ਬਟਾਲਾ, 10 ਜੂਨ (ਸਤਿੰਦਰ ਸਿੰਘ)-ਫੌਡਰੀ ਤੇ ਵਰਕਸ਼ਾਪ ਵਰਕਰ ਯੂਨੀਅਨ (ਏਕਟੂ) ਨੇ ਅੱਜ ਬਟਾਲੇ ਦੀਆਂ ਦਰਜਨਾਂ ਫੌਡਰੀਆਂ 'ਚ ਹੜਤਾਲ ਕਰਕੇ ਸਹਾਇਕ ਕਿਰਤ ਕਮਿਸ਼ਨਰ ਬਟਾਲਾ ਦੇ ਦਫ਼ਤਰ ਵਿਖੇ ਧਰਨਾ ਦਿੱਤਾ | ਇਸ ਮੌਕੇ ਮਜ਼ਦੂਰ ਆਗੂ ਫੂਲ ਚੰਦ, ਪ੍ਰੇਮ ਮਸੀਹ, ਸੋਨਾ ਤੇ ਲਿਬਰੇਸ਼ਨ ਦੇ ਸੂਬਾ ਸਕੱਤਰ ਕਾ. ਗੁਰਮੀਤ ਸਿੰਘ ਬਖਤਪੁਰ ਨੇ ਕਿਹਾ ਕਿ ਬਟਾਲੇ ਦੇ ਫੌਡਰੀ ਮਜ਼ਦੂਰਾਂ ਦੀਆਂ ਉਜਰਤਾਂ 'ਚ 15 ਫੀਸਦ ਦਾ ਵਾਧਾ ਕੀਤਾ ਜਾਵੇ, ਹਾਜ਼ਰੀ ਕਾਰਡ ਲਾਜ਼ਮੀ ਕੀਤੇ ਜਾਣ, ਫੈਕਟਰੀਆਂ ਵਿਚ ਸਾਫ ਪਾਣੀ, ਫਲੱਸ਼ ਤੇ ਬਾਥਰੂਮ ਦਾ ਯੋਗ ਪ੍ਰਬੰਧ ਕੀਤਾ ਜਾਵੇ, ਬਟਾਲੇ ਦੇ 95 ਫੀਸਦੀ ਮਜ਼ਦੂਰ ਦੇ ਕੋਈ ਈਐਸਆਈ ਕਾਰਡ ਨਹੀਂ ਬਣਾਏ ਗਏ ਹਨ, ਜਦੋਂ ਕਿ ਮਜ਼ਦੂਰ ਦਹਾਕਿਆਂ ਤੋਂ ਇਨ੍ਹਾਂ ਫੈਕਟਰੀਆਂ ਵਿਚ ਕੰਮ ਕਰ ਰਹੇ ਹਨ ਅਤੇ ਅਕਸਰ ਉਹ ਜਾਂ ਉਨ੍ਹਾਂ ਦੇ ਪਰਿਵਾਰ ਬਿਮਾਰੀਆਂ ਦੀ ਮਾਰ ਝੱਲਦੇ ਰਹਿੰਦੇ ਹਨ, ਜੇਕਰ ਸਬੰਧਿਤ ਦਫਤਰ ਵਰਕਰਾਂ ਦਾ ਈਐੱਸਆਈ ਬੀਮਾ ਕਰੇ ਤਾਂ ਉਨ੍ਹਾਂ ਨੂੰ ਬਹੁਤ ਵੱਡੀ ਰਾਹਤ ਮਿਲ ਸਕਦੀ ਹੈ | ਆਗੂਆਂ ਨੇ ਕਿਰਤ ਕਮਿਸ਼ਨਰ ਪੰਜਾਬ, ਡਾਇਰੈਕਟਰ ਈਐਸਆਈ ਚੰਡੀਗੜ੍ਹ, ਡਾਇਰੈਕਟਰ ਪ੍ਰੋਵੀਡੈਂਟ ਫੰਡ ਦੇ ਨਾਂਅ ਮੰਗ ਪੱਤਰ ਭੇਜ ਕਿ ਮੰਗ ਕੀਤੀ ਹੈ ਕਿ ਬਟਾਲੇ ਦੇ ਫੌਡਰੀ ਮਜ਼ਦੂਰਾਂ ਲਈ ਕਿਰਤ ਕਾਨੂੰਨਾਂ ਨੂੰ ਲਾਗੂ ਕਰਾਉਣ ਲਈ ਬਟਾਲੇ ਦੇ ਸੰਬੰਧਿਤ ਅਫ਼ਸਰਾਂ ਨੂੰ ਸਖਤ ਹਦਾਇਤਾਂ ਕੀਤੀਆਂ ਜਾਣ | ਰੈਲੀ 'ਚ ਫੈਸਲਾ ਲਿਆ ਗਿਆ ਕਿ ਬਟਾਲੇ ਦੇ ਫੌਡਰੀ ਵਰਕਰਾਂ ਦੀਆਂ ਸਮੁੱਚੀਆਂ ਮੰਗਾਂ ਮਨਾਉਣ ਲਈ ਸੰਘਰਸ਼ ਨੂੰ ਲਗਾਤਾਰ ਸ਼ੁਰੂ ਕੀਤਾ ਜਾਵੇਗਾ | ਰੈਲੀ ਵਿਚ ਵਕੀਲ ਕਰਮਜੀਤ ਸਿੰਘ, ਜੀਤ ਲਾਲ ਤੇ ਰਾਜੂ ਬਟਾਲਾ ਨੇ ਵੀ ਵਿਚਾਰ ਰੱਖੇ |
