ਸ਼ਾਹਪੁਰ ਕੰਢੀ, 21 ਮਈ (ਰਣਜੀਤ ਸਿੰਘ)-ਸ਼ਾਹਪੁਰ ਕੰਢੀ ਡੈਮ ਤੋਂ ਦਸੰਬਰ ਤੱਕ ਬਿਜਲੀ ਉਤਪਾਦਨ ਦੀ ਪੂਰੀ ਤਰ੍ਹਾਂ ਉਮੀਦ ਬਣੀ ਹੋਈ ਹੈ | ਅੱਜ ਸ਼ਾਹਪੁਰ ਕੰਢੀ ਡੈਮ ਦੇ ਪਾਵਰ ਹਾਊਸਾਂ ਵੱਲ ਜਾਣ ਵਾਲੀ ਨਹਿਰ 'ਚ ਪਹਿਲੀ ਵਾਰ ਪਾਣੀ ਛੱਡ ਕੇ ਟੈਸਟਿੰਗ ਕੀਤੀ ਗਈ | ਪਾਣੀ ਪਾਵਰ ਹਾਊਸ ਨੰਬਰ ਇਕ ਦੇ ਇਨਟੇਕ ਤੱਕ ਪਹੁੰਚ ਗਿਆ | ਸ਼ਾਹਪੁਰ ਡੈਮ ਦੇ ਕਾਰਜਕਾਰੀ ਇੰਜੀਨੀਅਰ ਹੈਡ ਕਵਾਟਰ ਲਖਵਿੰਦਰ ਸਿੰਘ ਨੇ ਦੱਸਿਆ ਕਿ ਸ਼ਾਹਪੁਰ ਕੰਢੀ ਡੈਮ ਤੋਂ ਦਸੰਬਰ ਮਹੀਨੇ ਤੱਕ ਬਿਜਲੀ ਉਤਪਾਦਨ ਦੀ ਉਮੀਦ ਬਣੀ ਹੋਈ ਹੈ | ਜਿਸ ਕਾਰਨ ਅੱਜ 7 ਕਿਊਸਿਕ ਪਾਣੀ ਛੱਡ ਕੇ ਨਹਿਰ ਦੀ ਟੈਸਟਿੰਗ ਕੀਤੀ ਗਈ | ਹੁਣ ਹਰ ਰੋਜ਼ ਪਾਣੀ ਛੱਡ ਕੇ ਟੈਸਟਿੰਗ ਲਈ ਪਾਵਰ ਹਾਊਸਾਂ ਤੱਕ ਭੇਜਿਆ ਜਾਵੇਗਾ ਤਾਂ ਜੋ ਸਥਿਤੀ ਦੀ ਪੂਰੀ ਜਾਣਕਾਰੀ ਹਾਸਲ ਕੀਤੀ ਜਾ ਸਕੇ | ਉਨ੍ਹਾਂ ਦੱਸਿਆ ਕਿ ਪਾਵਰ ਹਾਊਸ ਨੰੂ ਪਾਣੀ ਛੱਡਣ ਲਈ ਛੇ ਗੇਟ ਬਣਾਏ ਗਏ ਹਨ | ਜਿਨ੍ਹਾਂ 'ਚੋਂ 3 ਗੇਟਾਂ ਦਾ ਪਾਣੀ ਬਾਈਪਾਸ ਹੋ ਕੇ ਗੇਟਾਂ ਤੱਕ ਜਾਂਦਾ ਹੈ | ਇਸ ਸਮੇਂ ਬਾਈਪਾਸ ਵਾਲ ਇਕ ਗੇਟ ਅੱਧਾ ਮੀਟਰ ਚੱਕ ਕੇ ਟੈਸਟਿੰਗ ਕੀਤੀ ਗਈ | ਸ਼ਾਹਪੁਰ ਕੰਢੀ ਡੈਮ ਦੇ ਨਿਰਮਾਣ ਤੋਂ 206 ਮੈਗਾਵਾਟ ਬਿਜਲੀ ਉਤਪਾਦਨ ਕੀਤਾ ਜਾਵੇਗਾ |
