ਤਰਨ ਤਾਰਨ, 25 ਫਰਵਰੀ (ਹਰਿੰਦਰ ਸਿੰਘ)- ਸਾਬਕਾ ਸਰਪੰਚ ਅਤੇ ਦੋ ਹੋਰਾਂ ਨੂੰ ਅਦਾਲਤ ਨੇ ਸੁਣਾਈ ਤਿੰਨ-ਤਿੰਨ ਸਾਲ ਦੀ ਕੈਦ ਅਦਾਲਤ ਰਾਜਦੀਪ ਸਿੰਘ ਮਾਨ ਖਡੂਰ ਸਹਿਬ ਜ਼ਿਲ੍ਹਾ ਤਰਨ ਤਾਰਨ ਨੇ ਇਕ ਬਹੁ ਚਰਚਿਤ ਕੇਸ ਵਿਚ ਨਰੋਤਮਪੁਰ ਨੇੜੇ ਜਲਾਲਾਬਾਦ ਦੇ ਸਾਬਕਾ ਸਰਪੰਚ ਅਵਤਾਰ ਸਿੰਘ ਪੁੱਤਰ ਸਤਨਾਮ ਸਿੰਘ, ਉਸਦੇ ਭਰਾ ਮਖਣ ਸਿੰਘ ਅਤੇ ਗੁਰਜੰਟ ਸਿੰਘ ਪੁੱਤਰ ਨਿਰਮਲ ਸਿੰਘ ਸਾਰੇ ਵਾਸੀਆਨ ਰਾਮਪੁਰ ਨਰੋਤਮਪੁਰ ਨੇੜੇ ਜਲਾਲਾਬਾਦ ਨੂੰ ਤਿੰਨ-ਤਿੰਨ ਸਾਲ ਦੀ ਕੈਦ ਅਤੇ ਜੁਰਮਾਨੇ ਦਾ ਹੁਕਮ ਸੁਣਾਇਆ ਹੈ | ਇਹ ਕੇਸ ਇਕ ਐੱਨ.ਆਰ.ਆਈ. ਬਜੁਰਗ ਸਵਰਨ ਸਿੰਘ ਵਾਸੀ ਇਗਲੈਂਡ ਨੂੰ ਗੰਭੀਰ ਰੂਪ ਵਿਚ ਜ਼ਖ਼ਮੀ ਕਰਨ ਅਤੇ ਉਸਦੀ ਜ਼ਮੀਨ ਉਪਰ ਨਾਜਾਇਜ਼ ਕਬਜਾ ਕਰਨ ਸਬੰਧਤ ਥਾਣਾ ਵੈਰੋਵਾਲ ਜ਼ਿਲ੍ਹਾ ਤਰਨ ਤਾਰਨ ਵਿਚ ਸਖ਼ਤ ਧਾਰਾਵਾਂ ਹੇਠ ਦਰਜ ਹੋਇਆ ਸੀ | ਕਈ ਸਾਲ ਲੰਬੀ ਕਾਨੂੰਨੀ ਕਾਰਵਾਈ ਤੋਂ ਬਾਅਦ ਅਦਾਲਤ ਨੇ ਉਕਤ ਐੱਨ.ਆਰ.ਆਈ.ਨੂੰ ਇੰਨਸਾਫ ਦੇ ਕੇ ਇਹ ਸਾਬਤ ਕਰ ਦਿਤਾ ਹੈ ਕਿ ਕਾਨੂੰਨ ਦੇ ਹੱਥ ਬਹੁਤ ਲੰਮੇ ਹੁੰਦੇ ਹਨ | ਐੱਨ.ਆਰ.ਆਈ. ਸਵਰਨ ਸਿੰਘ ਨੇ ਹੋਰ ਦੱਸਿਆ ਕਿ ਦੋਸ਼ੀ ਅਵਤਾਰ ਸਿੰਘ ਨੇ ਬਾਅਦ ਵਿਚ ਵੀ ਉਸ ਉਪਰ ਗੋਲੀਆਂ ਚਲਾ ਕੇ ਉਸ ਨੂੰ ਗੰਭੀਰ ਜ਼ਖਮੀ ਕਰ ਦਿਤਾ ਸੀ | ਇਸ ਸੰਬੰਧਤ ਵੀ ਕੇਸ ਅਦਾਲਤ ਵਿਚ ਵਿਚਾਰ ਅਧੀਨ ਹੈ |