ਅੰਮਿ੍ਤਸਰ, 10 ਮਾਰਚ (ਹਰਮਿੰਦਰ ਸਿੰਘ)- ਨਗਰ ਨਿਗਮ ਵਲੋਂ ਸ਼ਹਿਰ ਦੀਆਂ ਜਾਇਦਾਦਾਂ ਦੀ ਭੂਗੋਲਿਕ ਜਾਣਕਾਰੀ ਲਈ ਕਰਵਾਏ ਜਾ ਰਹੇ ਜੀ. ਆਈ. ਐੱਸ. ਸਰਵੇਖਣ ਦਾ ਕੰਮ ਕਾਫ਼ੀ ਪੱਛੜ ਕੇ ਚੱਲ ਰਿਹਾ ਹੈ | ਸਰਵੇਖਣ ਲਈ ਨਿਧਾਰਤ ਕੀਤੀ ਸਮਾਂ ਹੱਦ ਪੂਰੀ ਹੋਣ ਵਾਲੀ ਹੈ ਪਰ ਸਰਵੇਖਣ ਕਰਨ ਵਾਲੀ ਕੰਪਨੀ ਕਾਫੀ ਪਿੱਛੇ ਚੱਲ ਰਹੀ ਹੈ | ਅੰਮਿ੍ਤਸਰ ਸ਼ਹਿਰ ਦੀਆਂ ਸਾਰੀਆਂ ਘਰੇਲੂ ਅਤੇ ਵਪਾਰਕ ਜਾਇਦਾਦਾਂ ਦਾ ਜਿਉਗ੍ਰਾਫਿਕ ਇੰਫਰਮੇਸ਼ਨ ਸਿਸਟਮ ਸਰਵੇਖਣ (ਜੀਆਈਐੱਸ ਸਰਵੇਖਣ) ਕਰਵਾਇਆ ਜਾ ਰਿਹਾ ਹੈ | ਇਹ ਕੰਮ ਪੱਛਮੀ ਬੰਗਾਲ ਦੀ ਇਕ ਕੰਪਨੀ ਨੂੰ ਸੌਂਪਿਆ ਗਿਆ ਹੈ | ਇਹ ਸਰਵੇਖਣ 28 ਫਰਵਰੀ ਤੱਕ ਸਮਾਪਤ ਕਰਕੇ ਇਸ ਦਾ ਡਾਟਾ 31 ਮਾਰਚ ਤੱਕ ਜਮ੍ਹਾਂ ਕਰਵਾਉਣ ਦਾ ਸਮਾਂ ਨਿਧਾਰਿਤ ਕੀਤਾ ਗਿਆ ਸੀ ਪਰ ਸਰਵੇਖਣ ਕਰਨ ਦਾ ਨਿਧਾਰਤ ਸਮਾਂ ਸੀਮਾ ਪੂਰੀ ਹੋ ਗਈ ਹੈ ਪਰ ਸਰਵੇਖਣ ਕਰਨ ਵਾਲੀ ਕੰਪਨੀ ਕਾਫ਼ੀ ਪੱਛੜ ਕੇ ਚੱਲ ਰਹੀ ਹੈ | ਪਤਾ ਲਗਾ ਹੈ ਕਿ ਹੁਣ ਤੱਕ ਕੰਪਨੀ ਵਲੋਂ ਸ਼ਹਿਰ ਦੀਆਂ 4 ਲੱਖ ਜਾਇਦਾਦਾਂ 'ਚੋਂ ਸਿਰਫ 58 ਜਾਇਦਾਦਾਂ ਦਾ ਸਰਵੇਖਣ ਕਰਕੇ ਸ਼ਹਿਰ ਦੀਆਂ 85 ਵਾਰਡਾਂ 'ਚੋਂ ਕੇਵਲ ਚਾਰ ਵਾਰਡਾਂ ਦੀ 7 ਹਜਾਰ ਦੇ ਕਰੀਬ ਜਾਇਦਾਦਾਂ ਦਾ ਡਾਟਾ ਜਮ੍ਹਾਂ ਕਰਵਾ ਸਕੀ ਹੈ | ਇਸ ਸਰਵੇਖਣ ਦੇ ਮੁਕੰਮਲ ਹੋਣ ਦੇ ਬਾਅਦ ਨਿਗਮ ਦੇ ਕੋਲ ਸ਼ਹਿਰ ਦੀਆਂ ਵਪਾਰਕ, ਰਿਹਾਇਸ਼ੀ , ਉਦਯੋਗਿਕ ਜਾਇਦਾਦਾਂ ਦਾ ਵੇਰਵਾ ਆਉਣਾ ਹੈ ਅਤੇ ਨਗਰ ਨਿਗਮ ਕਿਸੇ ਵੀ ਇਮਾਰਤ ਦਾ ਡਾਟਾ ਖੋਲ ਕੇ ਜਾਇਦਾਦ ਦੀ ਪੂਰੀ ਜਾਣਕਾਰੀ ਹਾਸਿਲ ਕਰ ਸਕਦਾ ਸੀ | ਜਿਸ ਦੇ ਨਾਲ ਸ਼ਹਿਰ 'ਚ ਨਿਗਮ ਦਾ ਡਿਫਾਲਟਰਾਂ ਦਾ ਵੇਰਵਾ ਸਾਹਮਣੇ ਆ ਸਕਦਾ ਹੈ ਅਤੇ ਜਿਨ੍ਹਾਂ ਵੱਲ ਨਿਗਮ ਦਾ ਨਿਕਲਦਾ ਬਕਾਇਆ ਵਸੂਲ ਕੇ ਨਿਗਮ ਦੇ ਖਾਤੇ 'ਚ ਜਮ੍ਹਾਂ ਕਰਵਾਇਆ ਜਾ ਸਕੇਗਾ ਇਸ ਦੇ ਨਾਲ ਨਿਗਮ ਦੀ ਆਮਦਨ 'ਚ ਵਾਧਾ ਹੋਵੇਗਾ |
