ਲੁਧਿਆਣਾ, 28 ਮਾਰਚ (ਭੁਪਿੰਦਰ ਸਿੰਘ ਬੈਂਸ)ਪੰਜਾਬ ਐਂਡ ਹਰਿਆਣਾ ਹਾਈ ਕੋਰਟ ਵਿੱਚ 7 ਅਪ੍ਰੈਲ ਨੂੰ ਹੋਣ ਵਾਲੀ ਸੁਣਵਾਈ ਤੋਂ ਪਹਿਲਾਂ ਨਗਰ ਨਿਗਮ ਵੱਲੋਂ ਬਿਲਡਿੰਗ ਬਾਇਲਾਜ ਦੀ ਉਲੰਘਣਾ ਕਰਨ ਵਾਲੇ ਹੋਟਲਾਂ ਖ਼ਿਲਾਫ ਵੱਡੀ ਕਾਰਵਾਈ ਕੀਤੀ ਗਈ | ਨਿਗਮ ਦੀ ਬਿਲਡਿੰਗ ਬ੍ਰਾਂਚ ਨੇ ਅੱਜ ਏ ਜ਼ੋਨ ਦੇ ਤਹਿਤ ਆਉਂਦੇ ਕਰੀਬ 17 ਹੋਟਲਾਂ 'ਤੇ ਛਾਪੇਮਾਰੀ ਕਰਦੇ ਹੋਏ ਗੈਰ-ਕੰਪਾਊਾਡੇਬਲ ਹਿੱਸਿਆਂ ਵਿੱਚ ਬਣੇ ਕਮਰਿਆਂ ਨੂੰ ਸੀਲ ਕਰ ਦਿੱਤਾ | ਇਸ ਕਾਰਵਾਈ ਦੀ ਅਗਵਾਈ ਏਟੀਪੀ ਕਪਿਲ ਦੇਵ ਵੱਲੋਂ ਕੀਤੀ ਗਈ | ਟੀਮ ਵਿੱਚ ਬਿਲਡਿੰਗ ਇੰਸਪੈਕਟਰ ਹਰਮਿੰਦਰ ਸਿੰਘ ਮੱਕੜ, ਹੈਡ ਡਰਾਫਟਸਮੈਨ ਜਗਦੀਪ ਸਿੰਘ ਅਤੇ ਡਰਾਫਟਸਮੈਨ ਗੁਰਮੀਤ ਸਿੰਘ ਸਮੇਤ ਪੁਲਿਸ ਕਰਮਚਾਰੀ ਵੀ ਮੌਜੂਦ ਰਹੇ | ਨਿਗਮ ਦੀ ਟੀਮ ਨੇ ਪੁਲਿਸ ਬਲ ਦੇ ਨਾਲ ਮਿਲ ਕੇ ਸਖ਼ਤ ਰਵੱਈਆ ਅਪਣਾਉਂਦੇ ਹੋਏ ਉਲੰਘਣਾ ਕਰਨ ਵਾਲੇ ਹੋਟਲਾਂ ਵਿੱਚ ਬਣੇ ਗੈਰ-ਕਾਨੂੰਨੀ ਕਮਰਿਆਂ ਨੂੰ ਸੀਲ ਕੀਤਾ | ਜਿਨਾਂ ਹੋਟਲਾਂ 'ਤੇ ਕਾਰਵਾਈ ਹੋਈ, ਉਨਾਂ ਵਿੱਚ ਮਹਾਰਾਜਾ ਹੋਟਲ, ਵਿਕਰਾਂਤ ਹੋਟਲ, ਨੀਲਕੰਠ ਹੋਟਲ, ਸਰਤਾਜ ਹੋਟਲ, ਹੋਟਲ ਸਿਟੀ ਸੈਂਟਰ, ਹੋਟਲ ਗ੍ਰੀਟਵੈਲ ਸਮੇਤ ਹੋਰ ਕਈ ਹੋਟਲ ਸ਼ਾਮਲ ਹਨ | ਗੌਰਤਲਬ ਹੈ ਕਿ ਬਿਲਡਿੰਗ ਬਾਇਲਾਜ ਦੀ ਉਲੰਘਣਾ ਕਰਕੇ ਬਣੇ ਹੋਟਲਾਂ ਦੇ ਮਾਮਲੇ ਵਿੱਚ ਹਾਈ ਕੋਰਟ ਵਿੱਚ ਯਾਚਿਕਾ ਦਾਇਰ ਹੈ, ਜਿਸ 'ਤੇ ਸੁਣਵਾਈ ਜਾਰੀ ਹੈ | ਨਗਰ ਨਿਗਮ ਵੱਲੋਂ 7 ਅਪ੍ਰੈਲ ਨੂੰ ਆਪਣਾ ਜਵਾਬ ਦਰਜ ਕਰਵਾਇਆ ਜਾਣਾ ਹੈ, ਜਿਸ ਤੋਂ ਪਹਿਲਾਂ ਇਹ ਕਾਰਵਾਈ ਕੀਤੀ ਗਈ ਹੈ |
