ਲਾਲੜੂ, 6 ਮਾਰਚ (ਰਾਜਬੀਰ ਸਿੰਘ)-ਸਥਾਨਕ ਟ੍ਰੈਫ਼ਿਕ ਪੁਲਿਸ ਵਲੋਂ ਲਾਲੜੂ ਦੀ ਸਰਵਿਸ ਰੋਡ ਤੇ ਕੌਮੀ ਮਾਰਗ 'ਤੇ ਟ੍ਰੈਫ਼ਿਕ ਨਿਯਮਾਂ ਦੀ ਉਲੰਘਣਾ ਕਰਨ ਅਤੇ ਗ਼ਲਤ ਪਾਰਕਿੰਗ ਵਾਲੇ ਕਰੀਬ ਦੋ ਦਰਜਨ ਵਾਹਨਾਂ ਦੇ ਚਲਾਨ ਕੱਟੇ ਗਏ, ਜਦਕਿ ਦੋ ਮੋਟਰਸਾਈਕਲਾਂ ਨੂੰ ਜ਼ਬਤ ਕੀਤਾ | ਇਸ ਸੰਬੰਧੀ ਟ੍ਰੈਫ਼ਿਕ ਪੁਲਿਸ ਲਾਲੜੂ ਦੇ ਇੰਚਾਰਜ ਏ. ਐਸ. ਆਈ. ਕਿ੍ਸ਼ਨ ਸਿੰਘ ਨੇ ਦੱਸਿਆ ਕਿ ਕੁਝ ਸਮੇਂ ਤੋਂ ਉਨ੍ਹਾਂ ਨੂੰ ਸ਼ਿਕਾਇਤਾਂ ਮਿਲ ਰਹੀਆਂ ਸਨ ਕਿ ਲਾਲੜੂ ਅੰਡਰ-ਬਿ੍ਜ ਦੇ ਨੇੜੇ ਸਰਵਿਸ ਰੋਡ 'ਤੇ ਪਿਕਅੱਪ, ਜੀਪਾਂ, ਮਿੰਨੀ ਬੱਸਾਂ ਤੇ ਆਟੋ ਚਾਲਕਾਂ ਦੁਆਰਾ ਗ਼ਲਤ ਪਾਰਕਿੰਗ ਕੀਤੇ ਜਾਣ ਕਾਰਨ ਅਕਸਰ ਜਾਮ ਲੱਗਿਆ ਰਹਿੰਦਾ ਹੈ, ਜਿਸ ਦੇ ਚਲਦਿਆਂ ਆਉਣ-ਜਾਣ ਵਾਲੇ ਵਾਹਨ ਚਾਲਕਾਂ ਨੂੰ ਭਾਰੀ ਸਮੱਸਿਆ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ ਅਤੇ ਅਕਸਰ ਲੜਾਈ-ਝਗੜੇ ਹੁੰਦੇ ਰਹਿੰਦੇ ਸਨ | ਉਨ੍ਹਾਂ ਕਿਹਾ ਕਿ ਆਵਾਜਾਈ ਨੂੰ ਸੁਚਾਰੂ ਬਣਾਈ ਰੱਖਣ ਲਈ ਸਰਵਿਸ ਰੋਡ 'ਤੇ ਗ਼ਲਤ ਪਾਰਕ ਕੀਤੇ ਗਏ ਲਗਭਗ ਦੋ ਦਰਜਨ ਵਾਹਨਾਂ ਦੇ ਚਲਾਨ ਕੱਟੇ ਗਏ | ਉਨ੍ਹਾਂ ਬਾਜ਼ਾਰ 'ਚ ਆਉਣ ਵਾਲੇ ਲੋਕਾਂ ਨੂੰ ਕਿਹਾ ਕਿ ਸਰਵਿਸ ਰੋਡ ਆਉਣ-ਜਾਣ ਵਾਸਤੇ ਹੈ ਨਾ ਕਿ ਪਾਰਕਿੰਗ ਕਰਨ ਲਈ | ਉਨ੍ਹਾਂ ਚਿਤਾਵਨੀ ਦਿੱਤੀ ਕਿ ਜੇਕਰ ਭਵਿੱਖ 'ਚ ਸਰਵਿਸ ਰੋਡ 'ਤੇ ਕੋਈ ਵਾਹਨ ਗ਼ਲਤ ਪਾਰਕ ਕੀਤਾ ਫੜਿਆ ਗਿਆ ਤਾਂ ਚਲਾਨ ਦੇ ਨਾਲ-ਨਾਲ ਗ਼ਲਤ ਪਾਰਕਿੰਗ ਕਰਨ ਵਾਲੇ ਵਾਹਨ ਚਾਲਕ ਵਿਰੁੱਧ ਕਾਨੂੰਨੀ ਕਾਰਵਾਈ ਵੀ ਕੀਤੀ ਜਾਵੇਗੀ |
