ਲੁਧਿਆਣਾ, 9 ਜੂਨ (ਅ.ਬ.)-ਮੈਡੀਕਲ ਖੇਤਰ 'ਚ ਇੱਕ ਵਿਲੱਖਣ ਉਪਲਬਧੀ ਹਾਸਲ ਕਰਦੇ ਹੋਏ ਲੁਧਿਆਣਾ ਦੇ ਆਰਜੀ ਹਸਪਤਾਲ ਨੇ ਇੱਕ ਹੀ ਦਿਨ ਵਿੱਚ 12 ਰੋਬੋਟਿਕ-ਸਹਾਇਤਾ ਪ੍ਰਾਪਤ ਸਰਜਰੀਆਂ ਸਫਲਤਾਪੂਰਵਕ ਪੂਰੀਆਂ ਕਰਕੇ ਨਵਾਂ ਇਤਿਹਾਸ ਰਚ ਦਿੱਤਾ ਹੈ | ਇਹ ਉਪਲਬਧੀ ਹਸਪਤਾਲ ਦੇ ਰੋਬੋਟਿਕ ਸਰਜਰੀ ਪ੍ਰੋਗਰਾਮ ਲਈ ਇੱਕ ਨਵਾਂ ਮਾਪਦੰਡ ਸਾਬਤ ਹੋਈ ਹੈ | ਇਹ ਸਫਲਤਾ ਕਲੀਨਿਕਲ ਅਭਿਆਸ ਵਿੱਚ ਰੋਬੋਟਿਕ ਤਕਨਾਲੋਜੀ ਦੀ ਵੱਧ ਰਹੀ ਸਵੀਕਾਰਤਾ ਅਤੇ ਇਸ ਦੀ ਪ੍ਰਭਾਵਸ਼ੀਲਤਾ ਨੂੰ ਦਰਸਾਉਂਦੀ ਹੈ | 12 ਰੋਬੋਟਿਕ ਸਰਜਰੀਆਂ 'ਚੋਂ 11 ਸਰਜਰੀਆਂ ਡਾ. ਰੋਹਤਾਸ਼ ਲੂਥਰਾ, ਕਨਸਲਟੈਂਟ ਜਨਰਲ, ਰੋਬੋਟਿਕ, ਲੈਪ੍ਰੋਸਕੋਪਿਕ ਅਤੇ ਬੈਰੀਆਟਿ੍ਕ ਸਰਜਰੀ ਵੱਲੋਂ ਸਫਲਤਾਪੂਰਵਕ ਕੀਤੀਆਂ ਗਈਆਂ | ਇਸ ਤੋਂ ਇਲਾਵਾ ਡਾ. ਸਿਰੀਨ ਗਰਗ, ਕਨਸਲਟੈਂਟ ਗਾਇਨੀਕੋਲੋਜਿਸਟ ਨੇ ਉਨ੍ਹਾਂ ਦੀ ਪ੍ਰੋਕਟਰਸ਼ਿਪ ਹੇਠ ਇੱਕ ਰੋਬੋਟਿਕ ਹਿਸਟਰੇਕਟੋਮੀ ਵੀ ਸਫਲਤਾਪੂਰਵਕ ਕੀਤੀ | ਇਹ ਉਪਲਬਧੀ ਸਿਰਫ਼ ਸਰਜਰੀਆਂ ਦੀ ਗਿਣਤੀ ਤੱਕ ਹੀ ਸੀਮਿਤ ਨਹੀਂ ਹੈ, ਸਗੋਂ ਹਸਪਤਾਲ ਦੀਆਂ ਵੱਖ-ਵੱਖ ਵਿਸ਼ੇਸ਼ਤਾਵਾਂ ਵਿੱਚ ਰੋਬੋਟਿਕ ਸਰਜਰੀ ਦੀਆਂ ਸਮਰੱਥਾਵਾਂ ਨੂੰ ਮਜ਼ਬੂਤ ਕਰਨ, ਕਲੀਨਿਕਲ ਸਹਿਯੋਗ ਨੂੰ ਉਤਸ਼ਾਹਿਤ ਕਰਨ ਅਤੇ ਮਰੀਜ਼ਾਂ ਦੀ ਦੇਖਭਾਲ ਨੂੰ ਨਵੀਆਂ ਉਚਾਈਆਂ ਤੱਕ ਪਹੁੰਚਾਉਣ ਪ੍ਰਤੀ ਵਚਨਬੱਧਤਾ ਨੂੰ ਵੀ ਦਰਸਾਉਂਦੀ ਹੈ | ਇਸ ਉਪਲਬਧੀ ਬਾਰੇ ਗੱਲ ਕਰਦਿਆਂ ਡਾ. ਰੋਹਤਾਸ਼ ਲੂਥਰਾ ਨੇ ਕਿਹਾ ਕਿ ਰੋਬੋਟਿਕ-ਸਹਾਇਤਾ ਪ੍ਰਾਪਤ ਸਰਜਰੀ ਵਧੇਰੇ ਸ਼ੁੱਧਤਾ, ਬਿਹਤਰ ਦਿ੍ਸ਼ਟੀਕਰਨ ਅਤੇ ਉੱਤਮ ਸਰਜੀਕਲ ਕੰਟਰੋਲ ਰਾਹੀਂ ਘੱਟ ਚੀਰਾ ਵਾਲੇ ਇਲਾਜ ਦੀਆਂ ਸੰਭਾਵਨਾਵਾਂ ਨੂੰ ਲਗਾਤਾਰ ਹੋਰ ਬਿਹਤਰ ਬਣਾ ਰਹੀ ਹੈ | ਇੱਕ ਹੀ ਦਿਨ ਵਿੱਚ 12 ਰੋਬੋਟਿਕ ਸਰਜਰੀਆਂ ਨੂੰ ਸਫਲਤਾਪੂਰਵਕ ਅੰਜਾਮ ਦੇਣਾ ਇੱਕ ਸੁਚੱਜੀ ਅਤੇ ਤਾਲਮੇਲ ਵਾਲੀ ਮਲਟੀਡਿਸ਼ਪਲਿਨਰੀ ਟੀਮ ਦੀ ਤਾਕਤ ਅਤੇ ਆਰਜੀ ਹਸਪਤਾਲਾਂ, ਲੁਧਿਆਣਾ ਵੱਲੋਂ ਰੋਬੋਟਿਕ ਸਰਜਰੀ ਦੇ ਖੇਤਰ ਵਿੱਚ ਤਿਆਰ ਕੀਤੇ ਮਜ਼ਬੂਤ ਕਲੀਨਿਕਲ ਢਾਂਚੇ ਨੂੰ ਦਰਸਾਉਂਦਾ ਹੈ |
