ਲੁਧਿਆਣਾ, 4 ਫਰਵਰੀ (ਭੁਪਿੰਦਰ ਸਿੰਘ ਬੈਂਸ)-ਫ਼ਿਰੋਜਪੁਰ ਰੋਡ ਵਲੋਂ ਲੋਧੀ ਕਲੱਬ ਅੰਡਰਪਾਸ ਰਾਹੀਂ ਪੱਖੋਵਾਲ ਰੋਡ ਜਾਣ ਵਾਲੇ ਵਾਹਨ ਚਾਲਕਾਂ ਲਈ ਅਹਿਮ ਚੇਤਾਵਨੀ ਜਾਰੀ ਕੀਤੀ ਗਈ ਹੈ | ਅੰਡਰਪਾਸ ਵਿਚ ਪਾਣੀ ਦੀ ਨਿਕਾਸੀ ਲਈ ਲੱਗੀ ਹੋਈ ਲੋਹੇ ਦੀ ਜਾਲੀ ਟੁੱਟੀ ਹੋਈ ਹੈ, ਜਿਸ ਕਾਰਨ ਹਾਦਸੇ ਦਾ ਖ਼ਤਰਾ ਬਣਿਆ ਹੋਇਆ ਹੈ | ਦੁਰਘਟਨਾ ਤੋਂ ਬਚਾਅ ਲਈ ਅੰਡਰਪਾਸ ਦੇ ਖ਼ਤਰਨਾਕ ਹਿੱਸੇ 'ਤੇ ਬੈਰੀਕੇਟਿੰਗ ਕੀਤੀ ਗਈ ਹੈ | ਇਸਦੇ ਬਾਵਜੂਦ ਵਾਹਨ ਚਾਲਕਾਂ ਨੰੂ ਖ਼ਾਸ ਸਾਵਧਾਨੀ ਵਰਤਣ ਦੀ ਲੋੜ ਹੈ ਕਿਉਂਕਿ ਅੰਡਰਪਾਸ ਵਿਚ ਆਵਾਜਾਈ ਲਗਾਤਾਰ ਜਾਰੀ ਹੈ | ਪ੍ਰਸ਼ਾਸਨ ਵਲੋਂ ਵਾਹਨ ਚਾਲਕਾਂ ਨੰੂ ਅਪੀਲ ਕੀਤੀ ਗਈ ਹੈ ਕਿ ਉਹ ਆਪਣੀ ਜਾਨ-ਮਾਲ ਦੀ ਸੁਰੱਖਿਆ ਨੰੂ ਧਿਆਨ ਵਿਚ ਰੱਖਦੇ ਹੋਏ ਅੰਡਰਪਾਸ ਵਿਚੋਂ ਬਹੁਤ ਹੌਲੀ ਗਤੀ ਨਾਲ ਪੂਰੇ ਧਿਆਨ ਨਾਲ ਵਾਹਨ ਕੱਢਣ, ਖ਼ਾਸ ਕਰਕੇ ਦੋ ਪਹੀਆ ਵਾਹਨਾਂ ਲਈ ਇਹ ਥਾਂ ਵਧੇਰੇ ਖ਼ਤਰਨਾਕ ਸਾਬਤ ਹੋ ਸਕਦੀ ਹੈ | ਇਲਾਕਾ ਨਿਵਾਸੀਆਂ ਨੇ ਸਬੰਧਿਤ ਵਿਭਾਗ ਤੋਂ ਮੰਗ ਕੀਤੀ ਹੈ ਕਿ ਟੁੱਟੀ ਹੋਈ ਲੋਹੇ ਦੀ ਜਾਲੀ ਦੀ ਤੁਰੰਤ ਮੁਰੰਮਤ ਕਰਵਾਈ ਜਾਵੇ, ਤਾਂ ਜੋ ਕਿਸੇ ਵੀ ਅਣਦੇਖੀ ਤੋਂ ਬਚਿਆ ਜਾ ਸਕੇ |
