ਧਾਰੀਵਾਲ, 21 ਮਈ (ਸਵਰਨ ਸਿੰਘ)-ਨਗਰ ਕੌਸਲ ਚੋਣਾਂ ਨੂੰ ਲੈ ਕੇ ਧਾਰੀਵਾਲ ਨਗਰ ਕੌਸਲ ਅੰਦਰ ਪਹਿਲੀ ਵਾਰ ਬਹੁਜਨ ਸਮਾਜ ਪਾਰਟੀ ਵੀ ਚੋਣ ਮੈਦਾਨ 'ਚ ਆਈ ਹੈ | ਦੱਸਣਯੋਗ ਹੈ ਕਿ ਨਗਰ ਕੌਂਸਲ ਧਾਰੀਵਾਲ ਦੀਆਂ 13 ਵਿਚੋਂ ਦੋ ਸੀਟਾਂ 'ਤੇ ਬਹੁਜਨ ਸਮਾਜ ਪਾਰਟੀ ਨੇ ਆਪਣੇ ਉਮੀਦਵਾਰਾਂ ਨੂੰ ਚੋਣ ਮੈਦਾਨ ਵਿਚ ਉਤਾਰਿਆ ਹੈ, ਜਿਸ 'ਚ ਵਾਰਡ ਨੰਬਰ 1 ਤੋਂ ਵੰਦਨਾ ਖੋਸਲਾ ਤੇ ਵਾਰਡ ਨੰਬਰ 13 ਤੋਂ ਰਾਜ ਕੁਮਾਰ ਬਹੁਜਨ ਸਮਾਜ ਪਾਰਟੀ ਵਲੋਂ ਚੋਣ ਲੜ ਰਹੇ ਹਨ | ਵਾਰਡ ਨੰਬਰ ਇਕ ਤੋਂ ਬਸਪਾ ਉਮੀਦਵਾਰ ਵੰਦਨਾ ਖੋਸਲਾ ਨੇ ਕਿਹਾ ਕਿ ਕੇਵਲ ਬਹੁਜਨ ਸਮਾਜ ਪਾਰਟੀ ਹਰ ਵਰਗ ਨੂੰ ਸਨਮਾਨ ਦਿੰਦੀ ਹੈ | ਉਨ੍ਹਾਂ ਕਿਹਾ ਕਿ ਉਹ ਵਾਰਡ ਲਈ ਅਜਿਹਾ ਕੰਮ ਕਰਨਗੇ ਕਿ ਅਗਲੀ ਵਾਰ ਨੂੰ ਬਹੁਜਨ ਸਮਾਜ ਪਾਰਟੀ ਸਾਰੀਆਂ ਵਾਰਡਾਂ ਵਿਚ ਚੋਣ ਲੜੇਗੀ | ਇਸ ਮੌਕੇ ਉਮੀਦਵਾਰ ਦੇ ਪਤੀ ਰਿੰਕੂ ਖੋਸਲਾ ਨੇ ਕਿਹਾ ਕਿ ਸਰਮਾਏਦਾਰ ਪਾਰਟੀਆਂ ਅਤੇ ਉਨ੍ਹਾਂ ਦੇ ਉਮੀਦਵਾਰ ਕੇਵਲ ਚੋਣਾਂ ਦੌਰਾਨ ਹੀ ਲੋਕਾਂ ਦੇ ਨੇੜੇ ਆਉਂਦੇ ਹਨ, ਪਰ ਬਾਅਦ ਵਿਚ ਲੋਕਾਂ ਨੂੰ ਲੱਭਦੇ ਤੱਕ ਨਹੀਂ | ਉਨ੍ਹਾਂ ਕਿਹਾ ਕਿ ਬਹੁਜਨ ਸਮਾਜ ਪਾਰਟੀ ਧਰਮਾਂ ਵਿਚ ਵੰਡੀਆਂ ਨਹੀਂ ਪਾਉਂਦੀ, ਜਿਸ ਕਰਕੇ ਬਸਪਾ ਦੀ ਉਮੀਦਵਾਰ ਵਜੋਂ ਚੋਣ ਲੜ ਰਹੇ ਹਾਂ |
