ਕਾਦੀਆਂ, 26 ਜੁਲਾਈ (ਕੁਲਵਿੰਦਰ ਸਿੰਘ)-ਪੰਜਾਬ ਭਰ ਅੰਦਰ ਸਫ਼ਾਈ ਸੇਵਕਾਂ ਮਨਰੇਗਾ ਮਜ਼ਦੂਰਾਂ ਦਾ ਚੱਲ ਰਹੇ ਸੰਘਰਸ਼ ਅਤੇ ਅਤੇ ਆਮ ਲੋਕਾਂ ਦੇ ਮਸਲਿਆਂ ਦੇ ਹੱਲ ਲਈ ਅੱਜ ਕਿਸਾਨ ਮਜ਼ਦੂਰ ਸੰਘਰਸ਼ ਕਮੇਟੀ ਪੰਜਾਬ ਦੇ ਸੱਦੇ ’ਤੇ ਜ਼ੋਨ ਬਾਬਾ ਮੱਕਾ ਸਾਹਿਬ ਵਲੋਂ ਕਾਦੀਆਂ-ਬਟਾਲਾ ਰੋਡ ਉਤੇ ਡੱਲਾ ਮੋੜ ਵਿਖੇ ਪੰਜਾਬ ਸਰਕਾਰ ਤੇ ਮੁੱਖ ਮੰਤਰੀ ਪੰਜਾਬ ਭਗਵੰਤ ਮਾਨ ਦਾ ਪੁਤਲਾ ਫ਼ੂਕ ਕੇ ਰੋਸ ਪ੍ਰਦਰਸ਼ਨ ਕੀਤਾ ਗਿਆ। ਬੀਤੇ ਦਿਨ ਸਫ਼ਾਈ ਸੇਵਕਾਂ ’ਤੇ ਬਰਨਾਲਾ ਵਿਖੇ ਪੁਲਿਸ ਵਲੋਂ ਕੀਤੇ ਭਾਰੀ ਲਾਠੀਚਾਰਜ ਤੇ ਤਸ਼ੱਦਦ ਦਾ ਰੋਸ ਵੀ ਪ੍ਰਗਟ ਕੀਤਾ ਗਿਆ। ਇਸ ਦੇ ਨਾਲ ਹੀ ਨਵੀਂ ਦਿੱਲੀ ਜੰਤਰ-ਮੰਤਰ ਵਿਖੇ ਆਪਣੇ ਹੱਕਾਂ ਲਈ ਲੰਮੇ ਸਮੇਂ ਤੋਂ ਸੰਘਰਸ਼ ਕਰ ਰਹੇ ਦੇਸ਼ ਭਰ ਤੋਂ ਇਕੱਠੇ ਹੋਏ ਵਿਦਿਆਰਥੀਆਂ ਦੀਆਂ ਮੰਗਾਂ ਮੰਨਣ ’ਤੇ ਕਿਸਾਨ ਜਥੇਬੰਦੀ ਵਲੋਂ ਸਮੂਹ ਵਿਦਿਆਰਥੀ ਅਤੇ ਨੌਜਵਾਨ ਵਰਗ ਨੂੰ ਵਧਾਈ ਭੇਟ ਕੀਤੀ। ਉਨ੍ਹਾਂ ਪੰਜਾਬ ਅੰਦਰ ਬਿਜਲੀ ਕਾਮੇ, ਸਫ਼ਾਈ ਸੇਵਕ, ਮਨਰੇਗਾ ਮਜ਼ਦੂਰਾਂ ਸਮੇਤ ਮਿਹਨਤਕਸ਼ ਵਰਗ ਦੇ ਮਸਲੇ ਵੀ ਪੰਜਾਬ ਸਰਕਾਰ ਨੂੰ ਜਲਦੀ ਹੱਲ ਕਰਨ ਦੀ ਅਪੀਲ ਕੀਤੀ। ਆਗੂਆਂ ਨੇ ਕਿਹਾ ਕਿ ਜੇਕਰ ਆਉਂਦੇ ਸਮੇਂ ਵਿਚ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਵਲੋਂ ਇਨ੍ਹਾਂ ਸਾਰੇ ਸੰਘਰਸ਼ ਕਰ ਰਹੇ ਵਰਗਾਂ ਦੀਆਂ ਮੰਗਾਂ ਜਲਦੀ ਨਾ ਪ੍ਰਵਾਨ ਕੀਤੀਆਂ ਤਾਂ ਕਿਸਾਨ ਜਥੇਬੰਦੀ ਸੰਗਠਿਤ ਸੰਘਰਸ਼ ਕਰਨ ਲਈ ਕਰਨ ਲਈ ਮਜਬੂਰ ਹੋਵੇਗੀ, ਜਿਸ ਦੀ ਜ਼ਿੰਮੇਵਾਰ ਪੰਜਾਬ ਸਰਕਾਰ ਹੋਵੇਗੀ। ਇਸ ਮੌਕੇ ਜ਼ੋਨ ਸੀਨੀਅਰ ਮੀਤ ਪ੍ਰਧਾਨ ਪ੍ਰੀਤਮ ਸਿੰਘ ਭੰਗਵਾਂ ਦੇ ਨਾਲ ਗੁਰਮੇਜ ਸਿੰਘ ਥਿੰਦ, ਬਾਬਾ ਸੁਖਦੇਵ ਸਿੰਘ ਨੱਤ ਪ੍ਰੱੈਸ ਸਕੱਤਰ, ਹਰਜੀਤ ਸਿੰਘ ਧਾਰੀਵਾਲ, ਮੰਗਲ ਸਿੰਘ ਲੀਲ੍ਹ ਕਲਾਂ, ਬਲਕਾਰ ਸਿੰਘ ਨਾਥਪੁਰਾ, ਗੁਰਲਾਲ ਸਿੰਘ ਕੋਟਲਾ ਨਵਾਬ, ਭਜਨ ਸਿੰਘ ਨੱਤ, ਸਤਨਾਮ ਸਿੰਘ ਬਸਰਾਵਾਂ, ਡਾ. ਸੁਖਬੀਰ ਸਿੰਘ ਸਲਾਹਪੁਰ ਆਦਿ ਹਾਜ਼ਰ ਸਨ।
