ਖੇਮਕਰਨ, 7 ਅਪ੍ਰੈਲ (ਰਾਕੇਸ਼ ਕੁਮਾਰ ਬਿੱਲਾ)-ਪੁਲਿਸ ਥਾਣਾ ਖੇਮਕਰਨ ਦੀ ਪੁਲਿਸ ਪਾਰਟੀ ਤੇ ਬੀ.ਐਸ.ਐਫ. ਨੇ ਸਾਂਝੇ ਅਭਿਆਨ 'ਚ ਸਰਹੱਦੀ ਖੇਤਰ 'ਚੋਂ ਇਕ ਪਕਿਸਤਾਨ ਤਰਫੋਂ ਆਇਆ ਇਕ ਡਰੋਨ ਤੇ ਹੈਰੋਇਨ ਬਰਾਮਦ ਕਰਨ 'ਚ ਸਫਲਤਾ ਹਾਸਲ ਕੀਤੀ ਹੈ | ਇਸ ਬਾਰੇ ਥਾਣਾ ਖੇਮਕਰਨ ਦੇ ਐਸ.ਐਚ.ਓ. ਇੰਸ. ਕੰਵਲਜੀਤ ਰਾਏ ਨੇ ਦੱਸਿਆ ਕਿ ਪੁਲਿਸ ਪਾਰਟੀ ਨੂੰ ਸੂਚਨਾ ਮਿਲੀ ਕਿ ਸਰਹੱਦੀ ਪਿੰਡ ਮਹਿਦੀਪੁਰ ਦੇ ਇਲਾਕੇ 'ਚ ਸੀਮਾ ਚੌਂਕੀ ਹਰਦੀਪ ਅਧੀਨ ਸਰਹੱਦ ਨਜ਼ਦੀਕ ਕੋਈ ਸ਼ੱਕੀ ਚੀਜ ਡਿੱਗੀ ਪਈ ਹੈ, ਜਿਸ 'ਤੇ ਤੁਰੰਤ ਪੁਲਿਸ ਪਾਰਟੀ ਨੇ ਬੀ.ਐਸ.ਐਫ. ਦੀ 148 ਬਟਾਲੀਅਨ ਦੇ ਜਵਾਨਾਂ ਸਮੇਤ ਮੌਕੇ 'ਤੇ ਤਲਾਸ਼ੀ ਕੀਤੀ ਤਾਂ ਪਾਕਿਸਤਾਨ ਤਰਫੋਂ ਆ ਕੇ ਡਿੱਗਾ ਪਿਆ ਇਕ ਚੀਨੀ ਡਰੋਨ ਮਿਲਿਆ | ਜਦ ਉਸ ਦੀ ਜਾਂਚ ਕੀਤੀ ਤਾਂ ਡਰੋਨ ਨਾਲ ਬੰਨੇ ਹੋਏ ਪਲਾਸਟਿਕ ਦੇ ਲਿਫਾਫੇ 'ਚੋਂ ਕਰੀਬ 531 ਗ੍ਰਾਮ ਹੈਰੋਇਨ ਮਿਲੀ, ਜਿਸ ਦੀ ਕੀਮਤ ਕੌਮਾਂਤਰੀ ਬਾਜ਼ਾਰ 'ਚ ਦੋ ਕਰੋੜ 65 ਲੱਖ ਬਣਦੀ ਹੈ | ਥਾਣਾ ਖੇਮਕਰਨ ਵਿਚ ਅਣਪਛਾਤੇ ਵਿਅਕਤੀਆਂ ਵਿਰੁੱਧ ਕੇਸ ਦਰਜ ਕਰਕੇ ਜਾਂਚ ਅਰੰਭ ਕਰ ਦਿੱਤੀ ਹੈ ਤੇ ਹੈਰੋਇਨ ਮੰਗਵਾਉਣ ਵਾਲੇ ਤਸਕਰਾਂ ਦੀ ਪਤਾਣ ਕੀਤੀ ਜਾ ਰਹੀ ਹੈ |
