ਅਬੋਹਰ, 23 ਅਪ੍ਰੈਲ (ਤੇਜਿੰਦਰ ਸਿੰਘ ਖ਼ਾਲਸਾ/ਸੁਖਜੀਤ ਸਿੰਘ ਬਰਾੜ)-ਸਥਾਨਕ ਵਿਧਾਇਕ ਸੰਦੀਪ ਜਾਖੜ ਨੇ ਅੱਜ ਨਵੀਂ ਅਨਾਜ ਮੰਡੀ ਦਾ ਅਚਾਨਕ ਦੌਰਾ ਕੀਤਾ | ਜਿੱਥੇ ਉਨ੍ਹਾਂ ਨੇ ਨਾ ਸਿਰਫ਼ ਕਿਸਾਨਾਂ ਅਤੇ ਕਮਿਸ਼ਨ ਏਜੰਟਾਂ ਦੀ ਦੁਰਦਸ਼ਾ ਸੁਣੀ ਸਗੋਂ ਮੌਜੂਦਾ ਸੂਬਾ ਸਰਕਾਰ ਦੀਆਂ ਪ੍ਰਸ਼ਾਸਨਿਕ ਨਾਕਾਮੀਆਂ ਦਾ ਵੀ ਪਰਦਾਫਾਸ਼ ਕੀਤਾ | ਵਿਧਾਇਕ ਸੰਦੀਪ ਜਾਖੜ ਨੇ ਸਪਸ਼ਟ ਤੌਰ 'ਤੇ ਕਿਹਾ ਮੰਡੀਆਂ ਦੀ ਦੁਰਦਸ਼ਾ ਸਿਰਫ਼ ਇਕ ਪ੍ਰਸ਼ਾਸਨਿਕ ਚੁੱਕ ਨਹੀਂ ਹੈ ਸਗੋਂ ਪੂਰੀ ਤਰ੍ਹਾਂ ਸਰਕਾਰੀ ਅਸਫਲਤਾ ਹੈ | ਉਨ੍ਹਾਂ ਕਿਹਾ ਕਿ ਸਰਕਾਰ ਕੋਲ ਕਿਸਾਨਾਂ ਲਈ ਨਾ ਤਾਂ ਦੂਰਅੰਦੇਸ਼ੀ ਹੈ ਅਤੇ ਨਾ ਹੀ ਕੋਈ ਠੋਸ ਨੀਤੀ | ਜਿਸ ਦੇ ਨਤੀਜੇ ਅੱਜ ਸੂਬੇ ਦੇ ਕਿਸਾਨ ਭੁਗਤ ਰਹੇ ਹਨ ਅਤੇ ਪੰਜਾਬ ਦੇ ਭੋਜਨ ਪ੍ਰਦਾਤਾ ਦੀ ਸਥਿਤੀ ਅੱਜ ਖ਼ੁਦ ਹੰਝੂ ਵਹਾ ਰਹੀ ਹੈ | ਮੰਡੀ ਵਿਚ ਕਣਕ ਦੀ ਬੋਰੀਆਂ ਦੇ ਪਹਾੜਾਂ ਵੱਲ ਇਸ਼ਾਰਾ ਕਰਦਿਆਂ ਜਾਖੜ ਨੇ ਕਿਹਾ ਹੱਜੇ ਤੱਕ ਸੀਜ਼ਨ ਆਪਣੇ ਸਿਖਰ 'ਤੇ ਨਹੀਂ ਪਹੁੰਚਿਆ ਹੈ | ਇਸ ਵੇਲੇ ਮੰਡੀ ਵਿਚ ਸਿਰਫ਼ 40 ਫ਼ੀਸਦੀ ਫ਼ਸਲ ਹੀ ਆਈ ਹੈ, ਫਿਰ ਵੀ ਸਰਕਾਰ ਪਹਿਲਾਂ ਹੀ ਬੋਝ ਹੇਠ ਦੱਬੀ ਹੋਈ ਹੈ | ਮੰਡੀ ਦੇ ਹਰ ਇੰਚ 'ਤੇ ਕਣਕ ਦੀਆ ਬੋਰੀਆਂ ਦੇ ਢੇਰ ਲੱਗੇ ਹੋਏ ਹਨ | ਲਿਫ਼ਟਿੰਗ ਪ੍ਰਕਿਰਿਆ ਇੰਨੀ ਹੋਲੀ ਹੈ ਕਿ ਆਪਣੀ ਨਵੀਂ ਫ਼ਸਲ ਲਿਆਉਣ ਵਾਲੇ ਕਿਸਾਨਾਂ ਨੂੰ ਆਪਣੀਆਂ ਟਰਾਲੀਆਂ ਪਾਰਕ ਕਰਨ ਲਈ ਘੰਟਿਆਂ ਬੱਧੀ ਇੰਤਜ਼ਾਰ ਕਰਨਾ ਪੈਂਦਾ ਹੈ | ਜਾਖੜ ਨੇ ਸਰਕਾਰ ਦੀ ਆਲੋਚਨਾ ਕਰਦਿਆਂ ਕਿਹਾ ਕਿ ਉਹੀ ਸਰਕਾਰ ਜੋ ਵੱਡੇ-ਵੱਡੇ ਇਸ਼ਤਿਹਾਰਾਂ ਵਿਚ ਸੁਚਾਰੂ ਖ਼ਰੀਦ ਦਾ ਮਾਣ ਕਰਦੀ ਸੀ ਹੁਣ ਅੱਜ ਠੇਕੇਦਾਰਾਂ ਅੱਗੇ ਇਕ ਬੋਰੀ ਵੀ ਚੁੱਕਣ ਲਈ ਬੇਵੱਸ ਨਜ਼ਰ ਆ ਰਹੀ ਹੈ | ਵਿਧਾਇਕ ਸੰਦੀਪ ਜਾਖੜ ਨੇ ਸਪਸ਼ਟ ਕੀਤਾ ਕਿ ਉਹ ਕਿਸਾਨਾਂ ਨਾਲ ਮੋਢੇ ਨਾਲ ਮੋਢਾ ਜੋੜ ਕੇ ਖੜ੍ਹੇ ਹਨ ਅਤੇ ਸਰਕਾਰ ਦੀ ਇਸ ਤਾਨਾਸ਼ਾਹੀ ਦਾ ਵਿਰੋਧ ਕਰਦੇ ਹਨ ਅਤੇ ਅਣਗਹਿਲੀ ਬਰਦਾਸ਼ਤ ਨਹੀਂ ਕੀਤੀ ਜਾਵੇਗੀ | ਇਸ ਮੌਕੇ ਆੜ੍ਹਤੀਆਂ ਐਸੋਸੀਏਸ਼ਨ ਦੇ ਸਾਬਕਾ ਪ੍ਰਧਾਨ ਅਨਿਲ ਨਾਗੋਰੀ, ਸੁਖਮੰਦਰ ਸਿੰਘ ਨੀਟੂ, ਅਸ਼ੋਕ ਸਿੰਗਲਾ, ਨੀਰਜ ਗੋਦਾਰਾ, ਵਿਜੈ ਛਾਬੜਾ, ਸਤਪਾਲ ਤਰਮਾਲਾ, ਅਸ਼ਵਨੀ ਸੇਤੀਆ, ਸੁਭਾਸ਼ ਗਾਂਧੀ, ਗੋਲਡੀ ਬਾਂਸਲ, ਗੌਰਵ ਨਾਗੋਰੀ, ਸ਼ਾਲੂ ਗੋਇਲ, ਵਿਜੈ ਪੇੜੀਵਾਲ, ਜਗਤ ਪੇੜੀਵਾਲ, ਪਿ੍ੰਸ ਕੰਬੋਜ, ਪਿਆਰੇ ਲਾਲ, ਜਸ਼ਨ ਸਿੰਘ, ਬੈਜ ਨਾਥ ਮੱਕੜ, ਡੱਬੂ ਮੁਟਨੇਜਾ, ਰਾਕੇਸ਼ ਕੁਮਾਰ, ਸ਼ੰਕੀ ਸਿੰਘ, ਕੁਲਦੀਪ ਸਿੰਘ, ਪਨਸਪ ਤੋਂ ਮਨੋਜ ਕੁਮਾਰ, ਪਨਗ੍ਰੇਨ ਤੋਂ ਭੁਪਿੰਦਰ ਸਿੰਘ, ਪਵਨ ਸਿੰਗਲਾ, ਵੇਅਰਹਾਉਸ ਤੋਂ ਬਲਵੀਰ ਸਿੰਘ, ਵਿਜੈ ਕਟਾਰੀਆ, ਮਾਰਕੀਟ ਕਮੇਟੀ ਤੋਂ ਸੁਮਿਤ ਅੱਤਰੀ ਆਦਿ ਮੌਜੂਦ ਸਨ |
