ਭਿੱਖੀਵਿੰਡ, 24 ਫਰਵਰੀ (ਬੌਬੀ)-ਲਖਵਿੰਦਰ ਕੌਰ ਪਤਨੀ ਬਿਕਰਮਜੀਤ ਸਿੰਘ ਵਾਸੀ ਭੈਲ ਢਾਏ ਵਾਲਾ ਤਹਿਸੀਲ ਖਡੂਰ ਸਾਹਿਬ ਜ਼ਿਲ੍ਹਾ ਤਰਨ ਤਾਰਨ ਨੇ ਪੁਲਿਸ ਥਾਣਾ ਕੱਚਾ ਪੱਕਾ ਵਿਖੇ ਦਿੱਤੀ ਦਰਖਾਸਤ ਵਿਚ ਦੋਸ਼ ਲਗਾਏ ਕਿ ਮੇਰਾ ਭਰਾ ਤੇਜਵੀਰ ਸਿੰਘ ਪੁੱਤਰ ਦਰਸ਼ਨ ਸਿੰਘ ਵਾਸੀ ਦਿਆਲਪੁਰਾ ਜ਼ਿਲ੍ਹਾ ਤਰਨ ਤਾਰਨ ਤੋਂ ਪਿੰਡ ਥੇਹ ਚਾਹਲ ਦੇ ਇਕ ਜੋੜੇ ਨੇ 30 ਅਕਤੂਬਰ 2025 ਨੂੰ ਫਰਜ਼ੀ ਆਧਾਰ ਕਾਰਡ ਰੱਖ ਕੇ 16 ਕਨਾਲ ਦੀ ਰਜਿਸਟਰੀ ਆਪਣੇ ਹੱਕ ਵਿਚ ਕਰਵਾ ਲਈ ਅਤੇ ਹੁਣ ਕਰੀਬ ਇਕ ਮਹੀਨੇ ਤੋਂ ਮੇਰਾ ਭਰਾ ਤੇਜਵੀਰ ਸਿੰਘ ਲਾਪਤਾ ਹੈ ਅਤੇ ਮੈਨੂੰ ਸ਼ੱਕ ਹੈ ਕਿ ਮੇਰੇ ਭਰਾ ਕੋਲੋਂ ਜਿਸ ਜੋੜੇ ਨੇ ਰਜਿਸਟਰੀ ਜਾਅਲੀ ਕਰਵਾਈ ਹੈ, ਉਨ੍ਹਾਂ ਨੇ ਹੀ ਮੇਰੇ ਭਰਾ ਨੂੰ ਗਾਇਬ ਕੀਤਾ ਹੈ | ਉਸ ਨੇ ਕਿਹਾ ਕਿ ਜੇਕਰ ਮੇਰੇ ਭਰਾ ਦਾ ਕੋਈ ਜਾਨੀ ਜਾਂ ਮਾਲੀ ਨੁਕਸਾਨ ਹੁੰਦਾ ਹੈ ਤਾਂ ਇਸ ਦੀ ਸਾਰੀ ਜਿੰਮੇਵਾਰੀ ਜਾਅਲੀ ਰਜਿਸਟਰੀ ਕਰਾਉਣ ਵਾਲੇ ਉਕਤ ਜੋੜੇ ਦੀ ਹੋਵੇਗੀ | ਲਖਵਿੰਦਰ ਕੌਰ ਨੇ ਪੁਲਿਸ ਥਾਣਾ ਕੱਚਾ-ਪੱਕਾ ਵਿਚ ਦਰਖਾਸਤ ਦੇ ਕੇ ਮੰਗ ਕੀਤੀ ਗਈ, ਇਸ ਸਾਰੇ ਮਾਮਲੇ ਦੀ ਬਾਰੀਕੀ ਨਾਲ ਜਾਂਚ ਕਰਕੇ ਮੈਨੂੰ ਇਨਸਾਫ਼ ਦਿਵਾਇਆ ਜਾਵੇ | ਮੈਨੂੰ ਸ਼ੱਕ ਹੈ ਕਿ ਮੇਰੇ ਭਰਾ ਦਾ ਕਤਲ ਕਰ ਦਿੱਤਾ ਗਿਆ ਹੈ | ਇਸ ਸੰਬੰਧੀ ਏ.ਐਸ.ਆਈ. ਸਤਨਾਮ ਸਿੰਘ ਨਾਲ ਗੱਲ ਕਰਨ 'ਤੇ ਉਨ੍ਹਾਂ ਕਿਹਾ ਕਿ ਇਸ ਸੰਬੰਧੀ ਦੋਹਾਂ ਧਿਰਾਂ ਦਾ ਪਹਿਲਾਂ ਹੀ ਅਦਾਲਤ ਵਿਚ ਕੇਸ ਚੱਲਦਾ ਹੈ ਬਾਕੀ ਅਸੀਂ ਜੋ ਕਾਰਵਾਈ ਕਰ ਸਕਦੇ ਹਾਂ, ਲੋੜੀਂਦੀ ਕਾਰਵਾਈ ਕੀਤੀ ਜਾ ਰਹੀ ਹੈ |
