ਬਟਾਲਾ, 6 ਮਾਰਚ (ਰਾਕੇਸ਼ ਰੇਖੀ)- ਸ਼ਹਿਰ ਦੇ ਉੱਘੇ ਸਨਅਤਕਾਰ ਨਾਲ ਧੋਖਾਧੜੀ ਕਰਨ ਦੇ ਦੋਸ਼ ਤਹਿਤ ਖੰਨਾ ਦੇ ਰਹਿਣ ਵਾਲੇ ਇਕ ਸਨਅਤਕਾਰ ਖਿਲਾਫ਼ ਮਾਮਲਾ ਦਰਜ ਕੀਤਾ ਗਿਆ ਹੈ | ਥਾਣਾ ਸਿਵਲ ਲਾਈਨ ਦੇ ਏ.ਐਸ.ਆਈ. ਸੁਖਦੇਵ ਸਿੰਘ ਨੇ ਦੱਸਿਆ ਕਿ ਫਰੈਂਡਜ਼ ਕਾਲੋਨੀ ਦੇ ਰਹਿਣ ਵਾਲੇ ਰਾਜਿੰਦਰ ਕੁਮਾਰ ਉਰਫ ਰਾਜੂ ਤ੍ਰੇਹਨ ਨੇ ਸ਼ਿਕਾਹਿਤ ਦਰਜ ਕਰਵਾਈ ਕਿ ਉਸ ਦੀ ਸਹਾਬਪੁਰਾ ਵਿਖੇ ਹਾਈ ਪੁਆਇੰਟ ਮੈਟਰੋਲੋਜੀਕਲ ਕੰਪਨੀ ਹੈ | ਉਸ ਦੀ ਫੈਕਟਰੀ ਵਿਚ ਸਟੀਲ ਦਾ ਸਰੀਆ ਬਣਾਉਣ ਲਈ ਕੰਮ ਆਉਣ ਵਾਲਾ ਹੋਟ ਟੋਪ ਤੇ ਸਲੀਵ ਬਣਾਉਣ ਦਾ ਕੰਮ ਕੀਤਾ ਜਾਂਦਾ ਹੈ | ਉਸ ਦਾ ਵਪਾਰ ਕਈ ਸ਼ਹਿਰਾਂ ਦੇ ਸਨਅਤਕਾਰਾਂ ਨਾਲ ਚਲਦਾ ਹੈ | ਮੰਡੀ ਗੋਬਿੰਦਗੜ੍ਹ ਦੇ ਸਨਅਤਕਾਰ ਰੋਹਿਤ ਗਰਗ ਉਸ ਪਾਸੋਂ ਕਾਰੋਬਾਰ ਨਾਲ ਸੰਬੰਧਿਤ ਸਾਮਾਨ ਲੈ ਗਿਆ ਸੀ ਪਰ ਕੁੱਲ ਰਕਮ ਵਿਚੋਂ 3 ਲੱਖ 95 ਹਜ਼ਾਰ 869 ਰੁਪਏ ਦੀ ਬਕਾਇਆ ਰਕਮ ਵਾਪਸ ਨਹੀਂ ਕੀਤੀ | ਰਾਜੂ ਤ੍ਰੇਹਨ ਨੇ ਕਈ ਵਾਰ ਆਪਣੀ ਰਕਮ ਦਾ ਤਕਾਜਾ ਕੀਤਾ ਪਰ ਪੈਸਾ ਵਾਪਸ ਨਹੀਂ ਕੀਤਾ ਗਿਆ | ਰਾਜੂ ਤ੍ਰੇਹਨ ਦੀ ਸ਼ਿਕਾਇਤ ਦੀ ਜਾਂਚ ਡੀ.ਐਸ.ਪੀ. ਨੇ ਕੀਤੀ | ਜਾਂਚ ਤੋਂ ਬਾਅਦ ਐਸ.ਐਸ.ਪੀ. ਦੇ ਆਦੇਸ਼ 'ਤੇ ਰੋਹਿਤ ਗਰਗ ਕ੍ਰਿਸ਼ਨਾ ਨਗਰ ਅਮਲੋਹ ਰੋਡ ਖੰਨਾ ਦੇ ਖਿਲਾਫ਼ ਮਾਮਲਾ ਦਰਜ ਕੀਤਾ ਗਿਆ ਹੈ |
