ਲੁਧਿਆਣਾ

ਸਿਹਤ ਵਿਭਾਗ ਦੀ ਮਿਹਰਬਾਨੀ ਨਾਲ ਲੋਕਾਂ ਨੂੰ ਪਰੋਸਿਆ ਜਾ ਰਿਹਾ ਗੰਦਗੀ ਭਰਿਆ ਮੀਟ <br/>

ਧਾਂਦਰਾ ਸੜਕ ਸਥਿਤ ਮੀਟ ਦੀ ਦੁਕਾਨ 'ਤੇ ਕੱਟੇ ਹੋਏ ਚਿਕਨ 'ਤੇ ਭਿੰਨ-ਭਿੰਨਾ ਰਹੀਆਂ ਮੱਖੀਆਂ ਅਤੇ ਗੰਦਗੀ ਦਾ ਦਿ੍ਸ਼ ਅਤੇ ਦੁਕਾਨ ਦੀ ਬਾਹਰੀ ਤਸਵੀਰ | ਅਜੀਤ ਤਸਵੀਰਾਂ <br/> 22-04-2026

ਫੁੱਲਾਂਵਾਲ, 21 ਅਪ੍ਰੈਲ (ਮਨਜੀਤ ਸਿੰਘ ਦੁੱਗਰੀ)-ਲੋਕਾਂ ਨੂੰ ਸਾਫ਼ ਸੁਥਰਾ ਤੇ ਸਿਹਤਮੰਦ ਖਾਣ ਪੀਣ ਵਾਲੀਆਂ ਵਸਤੂਆਂ ਮੁਹੱਈਆ ਕਰਵਾਉਣ ਦਾ ਦਾਅਵਾ ਕਰਨ ਵਾਲੇ ਸਿਹਤ ਵਿਭਾਗ ਦੇ ਇਹ ਦਾਅਵੇ ਉਦੋਂ ਫਿੱਕੇ ਪੈਂਦੇ ਜਾਪੇ, ਜਦੋਂ ਧਾਂਦਰਾ ਸੜਕ ਸਥਿਤ ਇਕ ਨਾਮੀ ਮੀਟ ਕੱਟਣ ਵਾਲੀ ਦੁਕਾਨ 'ਤੇ ਗੰਦਗੀ ਭਰੇ ਵਾਤਾਵਰਨ ਵਿਚ ਮੁਰਗਿਆਂ ਨੂੰ ਕੱਟ ਕੇ ਗੰਦਗੀ ਵਿਚ ਹੀ ਰੱਖਣ ਦੀ ਤਸਵੀਰ ਸਾਹਮਣੇ ਆਈ, ਜਿਸ ਵਿਚ ਸਾਫ਼ ਦੇਖਿਆ ਜਾ ਸਕਦਾ ਹੈ ਕਿ ਦੋ ਗਲੀਆ ਇਸ ਦੁਕਾਨ ਦੀ ਪਿਛਲੇ ਪਾਸੇ ਵਾਲੇ ਗੇਟ 'ਤੇ ਬਣੇ ਸਟੋਰ ਵਿਚ ਕੱਟੇ ਪਏ ਚਿਕਨ 'ਤੇ ਮੱਖੀਆਂ ਭਿੰਨ-ਭਿੰਨਾ ਰਹੀਆਂ ਹਨ ਅਤੇ ਗੰਦਗੀ ਦੀ ਭਰਮਾਰ ਹੈ | ਜ਼ਿਕਰਯੋਗ ਹੈ ਕਿ ਸਮਾਰਟ ਸ਼ਹਿਰ ਲੁਧਿਆਣਾ ਅੰਦਰ ਲੋਕਾਂ ਨੂੰ ਸਾਫ਼ ਸੁਥਰਾ ਤੇ ਸਿਹਤਮੰਦ ਮੀਟ ਦੀ ਸਪਲਾਈ ਮੁਹੱਈਆ ਕਰਵਾਉਣ ਲਈ ਕਰੋੜਾਂ ਰੁਪਏ ਖਰਚ ਕੇ ਹੈਬੋਵਾਲ ਵਿਖੇ ਸ਼ੈਲਟਰ ਹਾਊਸ ਬਣਾਇਆ ਗਿਆ ਹੈ | ਇਸ ਸਭ ਦੇ ਬਾਵਜੂਦ ਵੀ ਸ਼ਹਿਰ ਦੇ ਨਾਲ ਲੱਗਦੀਆਂ ਬਾਹਰੀ ਕਾਲੋਨੀਆਂ ਵਿਚ ਮੀਟ ਵਿਕੇ੍ਰਤਾਵਾਂ ਵਲੋਂ ਸ਼ਰ੍ਹੇਆਮ ਗੰਦਗੀ ਭਰੀ ਥਾਂ ਅਤੇ ਸੜਕਾਂ ਕਿਨਾਰੇ ਹੀ ਮੀਟ ਕੱਟ ਕੇ ਲੋਕਾਂ ਨੂੰ ਪਰੋਸਿਆ ਜਾ ਰਿਹਾ ਹੈ, ਜਿਸ ਨੂੰ ਲੈ ਕੇ ਸਿਹਤ ਵਿਭਾਗ ਬੇਖ਼ਬਰ ਕੁੰਭ-ਕਰਨੀ ਨੀਂਦ ਸੁੱਤਾ ਪਿਆ ਜਾਪਦਾ ਹੈ | ਜਦੋਂ ਇਸ ਬਾਰੇ ਜ਼ਿਲ੍ਹਾ ਸਿਹਤ ਅਧਿਕਾਰੀ ਡਾ. ਅਸੀਸ਼ ਚਾਵਲਾ ਨੂੰ ਵੀਡੀਓ ਭੇਜ ਕੇ ਪੁੱਛਿਆ ਗਿਆ ਤਾਂ ਉਨ੍ਹਾਂ ਸਿਰਫ਼ ਲੋਕੇਸ਼ਨ ਮੰਗਣ ਤੋਂ ਇਲਾਵਾ ਇਸ ਦਾ ਕੋਈ ਠੋਸ ਜਵਾਬ ਨਹੀਂ ਦਿੱਤਾ |