ਗੁਰਦਾਸਪੁਰ, 6 ਮਾਰਚ (ਅਸ਼ੋਕ ਸ਼ਰਮਾ)-ਗੁਰਦਾਸਪੁਰ-ਮੁਕੇਰੀਆਂ ਮੁੱਖ ਮਾਰਗ 'ਤੇ ਪੈਂਦੇ ਪਿੰਡ ਪੰਧੇਰ ਮੋੜ ਨੇੜੇ ਪੁਰਾਣਾ ਸ਼ਾਲਾ ਤੋਂ ਆਉਂਦੇ ਇਕ ਵਿਅਕਤੀ ਨੰੂ ਕਿਸੇ ਅਣਪਛਾਤੇ ਵਾਹਨ ਨੇ ਸਾਈਡ ਮਾਰ ਦਿੱਤੀ, ਜਿਸ 'ਤੇ ਉਹ ਗੰਭੀਰ ਜ਼ਖਮੀ ਹੋ ਗਿਆ | ਇਹ ਘਟਨਾ ਸ਼ਾਮ ਦੇ ਕਰੀਬ ਸਾਢੇ 6 ਵਜੇ ਵਾਪਰੀ | ਸੜਕ ਸੁਰੱਖਿਆ ਫੋਰਸ ਦੇ ਏ.ਐਸ.ਆਈ. ਸਤਪਾਲ ਤੇ ਸਿਪਾਹੀ ਹਰਪ੍ਰੀਤ ਸਿੰਘ ਨੇ ਸਰਕਾਰੀ ਐਂਬੂਲੈਂਸ ਬੁਲਾ ਕੇ ਨਿੱਜੀ ਹਸਪਤਾਲ ਵਿਖੇ ਪੀੜਤ ਨੂੰ ਦਾਖਲ ਕਰਵਾਇਆ | ਜ਼ਖਮੀ ਹੋਏ ਸੁਨਿਆਰੇ ਦੀ ਪਹਿਚਾਣ ਵਿਜੇ ਵਰਮਾ ਜੋ ਪੁਰਾਣਾ ਸਾਲਾ ਵਿਖੇ ਡਰੋਨ ਜਿਊਲਰ ਦੀ ਦੁਕਾਨ ਕਰਦਾ ਹੈ, ਸ਼ਾਮ ਸਮੇਂ ਸਕੂਟਰੀ 'ਤੇ ਆਪਣੇ ਘਰ ਗੁਰਦਾਸਪੁਰ ਪੰਜ ਪੀਰ ਵਾਲੀ ਗਲੀ ਮੁਹੱਲਾ ਆਦਰਸ਼ ਨਗਰ ਜਾ ਰਿਹਾ ਸੀ ਕਿ ਰਸਤੇ ਵਿਚ ਅਚਾਨਕ ਹਾਦਸਾ ਵਾਪਰ ਗਿਆ | ਉਸ ਦੇ ਪਿਤਾ ਜਸਪਾਲ ਸਿੰਘ ਨੇ ਦੱਸਿਆ ਕਿ ਮੇਰਾ ਲੜਕਾ ਹੁਣ ਖਤਰੇ ਤੋਂ ਬਾਹਰ ਹੈ ਤੇ ਡਾਕਟਰ ਉਸ ਦਾ ਇਲਾਜ ਕਰ ਰਹੇ ਹਨ | ਏ.ਐਸ.ਆਈ. ਸਤਪਾਲ ਸਿੰਘ ਨੇ ਦੱਸਿਆ ਕਿ ਉਹ ਘਟਨਾ ਵਾਲੀ ਜਗ੍ਹਾ 'ਤੇ ਪੁੱਜੇ ਸਨ ਅਤੇ ਇਹ ਪਤਾ ਨਹੀਂ ਲੱਗ ਸਕਿਆ ਇਹ ਵਿਅਕਤੀ ਖੁਦ ਡਿੱਗਾ ਜਾਂ ਫਿਰ ਕਿਸੇ ਵਾਹਨ ਦੀ ਲਪੇਟ ਵਿਚ ਆਇਆ ਹੈ | ਉਨ੍ਹਾਂ ਕਿਹਾ ਕਿ ਤਫਤੀਸ਼ ਜਾਰੀ ਹੈ |
