ਅੰਮਿ੍ਤਸਰ, 21 ਮਈ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਦੇ ਗੁੱਜਰਾਂਵਾਲਾ ਸ਼ਹਿਰ ਦੇ ਸ਼ੇਖ਼ੂਪੁਰਾ ਮੋੜ 'ਤੇ ਨਵੀਂ ਫਰੂਟ ਤੇ ਸਬਜ਼ੀ ਮੰਡੀ ਦੇ ਨਾਲ ਲਗਦੀ ਆਤਮਾ ਰਾਮ ਰੋਡ 'ਤੇ ਮੌਜੂਦ ਜੈਨ ਆਚਾਰੀਆ ਆਤਮਾ ਰਾਮ (ਆਚਾਰੀਆ ਸ੍ਰੀ ਵਿਜੈ ਨੰਦ) ਦੀ ਸਮਾਧ ਦੀ ਨਵਉਸਾਰੀ ਅਤੇ ਸੁੰਦਰੀਕਰਨ ਦੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ | 'ਅਜੀਤ' ਨਾਲ ਇਹ ਜਾਣਕਾਰੀ ਸਾਂਝੀ ਕਰਦਿਆਂ ਇਵੈਕੂਈ ਟਰੱਸਟ ਪ੍ਰਾਪਰਟੀ ਬੋਰਡ ਗੁੱਜਰਾਂਵਾਲਾ ਦੇ ਅਧਿਕਾਰੀ ਨੇ ਦੱਸਿਆ ਕਿ ਸਮਾਧੀ ਸਮਾਰਕ ਦੀ ਨਵਉਸਾਰੀ ਅਤੇ ਸੁੰਦਰੀਕਰਨ ਦੀ ਕਾਰਵਾਈ ਦੇ ਦੌਰਾਨ ਇਸ ਦੇ ਪੁਰਾਣੇ ਢਾਂਚੇ ਦੀ ਬਨਾਵਟ 'ਚ ਕੋਈ ਫੇਰਬਦਲ ਨਹੀਂ ਕੀਤੀ ਜਾ ਰਹੀ | ਉਨ੍ਹਾਂ ਦੱਸਿਆ ਕਿ ਜੈਨ ਆਚਾਰੀਆ ਦੇ ਸਮਾਧੀ ਮੰਦਰ 'ਚੋਂ ਉਤਾਰ ਕੇ ਲਾਹੌਰ ਅਜਾਇਬ ਘਰ 'ਚ ਸਥਾਪਿਤ ਕੀਤੇ ਉਨ੍ਹਾਂ ਦੇ ਪੱਥਰ ਦੀ ਸਿਲ 'ਤੇ ਉੱਕਰੇ ਪਦ-ਚਿੰਨ੍ਹ ਵੀ ਸੁਰੱਖਿਅਤ ਹਨ | ਜਿਸ ਹੇਠਾਂ 'ਫੁੱਟ ਪਿ੍ੰਟਜ਼ ਆਫ਼ ਸ੍ਰੀ ਆਤਮਾ ਰਾਮ ਜੀ, ਫ਼ਰਾਮ ਜੈਨ ਮੰਦਰ ਗੁੱਜਰਾਂਵਾਲਾ' ਲਿਖਿਆ ਹੋਇਆ ਹੈ | ਸ੍ਰੀ ਆਤਮਾ ਰਾਮ ਬਾਰੇ ਜੈਨ ਲੇਖਕ ਲਿਖਦੇ ਹਨ ਕਿ ਫ਼ਿਰੋਜ਼ਪੁਰ ਦੀ ਤਹਿਸੀਲ ਜ਼ੀਰਾ ਦੇ ਪਿੰਡ ਲਹਿਰਾ 'ਚ ਸੰਨ 1837 'ਚ ਜਨਮੇ ਉਕਤ ਸੰਤ ਕ੍ਰਾਂਤੀਕਾਰੀ ਲੇਖਕ, ਕਵਿ, ਸਮਾਜ ਸੁਧਾਰਕ ਅਤੇ ਵਿਦਿਆ ਪ੍ਰਚਾਰਕ ਵੀ ਸਨ |
