ਹੰਬੜਾਂ, 6 ਜੁਲਾਈ (ਮੇਜਰ ਹੰਬੜਾਂ)- ਹੰਬੜਾਂ ਨੇੜੇ ਪਿੰਡ ਵਲੀਪੁਰ ਕਲਾਂ ’ਚੋਂ ਲੰਘਦੇ ਰੋਪੜ ਨੈਸ਼ਨਲ ਹਾਈਵੇਅ ’ਤੇ ਮਿੱਟੀ ਦਾ ਭਰਤ ਪਾਉਣ ਵਾਲੇ ਇਕ ਬਿਨਾਂ ਨੰਬਰੀ ਟਿੱਪਰ ਜੋ ਕਿ ਪਿੰਡ ਖਹਿਰਾ ਬੇਟ ਸਾਈਡ ਤੋਂ ਪਿੰਡ ਵਲੀਪੁਰ ਕਲਾਂ ਵੱਲ ਆ ਰਿਹਾ ਸੀ ਤੇ ਟਰੈਕਟਰ ਹੰਬੜਾਂ ਕੁਟੀਆ ਸੜਕ ਤੋਂ ਖਹਿਰਾ ਬੇਟ ਨੂੰ ਜਾ ਰਿਹਾ ਸੀ, ਜਦੋਂ ਉਕਤ ਟਰੈਕਟਰ ਖਹਿਰਾ ਬੇਟ ਸੜਕ ਤੋਂ ਸੁਖਦੇਵ ਸਿੰਘ ਜੱਸੀਆਂ ਵਾਲਿਆਂ ਦੇ ਘਰਾਂ ਵੱਲ ਮੁੜਨ ਲੱਗਾ ਤਾਂ ਉਸ ਨੂੰ ਤੇਜ਼ ਸਪੀਡ ਤੇ ਆ ਰਹੇ ਟਿੱਪਰ ਨੇ ਆਪਣੀ ਲਪੇਟ ’ਚ ਲੈ ਲਿਆ, ਜਿਸ ਨਾਲ ਟਰੈਕਟਰ ਚਾਲਕ ਜ਼ਖ਼ਮੀ ਹੋ ਗਿਆ। ਘਟਨਾਂ ਸਥਾਨ ’ਤੇ ਪੁੱਜੇ ਰੋਪੜ ਹਾਈਵੇਅ ਅਧਿਕਾਰੀਆਂ ਤੇ ਪੰਚ ਰੁਪਿੰਦਰ ਸਿੰਘ ਰੂਪੀ, ਸਾਵਣ ਸਿੰਘ ਧਾਲੀਵਾਲ ਤੇ ਹੋਰ ਲੋਕਾਂ ਵੱਲੋਂ ਤੁਰੰਤ ਟਰੈਕਟਰ ਚਾਲਕ ਨੂੰ ਹੰਬੜਾਂ ਹਸਪਤਾਲ ’ਚ ਇਲਾਜ ਲਈ ਲਜਾਇਆ ਗਿਆ। ਜ਼ਖ਼ਮੀ ਹੋਏ ਟਰੈਕਟਰ ਚਾਲਕ ਦੀ ਪਛਾਣ ਮਲਕੀਤ ਸਿੰਘ ਖਹਿਰਾ ਬੇਟ ਵਜੋਂ ਹੋਈ ,ਉਸ ਦੇ ਟਰੈਕਟਰ ਦਾ ਵੀ ਵੱਡਾ ਨੁਕਸਾਨ ਹੋਇਆ ਹੈ। ਰੁਪਿੰਦਰ ਸਿੰਘ ਰੂਪੀ ਪੰਚ ਖਹਿਰਾ ਬੇਟ ਨੇ ਦੱਸਿਆ ਕਿ ਸਾਡੇ ਪਿੰਡ ਦਾ ਵਸਨੀਕ ਮਲਕੀਤ ਸਿੰਘ ਜੋ ਕਿ ਘਰ ਬਣਾ ਰਿਹਾ ਹੈ ਉਹ ਟਰੈਕਟਰ ਨਾਲ ਲੈਂਟਰ ਪਾਉਣ ਵਾਲੀ ਮਸ਼ੀਨ ਨੂੰ ਹੰਬੜਾਂ ਛੱਡ ਕੇ ਘਰ ਨੂੰ ਆ ਰਿਹਾ ਸੀ ਤੇ ਰਸਤੇ ’ਚ ਇਹ ਹਾਦਸਾ ਵਾਪਰ ਗਿਆ ਤੇ ਕੋਈ ਜਾਨੀ ਨੁਕਸਾਨ ਹੋਣ ਤੋਂ ਬਚਾਅ ਰਿਹਾ ਹੈ। ਇੱਥੇ ਲੋਕਾਂ ਦਾ ਕਹਿਣਾ ਸੀ ਕਿ ਆਮ ਹੀ ਓਵਰਲੋਡ ਬਿਨਾਂ ਨੰਬਰੀ ਟਿੱਪਰ ਸੜਕ ’ਤੋਂ ਗੁਜ਼ਰਦੇ ਰਹਿੰਦੇ ਹਨ ਤੇ ਆਏ ਦਿਨ ਹਾਦਸੇ ਵਾਪਰਦੇ ਹਨ, ਪਰ ਪੁਲਿਸ ਪ੍ਰਸ਼ਾਸਨ ਬੇਖ਼ਬਰ ਦਿਖਾਈ ਦੇ ਰਿਹਾ ਹੈ।
