ਬਟਾਲਾ, 28 ਮਈ (ਸਤਿੰਦਰ ਸਿੰਘ)-ਸ਼੍ਰੋਮਣੀ ਅਕਾਲੀ ਦਲ ਦੇ ਮੀਤ ਪ੍ਰਧਾਨ ਅਤੇ ਵਿਧਾਨ ਸਭਾ ਹਲਕਾ ਬਟਾਲਾ ਦੇ ਇੰਚਾਰਜ ਨਰੇਸ਼ ਮਹਾਜਨ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਨੂੰ ਬਟਾਲਾ ਵਿਚ ਨਗਰ ਨਿਗਮ ਚੋਣਾਂ ਦੌਰਾਨ ਲੋਕਾਂ ਨੇ ਪੂਰੀ ਤਰਾਂ ਨਾਕਾਰ ਦਿੱਤਾ ਸੀ, ਜਿਸ ਕਰ ਕੇ ਇਥੋਂ ਦੇ ਵਿਧਾਇਕ ਨੇ ਭਾਜਪਾ ਨਾਲ ਕਥਿਤ ਮਿਲੀਭੁਗਤ ਕਰ ਕੇ ਚੋਣਾਂ ਲੜੀਆਂ ਹਨ, ਜਿਸ ਦੇ ਉਨਾਂ ਕੋਲ ਪੁਖ਼ਤਾ ਸਬੂਤ ਵੀ ਹਨ ਅਤੇ ਸਮਾਂ ਆਉਣ 'ਤੇ ਉਹ ਮੀਡੀਆ ਰਾਹੀਂ ਜੱਗ-ਜਾਹਿਰ ਵੀ ਕਰਨਗੇ | ਉਨਾਂ ਕਿਹਾ ਕਿ ਬਟਾਲਾ ਵਿਚ ਪਿਛਲੇ ਸਾਢੇ 4 ਸਾਲ ਤੋਂ ਕੋਈ ਵਿਕਾਸ ਕੰਮ ਨਹੀਂ ਹੋਇਆ ਤੇ ਜਿਸ ਤਰਾਂ ਲੁੱਟਾਂ-ਖੋਹਾਂ ਤੇ ਫਿਰੌਤੀਆਂ ਦੀਆਂ ਵਾਰਦਾਤਾਂ ਵਧੀਆਂ ਹਨ, ਉਸ ਨਾਲ ਸ਼ਹਿਰ ਵਾਸੀਆਂ ਵਿਚ ਡਰ ਦਾ ਮਾਹੌਲ ਸੀ ਅਤੇ ਸ਼ਹਿਰ ਵਾਸੀ ਆਮ ਆਦਮੀ ਪਾਰਟੀ ਦੀ ਸਰਕਾਰ ਤੋਂ ਅੱਕੇ ਬੈਠੇ ਸਨ | ਉਨਾਂ ਕਿਹਾ ਕਿ ਵਿਧਾਇਕ ਜੋ ਕਿ ਵਿਕਾਸ ਦੇ ਦਮਗਜੇ ਮਾਰਦਾ ਹੈ, ਜੇਕਰ ਆਪਣੇ ਕੰਮਾਂ 'ਤੇ ਏਨਾ ਹੀ ਯਕੀਨ ਸੀ ਤਾਂ ਫਿਰ ਭਾਜਪਾ ਨਾਲ ਲੁਕ-ਛਿਪ ਕੇ ਉਨਾਂ ਦੀ ਮਦਦ ਲੈਣ ਦੀ ਕਿਉਂ ਲੋੜ ਪੈ ਗਈ | ਹਲਕਾ ਇੰਚਾਰਜ ਨੇ ਕਿਹਾ ਕਿ ਵਿਧਾਇਕ ਵਲੋਂ ਆਪਣੇ ਰਿਸ਼ਤੇਦਾਰਾਂ ਦੇ ਵਾਰਡਾਂ ਵਿਚ ਜਿਸ ਤਰਾਂ ਭਾਜਪਾ ਲੋਕਾਂ ਕੋਲੋਂ ਮਦਦ ਲਈ ਗਈ ਅਤੇ ਹਰ ਹੀਲਾ ਵਰਤਦਿਆਂ ਵੋਟਰਾਂ ਨੂੰ ਲਾਲਚ ਤੇ ਡਰਾਵੇ ਦਿੱਤੇ ਗਏ, ਉਸ ਨੇ ਲੋਕਤੰਤਰ ਪੂਰੀ ਤਰਾਂ ਲਤਾੜ ਕੇ ਰੱਖ ਦਿੱਤਾ ਹੈ ਅਤੇ ਜਿਸ ਤਰਾਂ ਉਸ ਦੇ ਹਮਾਇਤੀਆਂ ਵਲੋਂ ਵੱਡੇ ਪੱਧਰ 'ਤੇ ਵਾਰਡਾਂ ਵਿਚ ਪੈਸੇ ਤੇ ਹੋਰ ਸਮੱਗਰੀ ਵੰਡੀ ਗਈ, ਉਸ ਨੇ ਸਾਬਤ ਕਰ ਦਿੱਤਾ ਹੈ ਕਿ ਆਮ ਆਦਮੀ ਪਾਰਟੀ ਨੂੰ ਲੋਕਾਂ ਨੇ ਪੂਰੀ ਤਰਾਂ ਨਾਕਾਰ ਦਿੱਤਾ ਹੈ | ਉਨਾਂ ਕਿਹਾ ਕਿ ਆਉਣ ਵਾਲੇ ਚੋਣ ਨਤੀਜੇ ਸ਼੍ਰੋਮਣੀ ਅਕਾਲੀ ਦਲ ਦੇ ਹੱਕ ਵਿਚ ਹੋਣਗੇ |
