ਅੰਮਿ੍ਤਸਰ, 1 ਫ਼ਰਵਰੀ (ਹਰਮਿੰਦਰ ਸਿੰਘ)-ਪੰਜਾਬ ਨਾਟਸ਼ਾਲਾ ਦੇ ਸੰਸਥਾਪਕ ਸ਼ੋ੍ਰਮਣੀ ਨਾਟਕਕਾਰ ਜਤਿੰਦਰ ਬਰਾੜ ਨੂੰ ਉਨ੍ਹਾਂ ਦੀ ਕਰਮਭੂਮੀ ਪੰਜਾਬ ਨਾਟਸ਼ਾਲਾ ਵਿਖੇ ਕਲਾਕਾਰਾਂ, ਬੁਧੀਜੀਵੀਆਂ , ਲੇਖਕਾਂ ਅਤੇ ਹੋਰ ਸ਼ਖ਼ਸੀਅਤਾਂ ਵਲੋਂ ਸ਼ੋਕ ਸਭਾ ਕੀਤੀ ਗਈ ਜਿਸ ਦੌਰਾਨ ਜਤਿੰਦਰ ਬਰਾੜ ਨੂੰ ਭਾਵਭਿੰਨੀ ਸ਼ਰਧਾਂਜਲੀ ਦਿੱਤੀ ਗਈ | ਇਸ ਮੌਕੇ 'ਤੇ ਜਤਿੰਦਰ ਬਰਾੜ ਦੇ ਬੇਟੇ ਅਮੁਲਦੀਪ ਸਿੰਘ ਅਤੇ ਅਭਿਜੀਤ ਸਿੰਘ ਵੀ ਮੌਜੂਦ ਸਨ | ਇਸ ਦੌਰਾਨ ਸੰਬੋਧਨ ਕਰਦੇ ਹੋਏ ਬੁਧੀਜੀਵੀ ਹਰਭਜਨ ਸਿੰਘ ਭਾਟੀਆ ਨੇ ਉਨ੍ਹਾਂ ਨੂੰ ਯਾਦ ਕਰਦੇ ਹੋਏ ਕਿਹਾ ਕਿ ਜਤਿੰਦਰ ਬਰਾੜ ਨੇ ਭਾਈ ਗੁਰਸ਼ਰਨ ਸਿੰਘ ਦੇ ਦੇਹਾਂਤ ਤੋਂ ਬਾਅਦ ਥੀਏਟਰ ਜਗਤ 'ਚ ਆਏ ਖਲਾਅ ਨੂੰ ਭਰ ਦਿੱਤਾ | ਪਿਆਰ, ਸ਼ਾਂਤੀ, ਵਿਸ਼ਵਾਸ, ਆਤਮਵਿਸ਼ਵਾਸ, ਅਨੁਸ਼ਾਸਨ ਅਤੇ ਆਦਰਸ਼ਾਂ ਦੇ ਪ੍ਰਤੀਕ ਸਨ ਸਵਰਗੀ ਬਰਾੜ ਜਿਨ੍ਹਾਂ ਨੇ ਪੰਜਾਬ ਰੰਗਮੰਚ ਨੂੰ ਇਕ ਨਵੀਂ ਦਿਸ਼ਾ ਦਿੱਤੀ | ਸ਼ੋ੍ਰਮਣੀ ਨਾਟਕਕਾਰ ਅਤੇ ਵਿਰਸਾ ਵਿਹਾਰ ਸੁਸਾਇਟੀ ਦੇ ਪ੍ਰਧਾਨ ਕੇਵਲ ਧਾਲੀਵਾਲ ਨੇ ਕਿਹਾ ਕਿ ਜਤਿੰਦਰ ਬਰਾੜ ਦਾ ਰੰਗਮੰਚ ਲਈ ਇਕ ਸੁਪਨਾ ਸੀ ਅਤੇ ਜਿਸ ਨੂੰ ਉਨ੍ਹਾਂ ਪੂਰਾ ਕਰਕੇ ਦਿਖਾਇਆ | ਉਨ੍ਹਾਂ ਕਿਹਾ ਕਿ ਜਤਿੰਦਰ ਬਰਾੜ ਕਲਾਕਾਰਾਂ ਦੀਆਂ ਜ਼ਰੂਰਤਾਂ ਨੂੰ ਸਮਝਦੇ ਸਨ | ਪੰਜਾਬ ਨਾਟਸ਼ਾਲਾ ਉਨ੍ਹਾਂ ਜ਼ਰੂਰਤਾਂ ਦਾ ਇਕ ਹਿੱਸਾ ਹੈ | ਉਨ੍ਹਾਂ ਦਾ ਯੋਗਦਾਨ, ਨਾਟਸ਼ਾਲਾ, ਅੱਜ ਨਾ ਸਿਰਫ਼ ਅੰਮਿ੍ਤਸਰ ਅਤੇ ਪੰਜਾਬ ਦਾ ਸਗੋਂ ਪੂਰੇ ਦੇਸ਼ ਦਾ ਮਾਣ ਹੈ |ਸਾਬਕਾ ਰਾਜਦੂਤ ਡਾ: ਨਵਦੀਪ ਸਿੰਘ ਸੂਰੀ ਨੇ ਕਿਹਾ ਕਿ ਉਨ੍ਹਾਂ ਦਾ ਸਵਰਗੀ ਬਰਾੜ ਨਾਲ ਦੋਹਰਾ ਰਿਸ਼ਤਾ ਸੀ, ਇਕ ਕਲਾਤਮਕ ਅਤੇ ਦੂਜਾ ਪਰਿਵਾਰਕ | ਉਨ੍ਹਾਂ ਨੇ ਆਪਣੇ ਹਰ ਕੰਮ ਨੂੰ ਆਪਣੇ ਪਰਿਵਾਰ ਨਾਲ ਸਾਂਝਾ ਕੀਤਾ ਅਤੇ ਉਨ੍ਹਾਂ ਦੀ ਰਾਏ ਮੰਗੀ | ਉਨ੍ਹਾਂ ਦੀ ਬੇਵਕਤੀ ਮੌਤ ਹਮੇਸ਼ਾ ਮਹਿਸੂਸ ਕੀਤੀ ਜਾਵੇਗੀ | ਨਾਟਕਕਾਰ ਜਗਦੀਸ਼ ਸਚਦੇਵਾ ਨੇ ਕਿਹਾ ਕਿ ਲੋਕ ਇੱਟਾਂ ਅਤੇ ਪੱਥਰਾਂ ਦੇ ਘਰ ਬਣਾਉਂਦੇ ਹਨ, ਪਰ ਸਵਰਗੀ ਬਰਾੜ ਨੇ ਦਿਲਾਂ 'ਚ ਘਰ ਬਣਾਏ | ਉਹ ਇਨ੍ਹਾਂ ਘਰਾਂ 'ਚ ਉਦੋਂ ਤੱਕ ਰਹਿਣਗੇ ਜਦੋਂ ਤੱਕ ਦੁਨੀਆ ਮੌਜੂਦ ਹੈ | ਪੰਜਾਬ ਨਾਟਸ਼ਾਲਾ, ਕਲਾ ਦਾ ਮੰਦਰ ਜੋ ਉਨ੍ਹਾਂ ਨੇ ਕਲਾਕਾਰਾਂ ਲਈ ਬਣਾਇਆ ਸੀ, ਹਮੇਸ਼ਾ ਉਨ੍ਹਾਂ ਦੀ ਯਾਦ ਦਿਵਾਉਂਦਾ ਰਹੇਗਾ | ਹਿਰਦੇਪਾਲ ਸਿੰਘ ਪ੍ਰੀਤਲਾੜੀ ਨੇ ਕਿਹਾ ਕਿ ਸਵਰਗੀ ਬਰਾੜ ਇਕ ਬਹੁਪੱਖੀ ਸ਼ਖ਼ਸੀਅਤ ਦੇ ਮਾਲਕ ਸਨ | ਲੋਕ ਸੱਚ ਲਈ ਨਾਅਰੇ ਲਗਾਉਂਦੇ ਸਨ, ਪਰ ਉਹ ਹਮੇਸ਼ਾਂ ਸੱਚ ਦਾ ਝੰਡਾ ਚੁੱਕਦੇ ਰਹੇ | ਉਨ੍ਹਾਂ ਦੀ ਨਿਮਰਤਾ, ਦੂਰਦਰਸ਼ੀ ਅਤੇ ਸੱਚਾਈ ਉਨ੍ਹਾਂ ਨੂੰ ਅਮਰ ਰੱਖੇਗੀ | ਖਾਲਸਾ ਕਾਲਜ ਯੂਨੀਵਰਸਿਟੀ ਦੇ ਉਪ ਕੁਲਪਤੀ ਡਾ: ਮਹਿਲ ਸਿੰਘ ਨੇ ਕਿਹਾ ਕਿ ਸਵਰਗੀ ਬਰਾੜ ਨੇ ਆਪਣੀ ਕਲਮ ਅਤੇ ਕਲਾ ਰਾਹੀਂ ਨਾ ਸਿਰਫ਼ ਸਮਾਜ ਦੇ ਹਾਸ਼ੀਏ 'ਤੇ ਧੱਕੇ ਗਏ ਲੋਕਾਂ ਲਈ ਗੱਲ ਕੀਤੀ, ਸਗੋਂ ਉਨ੍ਹਾਂ ਨੂੰ ਜਗਾਇਆ ਵੀ | ਡਾ. ਨੀਤਾ ਮਹਿੰਦਰਾ ਨੇ ਕਿਹਾ ਕਿ ਸਵਰਗੀ ਬਰਾੜ ਨੇ ਨਾਟਕ ਲਈ ਜੋ ਕੀਤਾ, ਉਹ ਦੁਨੀਆਂ ਦੇ ਮੌਜੂਦ ਰਹਿਣ ਤੱਕ ਯਾਦ ਰੱਖਿਆ ਜਾਵੇਗਾ | ਕਲਾਕਾਰ ਹਰਦੀਪ ਗਿੱਲ ਨੇ ਕਿਹਾ ਕਿ ਬਰਾੜ ਕਦੇ ਨਹੀਂ ਮਰਦੇ ਉਹ ਹਮੇਸ਼ਾਂ ਹੀ ਲੋਕਾਂ ਦੇ ਦਿਲਾਂ 'ਚ ਜਿਉਂਦੇ ਰਹਿਣਗੇ | ਸਮਾਗਮ ਦੌਰਾਨ, ਖਾਲਸਾ ਕਾਲਜ ਗਰਵਨਿੰਗ ਕੌਂਸਲਰ ਵਲੋਂ ਸਵਰਗੀ ਬਰਾੜ ਦਾ ਸਨਮਾਨ ਕੀਤਾ ਗਿਆ | ਇਹ ਸਨਮਾਨ ਉਨ੍ਹਾਂ ਦੇ ਵੱਡੇ ਬੇਟੇ ਅਮੁਲਦੀਪ ਸਿੰਘ ਨੇ ਪ੍ਰਾਪਤ ਕੀਤਾ | ਸਮਾਰੋਹ ਦੇ ਅੰਤ ਵਿਚ, ਸੋਗ ਵਿਚ ਡੁੱਬੇ ਬਰਾੜ ਪਰਿਵਾਰ ਨੇ ਆਏ ਸਾਰੇ ਸ਼ੁਭਚਿੰਤਕਾਂ ਦਾ ਧੰਨਵਾਦ ਕੀਤਾ ਅਤੇ ਭਰੋਸਾ ਦਿੱਤਾ ਕਿ ਸਵਰਗੀ ਬਰਾੜ ਦੇ ਦਿ੍ਸ਼ਟੀਕੋਣ ਅਤੇ ਸੁਪਨਿਆਂ ਨੂੰ ਕਦੇ ਵੀ ਮਰਨ ਨਹੀਂ ਦਿੱਤਾ ਜਾਵੇਗਾ | ਇਸ ਮੌਕੇ ਅਦਾਕਾਰਾ ਜਤਿੰਦਰ ਕੌਰ, ਅਨੀਤਾ ਦੇਵਗਨ, ਹਰਿੰਦਰ ਸੋਹਲ, ਜਤਿੰਦਰ ਜੀਤੂ, ਸੁਦੇਸ਼ ਵਿੰਕਲ, ਮਨਦੀਪ ਘਈ, ਜਸਵੰਤ ਮਿੰਟੂ, ਜਸਪਾਲ ਪਾਇਲਟ, ਅਰਵਿੰਦਰ ਸਿੰਘ ਚਮਕ ਆਦਿ ਇਸ ਮੌਕੇ ਮੌਜੂਦ ਸਨ |
