ਮਾਨਾਂਵਾਲਾ, 3 ਮਈ (ਗੁਰਦੀਪ ਸਿੰਘ ਨਾਗੀ)-ਅੰਮਿ੍ਤਸਰ-ਜਲੰਧਰ ਜੀ. ਟੀ. ਰੋਡ 'ਤੇ ਕਸਬਾ ਦੋਬੁਰਜੀ ਦੇ ਫਲਾਈਓਵਰ 'ਤੇ ਅਚਨਚੇਤ ਵਾਪਰੇ ਸੜਕ ਹਾਦਸੇ ਵਿਚ ਤਿੰਨ ਗੱਡੀਆਂ ਅੱਗੜ੍ਹ ਪਿੱਛੜ ਵੱਜ ਗਈਆਂ, ਜਿਸ ਕਰਕੇ ਇਕ ਮੋਟਰਸਾਈਕਲ ਸਵਾਰ ਪੁਲਿਸ ਮੁਲਾਜ਼ਮ ਜ਼ਖ਼ਮੀ ਹੋ ਗਿਆ | ਮੌਕੇ ਤੋਂ ਪ੍ਰਾਪਤ ਕੀਤੀ ਗਈ ਜਾਣਕਾਰੀ ਅਨੁਸਾਰ ਸੁਖਦੇਵ ਸਿੰਘ ਪੁੱਤਰ ਜਗੀਰ ਸਿੰਘ ਵਾਸੀ ਮੋਗਾ, ਜੋ ਆਪਣੀ ਪਤਨੀ ਸਮੇਤ ਗੁਰਦੁਆਰਾ ਸ਼ਹੀਦਾਂ ਸਾਹਿਬ ਦੇ ਦਰਸ਼ਨ ਕਰਕੇ ਵਾਪਸ ਮੋਗਾ ਜਾ ਰਹੇ ਸਨ ਅਤੇ ਦੋਬੁਰਜੀ ਦੇ ਫਲਾਈਓਵਰ ਅਚਾਨਕ ਉਸਦੀ ਸਵਿਫਟ ਡਿਜ਼ਾਇਰ ਕਾਰ (ਨੰਬਰ: ਪੀ ਬੀ 04 ਏ ਸੀ 7379) ਬੰਦ ਹੋ ਗਈ | ਸੁਖਦੇਵ ਸਿੰਘ ਨੇ ਆਪਣੀ ਕਾਰ ਫਲਾਈਓਵਰ ਉੱਪਰ ਹੀ ਇਕ ਸਾਈਡ 'ਤੇ ਰੋਕ ਲਈ, ਜਿਸ ਤੋਂ ਬਾਅਦ ਉਸਦੇ ਪਿੱਛੇ ਆ ਰਹੀ ਕਰੇਟਾ (ਨੰਬਰ: ਪੀ ਬੀ 46 ਏ ਐਲ 4727) ਗੱਡੀ ਦੇ ਡਰਾਈਵਰ ਸਤਨਾਮ ਸਿੰਘ ਪੁੱਤਰ ਹਰਭਜਨ ਸਿੰਘ ਵਾਸੀ ਤੁੜ ਜ਼ਿਲ੍ਹਾ ਤਰਨ ਤਾਰਨ ਨੇ ਬੜੀ ਮੁਸ਼ਕਿਲ ਨਾਲ ਆਪਣੀ ਗੱਡੀ ਨੂੰ ਬਰੇਕ ਮਾਰ ਕੇ ਰੋਕ ਲਿਆ, ਪਰ ਉਸ ਦੇ ਪਿੱਛੇ ਆ ਰਹੀ ਥਾਰ (ਨੰਬਰ: ਪੀ. ਬੀ. 02 ਐੱਫ ਏ 0388) ਗੱਡੀ ਦੇ ਚਾਲਕ ਜੈਦੀਪ ਸਿੰਘ ਪੁੱਤਰ ਸੁਖਚੈਨ ਸਿੰਘ ਵਲੋਂ ਗੱਡੀ ਨੂੰ ਕੰਟਰੋਲ ਕਰਨ ਦੀ ਕੋਸ਼ਿਸ਼ ਕੀਤੀ ਪਰ ਉਸਦੀ ਥਾਰ ਅੱਗੇ ਖੜੀ ਕਰੇਟਾ ਵਿਚ ਜਾ ਵੱਜੀ ਅਤੇ ਉਸ ਦੇ ਪਿੱਛੇ ਆ ਰਿਹਾ ਨਵਾਂ ਯਾਹਮਾ ਮੋਟਰਸਾਈਕਲ ਥਾਰ ਵਿਚ ਜਾ ਵੱਜਾ ਅਤੇ ਮੋਟਰਸਾਈਕਲ ਸਵਾਰ ਪੁਲਿਸ ਮੁਲਾਜ਼ਮ ਅੰਮਿ੍ਤਪਾਲ ਸਿੰਘ ਪੁੱਤਰ ਸੁਖਵਿੰਦਰ ਸੀਹ ਵਾਸੀ ਅੰਮਿ੍ਤਸਰ ਸੜਕ 'ਤੇ ਗਿਆ ਅਤੇ ਜ਼ਖ਼ਮੀ ਹੋ ਗਿਆ | ਇਸ ਹਾਦਸੇ ਕਾਰਨ ਫਲਾਈਓਵਰ 'ਤੇ ਕੁਝ ਸਮਾਂ ਆਵਾਜਾਈ ਵਿਚ ਵਿਘਨ ਪੈਣ ਕਾਰਨ ਜਾਮ ਵਰਗੀ ਸਥਿਤੀ ਬਣ ਗਈ |
