ਗਊਸ਼ਾਲਾਵਾਂ ਦੀ ਹਾਲਤ ਸੁਧਾਰਨਾ ਪਹਿਲੀ ਤਰਜੀਹ- ਮੇਅਰ ਸੌਰਭ ਜੋਸ਼ੀ <br/>
ਅਜੀਤ ਡੈਸਕ
31-01-2026
ਨਿਰੀਖਣ ਦੌਰਾਨ ਰਾਏਪੁਰ ਗਊਸ਼ਾਲਾ 'ਚ ਲੱਗੀ ਮਸ਼ੀਨ ਇਕ ਵਾਰ ਫ਼ਿਰ ਬੰਦ ਪਾਈ ਗਈ | ਪਹਿਲਾਂ ਵੀ ਮਸ਼ੀਨ ਬੰਦ ਰਹਿਣ ਕਾਰਨ ਪਸ਼ੂਆਂ ਦੀਆਂ ਲਾਸ਼ਾਂ ਇਕੱਠੇ ਹੋਣ ਨੂੰ ਲੈ ਕੇ ਵਿਵਾਦ ਪੈਦਾ ਹੋ ਚੁੱਕਾ ਹੈ | ਇਸ ਵਾਰ ਗਊਸ਼ਾਲਾ 'ਚ ਅੱਠ ਪਸ਼ੂਆਂ ਦੀਆਂ ਲਾਸ਼ਾਂ ਤਿਰਪਾਲ ਨਾਲ ਢੱਕੀਆਂ ਹੋਇਆਂ ਮਿਲੀਆਂ, ਜਿਸ 'ਤੇ ਮੇਅਰ ਸੌਰਭ ਜੋਸ਼ੀ ਨੇ ਸਖ਼ਤ ਨਾਰਾਜ਼ਗੀ ਜਤਾਈ ਅਤੇ ਮਸ਼ੀਨਰੀ ਨੂੰ ਤੁਰੰਤ ਠੀਕ ਕਰਕੇ ਨਿਯਮਤ ਤੌਰ 'ਤੇ ਚਾਲੂ ਰੱਖਣ ਦੇ ਨਿਰਦੇਸ਼ ਦਿੱਤੇ | ਮੇਅਰ ਵਲੋਂ ਗਊਸ਼ਾਲਾਵਾਂ ਸੰਬੰਧੀ ਕਈ ਅਹਿਮ ਹੁਕਮ ਜਾਰੀ ਕੀਤੇ ਗਏ, ਜਿਨ੍ਹਾ 'ਚ ਰਾਏਪੁਰ ਗਊਸ਼ਾਲਾ ਦੇ ਵਿਸਤਾਰ ਅਤੇ ਪਸ਼ੂਆਂ ਦੀ ਗਿਣਤੀ ਵਧਾਉਣ ਦੇ ਨਿਰਦੇਸ਼ ਦਿੱਤੇ ਗਏ | ਇਸ ਦੇ ਨਾਲ ਹੀ ਫ਼ੈਸਲਾ ਕੀਤਾ ਗਿਆ ਕਿ ਸਾਰੀਆਂ ਗਊਸ਼ਾਲਾਵਾਂ ਦਾ ਦੁੱਧ ਵੇਚਣ ਜਾਂ ਕਰਮਚਾਰੀਆਂ ਨੂੰ ਦੇਣ ਦੀ ਬਜਾਏ ਅਨਾਥ ਆਸ਼ਰਮਾਂ ਨੂੰ ਦਿੱਤਾ ਜਾਵੇਗਾ | ਸਰਦੀ ਦੇ ਮੌਸਮ 'ਚ ਗਾਵਾਂ ਦੇ ਹੇਠਾਂ ਪਰਾਲੀ ਵਿਛਾਉਣ ਦੇ ਵੀ ਹੁਕਮ ਜਾਰੀ ਕੀਤੇ ਗਏ | ਇਸ ਤੋਂ ਇਲਾਵਾ ਇੰਡਸਟਰੀਅਲ ਏਰੀਆ ਦੀ ਗਊਸ਼ਾਲਾ 'ਚ ਲੋਹੇ ਦੇ ਐਂਗਲ ਹਟਾ ਕੇ ਰਬੜ ਦੇ ਐਂਗਲ ਲਗਾਉਣ ਤਾਂ ਜੋ ਕਰੰਟ ਦਾ ਕੋਈ ਖ਼ਤਰਾ ਨਾ ਰਹੇ ਅਤੇ ਜਰਜਰ ਟੀਨ ਸ਼ੈਡ ਬਦਲਣ ਦੇ ਨਿਰਦੇਸ਼ ਵੀ ਮੇਅਰ ਵਲੋਂ ਜਾਰੀ ਕੀਤੇ ਗਏ |
