ਲਾਸ਼ਾਂ ਮਿਲੀਆਂ ਸਨ | ਦੋਵਾਂ ਪੁਲਿਸ ਮੁਲਾਜ਼ਮਾਂ ਦੀਆਂ ਦੇਹਾਂ ਗੋਲੀਆਂ ਨਾਲ ਵਿੰਨ੍ਹੀਆਂ ਹੋਈਆਂ ਸਨ | ਪੁਲਿਸ ਵਲੋਂ ਨੇੜਲੇ ਇਲਾਕਿਆਂ ਅੰਦਰ ਸੀ.ਸੀ.ਟੀ.ਵੀ ਖੰਘਾਲੇ ਜਾਣ ਦੌਰਾਨ ਸਾਹਮਣੇ ਆਈ ਇਕ ਸੀ.ਸੀ.ਟੀ.ਵੀ ਫੁਟੇਜ 'ਚ ਘਟਨਾ ਵਾਲੀ ਰਾਤ ਸਾਢੇ ਬਾਰਾਂ ਵਜੇ ਦੇ ਕਰੀਬ ਦੋ ਮੋਟਰਸਾਈਕਲ ਸਵਾਰ ਪੰਜ ਵਿਅਕਤੀਆਂ ਦੀ ਹਰਕਤ ਨੋਟ ਕੀਤੀ ਗਈ ਸੀ ਤੇ ਸੁਰੱਖਿਆ ਏਜੰਸੀਆਂ ਵਲੋਂ ਇਸ ਦਿਸ਼ਾ ਵਿਚ ਵੀ ਕੰਮ ਕੀਤਾ ਜਾ ਰਿਹਾ ਹੈ ਕਿ ਸੀ.ਸੀ.ਟੀ.ਵੀ ਕੈਮਰੇ 'ਚ ਕੈਦ ਉਕਤ ਲੋਕ ਪੁਲਿਸ ਮੁਲਾਜ਼ਮਾਂ ਦੀ ਹੱਤਿਆ ਵਿਚ ਸ਼ਾਮਿਲ ਹਨ ਜਾਂ ਨਹੀਂ | ਡਿਊਟੀ 'ਤੇ ਤਾਇਨਾਤ ਦੋ ਪੁਲਿਸ ਮੁਲਾਜ਼ਮਾਂ ਦੀ ਹੱਤਿਆ ਦੇ ਮਾਮਲੇ ਦੀ ਪੁਲਿਸ ਅਜੇ ਵੱਖ-ਵੱਖ ਕੋਨਾਂ ਤੋਂ ਜਾਂਚ ਕਰ ਹੀ ਰਹੀ ਸੀ ਕਿ ਇਸੇ ਦੌਰਾਨ 22 ਫਰਵਰੀ ਦੀ ਸ਼ਾਮ ਨੂੰ ਹੀ ਦੀਨਾਨਗਰ ਖੇਤਰ ਅੰਦਰ ਇਕ ਹੋਰ ਘਟਨਾ ਵਾਪਰ ਗਈ | ਜਿਸ ਵਿਚ ਚਾਰ ਸ਼ੱਕੀ ਵਿਅਕਤੀਆਂ ਨੇ ਸ਼ਾਮ ਸਾਢੇ ਛੇ ਵਜੇ ਦੇ ਕਰੀਬ ਦੀਨਾਨਗਰ ਦੇ ਟੈਕਸੀ ਸਟੈਂਡ ਤੋਂ ਇਕ ਟੈਕਸੀ ਕਾਰ ਅਰਟਿਗਾ ਪੀ.ਬੀ.01. ਈ.6042 ਜੰਮੂ ਦੇ ਸਾਂਬਾ ਵਿਖੇ ਜਾਣ ਲਈ ਕਿਰਾਏ 'ਤੇ ਇਹ ਕਹਿ ਕੇ ਲਈ ਕਿ ਉਹ ਦੀਨਾਨਗਰ ਨੇੜਲੀ ਇਕ ਸ਼ਰਾਬ ਫ਼ੈਕਟਰੀ ਵਿਚ ਕੰਮ ਕਰਦੇ ਹਨ ਤੇ ਸਾਂਬਾ ਵਿਖੇ ਵਿਆਹ ਸਮਾਗਮ ਵਿਚ ਸ਼ਾਮਿਲ ਹੋਣ ਲਈ ਜਾ ਰਹੇ ਹਨ, ਜਿੱਥੋਂ ਉਨ੍ਹਾਂ ਨੇ ਇਸੇ ਕਾਰ ਰਾਹੀਂ ਜਲਦੀ ਵਾਪਸ ਵੀ ਪਰਤਣਾ ਹੈ | ਪਰ ਟੈਕਸੀ ਕਿਰਾਏ 'ਤੇ ਲੈਣ ਵਾਲੇ ਸ਼ੱਕੀ ਵਿਅਕਤੀ ਕਾਰ ਨੂੰ ਜੰਮੂ ਕਸ਼ਮੀਰ ਦੇ ਸਾਂਬਾ ਤੱਕ ਲੈ ਜਾਣ ਦੀ ਬਜਾਏ ਉਸ ਤੋਂ ਹੋਰ ਅੱਗੇ ਵਿਜੇਪੁਰ ਨੇੜਲੇ ਸਰਹੱਦੀ ਖੇਤਰ ਰੱਖ ਬਰੋਟੀਆਂ ਵੱਲ ਲੈ ਗਏ, ਜਿੱਥੇ ਉਨ੍ਹਾਂ ਨੇ ਟੈਕਸੀ ਡਰਾਈਵਰ ਅਜੇ ਕੁਮਾਰ ਵਾਸੀ ਦੀਨਾਨਗਰ ਕੋਲੋਂ ਮੋਬਾਈਲ ਫੋਨ ਤੇ ਪੈਸੇ ਖੋਹਣ ਮਗਰੋਂ ਅਜੇ ਕੁਮਾਰ ਨਾਲ ਬੁਰੀ ਤਰ੍ਹਾਂ ਮਾਰਕੁੱਟ ਕਰਕੇ ਟੈਕਸੀ ਲੈ ਕੇ ਫ਼ਰਾਰ ਹੋ ਗਏ | ਹੁਣ ਇਹ ਟੈਕਸੀ ਖੋਹਣ ਵਾਲੇ 4 ਸ਼ੱਕੀ ਵਿਅਕਤੀ ਕੌਣ ਸਨ ਤੇ ਪੁਲਿਸ ਮੁਲਾਜ਼ਮਾਂ ਦੀ ਹੱਤਿਆ ਵਾਲੇ ਦਿਨ ਹੀ ਦੀਨਾਨਗਰ ਤੋਂ ਸ਼ੱਕੀ ਹਾਲਾਤਾਂ ਵਿਚ ਟੈਕਸੀ ਕਿਰਾਏ 'ਤੇ ਕਰਕੇ ਜੰਮੂ ਕਸ਼ਮੀਰ ਦੇ ਵਿਜੇਪੁਰ ਨੇੜਲੇ ਨਸ਼ਾ ਤਸਕਰੀ ਤੇ ਹੋਰ ਗਤੀਵਿਧੀਆਂ ਲਈ ਬਦਨਾਮ ਖ਼ਤਰਨਾਕ ਇਲਾਕੇ ਵੱਲ ਜਾਣ ਦਾ ਕੀ ਮਕਸਦ ਹੈ ਇਹ ਤਾਂ ਮਾਮਲੇ ਦੀ ਜਾਂਚ ਮਗਰੋਂ ਹੀ ਪਤਾ ਲੱਗੇਗਾ |
ਟੈਕਸੀ ਮਾਲਕ, ਟੈਕਸੀ ਚਾਲਕ ਤੇ ਪੁਲਿਸ ਕੋਈ ਵੀ ਬੋਲਣ ਨੂੰ ਤਿਆਰ ਨਹੀਂ
ਹਾਲਾਂਕਿ ਸ਼ੱਕੀਆਂ ਵਲੋਂ ਕੁੱਟਮਾਰ ਕਰਕੇ ਟੈਕਸੀ ਖੋਹੇ ਜਾਣ ਮਗਰੋਂ ਟੈਕਸੀ ਚਾਲਕ ਅਜੇ ਕੁਮਾਰ ਕਿਸੇ ਤਰ੍ਹਾਂ ਚੱਲ ਕੇ ਹਾਈਵੇ ਤੱਕ ਪੁੱਜਾ ਤੇ ਘਟਨਾ ਬਾਰੇ ਲੋਕਾਂ ਨੂੰ ਦੱਸਿਆ | ਜਿਸ ਮਗਰੋਂ ਲੋਕਾਂ ਨੇ ਵਿਜੇ ਨਗਰ ਪੁਲਿਸ ਨੂੰ ਇਸ ਦੀ ਜਾਣਕਾਰੀ ਦਿੱਤੀ | ਦੂਜੇ ਪਾਸੇ ਵਿਜੇ ਨਗਰ ਪੁਲਿਸ ਨੇ ਵੀ ਫ਼ੌਰੀ ਕਾਰਵਾਈ ਕਰਦਿਆਂ ਜੰਮੂ ਜ਼ਿਲੇ੍ਹ ਦੇ ਕਾਹਨਾਚੱਕ ਇਲਾਕੇ ਦੀ ਇਕ ਗੁੱਜਰ ਬਸਤੀ 'ਚੋਂ ਸ਼ੱਕੀ ਹਾਲਤ 'ਚ ਕਾਰ ਬਰਾਮਦ ਕਰ ਲਈ ਹੈ, ਜਿਸ ਦੀਆਂ ਨੰਬਰ ਪਲੇਟਾਂ ਵੀ ਸ਼ੱਕੀਆਂ ਵਲੋਂ ਲਾਹੀਆਂ ਹੋਈਆਂ ਸਨ | ਪਰ ਉਕਤ ਸ਼ੱਕੀ ਲੋਕ ਕੌਣ ਸਨ, ਇਸ ਦੇ ਬਾਰੇ ਭੇਦ ਅਜੇ ਵੀ ਬਰਕਰਾਰ ਹੈ | ਟੈਕਸੀ ਮਾਲਕ ਵਿਕਾਸ ਗੌਰਵ ਉਰਫ ਵਿੱਕੀ ਤੇ ਕਾਰ ਚਾਲਕ ਅਜੇ ਕੁਮਾਰ ਘਟਨਾ ਬਾਰੇ ਕੈਮਰੇ ਸਾਹਮਣੇ ਕੁਝ ਵੀ ਬੋਲਣ ਲਈ ਤਿਆਰ ਨਹੀਂ ਹਨ | ਉੱਧਰ ਜਦੋਂ ਇਸ ਸਬੰਧ ਵਿਚ ਇਕ ਸਥਾਨਕ ਪੁਲਿਸ ਅਧਿਕਾਰੀ ਨਾਲ ਗੱਲ ਕੀਤੀ ਗਈ ਤਾਂ ਉਸ ਨੇ ਵੀ ਇਹ ਕਹਿ ਕੇ ਗੱਲ ਟਾਲ ਦਿੱਤੀ ਕਿ ਜੁਰਮ ਜੰਮੂ ਕਸ਼ਮੀਰ ਵਿਚ ਹੋਇਆ ਹੈ, ਇਸ ਲਈ ਜੰਮੂ ਕਸ਼ਮੀਰ ਪੁਲਿਸ ਹੀ ਇਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ | ਪਰ ਜਦੋਂ 22 ਫਰਵਰੀ ਨੂੰ ਇੱਕੋ ਦਿਨ ਵਾਪਰੀਆਂ ਦੋਵੇਂ ਘਟਨਾਵਾਂ ਦੀ ਕੋਈ ਨੇੜਤਾ ਬਾਰੇ ਪੁਲਿਸ ਅਧਿਕਾਰੀ ਨੂੰ ਪੁੱਛਿਆ ਗਿਆ ਤਾਂ ਸਿਰਫ਼ ਇੰਨਾ ਹੀ ਕਿਹਾ ਕਿ ਪੁਲਿਸ ਹਰ ਐਂਗਲ ਤੋਂ ਜਾਂਚ ਕਰ ਰਹੀ ਹੈ |

ਪੁਲਿਸ ਮੁਲਾਜ਼ਮਾਂ ਦੀ ਹੱਤਿਆ ਵਾਲੇ ਦਿਨ ਟੈਕਸੀ ਚਾਲਕ ਕੋਲੋਂ ਟੈਕਸੀ ਖੋਹਣ ਵਾਲੇ ਸ਼ੱਕੀਆਂ ਬਾਰੇ ਭੇਦ ਬਰਕਰਾਰ <br/>

ਸੰਬੰਧਿਤ ਖ਼ਬਰਾਂ