ਬੱਲੂਆਣਾ, 15 ਜੂਨ (ਜਸਮੇਲ ਸਿੰਘ ਢਿੱਲੋਂ)-ਸੀਤੋ ਗੁੰਨ੍ਹੋਂ ਇਲਾਕੇ ‘ਚ ਤਿੰਨ ਨਵੀਆਂ ਬਣ ਰਹੀਆਂ ਸੜਕਾਂ ‘ਤੇ ਸਬੰਧਿਤ ਠੇਕੇਦਾਰ ਵਲੋਂ ਮੋਟਾ ਪੱਥਰ ਪਾ ਕੇ ਛੱਡ ਦਿੱਤਾ ਹੈ। ਜਿਸ ਨਾਲ ਜਿੱਥੇ ਆਉਣ ਜਾਣ ਵਾਲੇ ਸਾਧਨ ਪਰੇਸ਼ਾਨ ਹੋ ਰਹੇ ਹਨ ਉੱਥੇ ਉਕਤ ਸੜਕਾਂ ‘ਤੇ ਬੱਸਾਂ ਦਾ ਆਉਣਾ ਜਾਣਾ ਵੀ ਬੰਦ ਹੋਇਆ ਪਿਆ ਹੈ। ਸੜਕਾਂ ਨਾਲ ਲਗਦੇ ਸਬੰਧਿਤ ਪਿੰਡਾਂ ਦੇ ਲੋਕਾਂ ਨੇ ਦੱਸਿਆ ਕਿ ਸਬੰਧਿਤ ਠੇਕੇਦਾਰ ਵਲੋਂ ਪਿਛਲੇ 15 ਦਿਨਾਂ ਤੋਂ ਮੋਟਾ ਪੱਥਰ ਪਾ ਕੇ ਛੱਡ ਦਿੱਤਾ ਗਿਆ ਹੈ ਅਤੇ ਅੱਜ ਤੱਕ ਮੁੜ ਕੇ ਕਿਸੇ ਨੇ ਸੜਕ ਦੀ ਸਾਰ ਨਹੀਂ ਲਈ। ਆਉਣ ਜਾਣ ਵਾਲੇ ਸਾਧਨ ਖੱਜਲ ਖ਼ੁਆਰ ਹੋ ਰਹੇ ਹਨ। ਇਲਾਕੇ ਦੇ ਲੋਕਾਂ ਨੂੰ ਭਾਰੀ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਹਿੰਮਤਪੁਰਾ ਤੋਂ ਬਜੀਦਪੁਰ ਭੋਮਾ 5 ਕਿੱਲੋਮੀਟਰ, ਬਜੀਦਪੁਰ ਭੋਮਾ ਤੋਂ ਚੱਕ ਮੋਡੀ ਖੇੜਾ 3 ਕਿੱਲੋਮੀਟਰ ਅਤੇ ਤਰਮਾਲਾ ਤੋਂ ਖੁੱਬਣ 4 ਕਿੱਲੋਮੀਟਰ ਮੋਟਾ ਪੱਥਰ ਪਾ ਕੇ ਠੇਕੇਦਾਰ ਵਲੋਂ ਇਨ੍ਹਾਂ ਸੜਕਾਂ ਦੀ ਸਾਰ ਨਹੀਂ ਲਈ ਜਾ ਰਹੀ।
